جەژنا خدر ئلیاس د باوەریا ئێزدیان دا../مەهدی حەسەن موراد
جەژنا خدر ئلیاس د باوەریا ئێزدیان دا..
مەهدی حەسەن موراد
ئەڤ جەژن ئێك ژ كەڤنترین جەژنێن رۆژهەلاتا ناڤینە د كەفتە د پێنج شەمبوویا ئێكێ دا،ژ مەها سباتا رۆژهلاتێ ،سێ رۆژا بەری هنگی( دوو شەمبوویێ _ سێ شەمبوویێ _ چار شەمبوویێ) رۆژینە و پێنج شەمبوویێ دبتە عیدا خدر و ئلیاس و ئەڤ رۆژی خێرن نەفەرزن بەلكی هەر ئێزدیەكی بڤێت رۆژیا دگرن نەخاسمە ئەڤ كەسێن دایك بوونا وان ل ڤان هەر چار رۆژا پتریا وان ناڤێن ل وان دئێنە دانان خدر یان ئلیاس و پتریا ڤان كەسا هەر سێ رۆژا ب رۆژی دبن.
وەكی یە دیار ئەڤ جەژنا خدر وئلیاس پەیوەندی ب وەرزێ چاندنێ ڤە هەیە پشتی چاندن خلاس دبت وتۆڤێ چاندنێ هەموو دئێتە رەشاندن و بەلاڤكرن ل دەشتێ دبێژن(خدر ئلیاس و ساڵ خلاس) یانكو چاندن خلاس بۆ ئەڤجار ل هیڤیا بەرهەمێ چاندنا خۆ دمینن ئەڤ جەژن دئێتە گێران ،ژبەركو پتریا ڤان جەژن و هەلكەفتێن مە ئێزدیان گرێدایی سرووشتی و وەرزێن سالێ نە وەكی ل ڕێورەسمێن ڤێ جەژنێ دا دئێنە گێران ،هەر وەسا ب جەژنا مرازا ژی دئێتە ناسین دباوەریا مە ئێزدیان دا خدر و ئلیاس هەر سێ رۆژا ل ئاسمانی دئێنە سەر ئەردی دگەرێن و سەد خۆزیا وێ دەڤەرا خدر و ئلیاس تێرا دەرباس بن و هەر كەسێ لێ ڕاست بن یان بێنە مالا وان دێ ب مرازا خۆ شادبت لەوا ل هێڤارا جەژنێ هەر مالەك سێنیكەكا پێخوونێ بەرهەڤ دكن و دادنێنە سەر جیەكی بلند ل مالێ دبێژن خدر و ئلیاس ئەگەر هاتن وێ مالێ دێ تامكەنە پێخوونێ و جیێن دەستێن وان دێ لسەر پێخوونێ دیار بن و ئەگەر هاتن وێ مالێ دێ خێر و بێر كەفتا ناڤ مالێ ورزق و مالێ وان دێ زێدەبت ،هەر ل ڤێ هێڤارا جەژنێ كچ یان كوڕ ئەگەر د خەوا خۆدا بچتە مالا خۆشتڤیا خۆ و ئاڤەكێ ل مالا وان ڤەخۆت سەد ل سەدێ دێ رزقێ وی ل وێ مالێ و دگەل وێ كچێ ڤەبت ، بەلكی نە هەر بۆ رزقی و هەڤژینیێ بتنێ هەر مرازەكا هەبت ئەگەر د خەوا خۆدا نەبی خدر و ئلیاس ببینن دێ گەهن مرازا خۆ ، ئێزدی رێز و حورمەتەكا مەزن د دەنە كەسایەتی یا خدر و ئلیاس و ب نەمر دزانن ، دیسا د باوەریا مە ئێزدیان دا ب خوداوەندێ دەریا و رووباران دزانن ،مەزارگەهێن وی ژی ل دەڤەرێن ئێزدیان دروست كرنە ، مینا باعەدرێ ، گوندێ كەرسافا ل كۆمەلگەها شێخكا ، قەزا شێخان ، وهتد هەروەسا مەزارگەهێ وی ل حەلەبێ ژی هەیە ، مێژونڤیس وەسا باوەر دكن ئەڤ مەزار بەری ئیسلامێ ب سەدان سالان هەبوویە نهۆ ژی ئیسلام ب تایبەت شیعە ڕێورەسمێن تایبەت هەنە وجەژنەكا بەرفرەه دگێرن بۆ خدر و ئلیاس هەروەسا مەسیحیەت ژی و یەهودیا رێورەسمێن تایبەت خەنە،ئەڤ تایبەتمەندیا ڤان ئۆلا دایە خدر و ئلیاس ئێك ئۆل نكارت بێژت ئەڤە پێگەهێ ئۆلا مەیە لەوما دئێزدیاتیێ دا ئەگەر ئەم بەرێ خۆ ب دەینێ وەك مێتولۆژی تێگەهەك گەلەك پیرۆز دایە خدر وئلیاس وەك دوو مەلایكەت وەك دوو دەروێش وەك دوو كەسێن چاك وەك دوویێن زێندی هەتا نهۆ دساخ داینە ناسین ، هەروەسا ناڤێ خدر و ئلیاس د گەلەك قەول و بەیتا دا هاتیە نەخاسمە ل قەولێ پیر شەرەف:
شەرەف دەنگ دكە ژ ئەساسە
فەهمێن زۆر قیاسە
تو خدری یان ئلیاس
دڤێ جەژنێ دا چەند رێورەسم هەنە ئەو ژی ئەڤەنە:1 _ سەربر نائێنە سەرژێكرن2_ نابت ژ مال دووربكەڤن وبچنه رێ و رێباریێن دوور3_ ل رۆژێن رۆژیا و رۆژا جەژنێ نێچیر قەدەغەیە4_گەنمی د قەلینن، دبێژنێ قەلاتك ، ئەڤە ژی نیشانا ب داوی هاتنا وەرزێ چاندنێیە5_ رۆژا چارشەمبوویێ قەلاتكا د هێرن و ( پێخوونێ) چێدكن6_ رۆژا جەژنێ جۆتیار هندەك پێخوونێ دبەتە ناڤ زەڤیێن خۆ یێن چاندنێ و لێ دڕەشینت، بۆ خێر و بەركەتێ7_ساڤارێن هێرای دقەلینن و دكەنە زادێ جەژنێ ، دبێژنێ ((چەرخووس)).
تعليقات