ل بیرەوەریا کارەساتا شنگالێ، پشتەڤانی ل ریفراندۆمێ هاتەکرن

دهۆک-KDP.info-

 بیرەوەریا کارەساتا شنگالێ ل پارێزگەها دهۆک و مەزارێ شەرفەدین ل شنگالێ هاتە پرێڤەبرن ب چەندین برگەیێن جودادا، لڤێ رۆژێ پێشتەڤانی ل ریفراندۆم و سەربەخویا هەرێما کوردستانێ هاتەکرن و داخوازا پارێزگەهبوونا شنگالێ هاتەکرن.

ل 3 تەباخا سالا 2014ێ، تیرۆرستێن داعشێ سەر ب دەڤەرێن دەرڤەیی هەرێما کوردستانێ گرت و کارەساتا هەرە مەزن ل شنگالێ روودا، کۆ پتر ژشەش هزار کوردێن ئیزیدی هاتنە رەڤاندن ژلایێ تیرۆرستێن داعشێ ڤە، دسێ سالیا ڤێ کارەساتێ دا ل دهۆک و مەزارێ شەرفەدین ل شنگال، ئەڤ بیرەوەری یە هاتە ساخکرن، (نیجیرڤان بارزانی) سەرۆکێ حکومەتا هەرێما کوردستانێ گۆت:" پاراستنا ئێمناهیا باژێرێ مووسل دستوویێ لەشکەرێ عیراقێ دا بوو، لێ ب هەبوونا چەکەکێ گران نەشیان خۆ لبەر هێرشێن تیرۆرستێن داعشێ بگرن و جلێن خۆ لبەر خوکرن و رەڤین، دەمێ داعش هاتینە شنگال پێشمەرگەیی چەکێ پێدڤی دگەل نەبوو بشێن بەرەڤانیێ بکەن و حکومەتا عیراقێ هیچ هاریکاریا پێشمەرگەیی نەکر بوو و نەکریە ژی، لێ بۆ حەشدا شەعبی هەمی تشت دابین کرینە".

(نێچیرڤان بارزانی) گۆتژی:" درستبوونا داعشێ دەرئەنجامێ شکەستنا سیاسەتا حکومەتا عیراقێ بوو، لێ سیاسەتا حکومەتا هەرێما کوردستانێ ئەوە، شنگال ببیتە پارێزگەهەک و دەستهەلاتا خۆ هەبیت".

(بارزانی) دووپاتکر:" ریفراندۆم ئارمانج نینە، بەلکو وەسیلەکە بۆ گەهاندنا ئارمانجەکا مەزنتر، ئەو ژی سەربەخویا کوردستانێ یە".

(فازل میرانی)، سکرتێرێ مەکتەبا سیاسی یا پارتی دیموکراتی کوردستان ئاماژەدا:" داکۆ ئەڤ کاراساتە دووبارە نەبیتە ڤە، پێدڤییە ناڤمالیا کوردی رێکبێخین، جونکی پرسا ریفراندۆمێ و سەربەخۆیێ ل هەرێما کوردستانێ دریێ دایە و دبیت پشکەک ژی بیێ ئێکرێزی بیت، ژبەر ڤێ ئێکێ گرنگە ئێکرێزی و تەبایێ پەیدا بکەین".

شنگال دەڤەرەک ژ دەڤەرێن درەڤەیی هەرێما کوردستانێ بوو و لگۆر دستورێ عیراقێ دکەفتە لژێر ماددا 140، ژ روویی ئیداری ڤی حکومەتا عیراقێ پرێڤە دبر، (مەحما خەلیل)، قائیمقامێ قەزا شنگال، بۆ مالپەرێ فەرمیێ پارتی دیموکراتی کوردستان راگەهاند:" حکومەتا بەغدا ب چ شێوەکی کار بۆ ئاڤادانکرنا شنگالێ نەدکر تا هاتیە داگیرکرن ژلایێ تیرۆرستێن داعشێ ڤە، پتر ژ 6 هزار کوردێن ئیزیدی ژلایێ وێ رێکخراوێ ڤە هاتنە رەڤاندن و 360 هزار ئاوارە بوون و بەهرا پتریا وان بەرەف هەرێما کوردستانێ ڤە هاتن، دیسان پتر ژ هزار کەسان ب کومەلکوژی هاتنە شەهید کرن و تا نوکە 43 گورێن ب کۆم ل ناڤ شنگال و دەردۆرێن وێ دیتینە، لێ پشتی پێشمەرگەیێ کوردستانێ دەڤەر ئازاد کری (970) خێزان یێن ڤەگەریاینە لسەر ئەردێ خۆ ل شنگال و تا نوکە سێ هزار و 50 کوردێن ئیزیدی ژ دەستێ داعشێ رزگار بووینە".

(مەحما خەلیل)، زەلالکر:" ریفراندۆم و سەربەخۆیا کوردستانێ دبەرژەوەندیا هەر کوردەکی دایە و ب تایبەت خەلکێ مەیێ شنگالێ، ئەم دخوازین شنگال ببیتە پارێزگەه و بێتە سەر ب هەرێما کوردستانێ ڤە".

(مەحموود حاجی سالح) وەزیرێ شەهید و ئەنفالکریان دەربارەیی بابەتی روونکر:" تاوانێن تیرۆرستێن داعشێ ل شنگالێ ئەنجامداین لگۆر یاسایێن نیڤدەولەتی دجنە دچارچوڤەیی تاوانێن دژی مرۆڤایەتیێ دا، ژبەر هندێ مە کارکریە بۆ ناساندانا وێ وەک جینوساید".