کچەکا ئێزدی:خوەزی مە زانیبا چ بۆ ئێزدیان هاتیە کرن
ئێزديخان نيوز:
ئەڤرۆ ٣ێ ئابا ٢٠١٦ێ، د ساڵڤەگەرا بیرهاتنا کارەساتا شنگالێ دا کچەکا ئێزدی کو د نهادا ل کەمپەکا ئاوارەیان ل سنورێ قەزا زاخۆ ئاکنجیە راگەهاند، خوەزی مە زانیبا چ بۆ ئێزدیان هاتیە کرن.
کچەکا ئێزدی ل کەمپا ئاوارەیان یا چەمشکۆ ل سنورێ قەزا زاخۆ ب رێیا ئێن ئاڕ تی راگەهاند "هەتا نها ب هزاران کەچ و ژنێن مە د بن دەستێ چەکدارێن داعشێ دا مانە خو کەتەک ل سەر نەئاخڤیە و د هاوارا وانا نەچوویە".
کەچەکا دی ژی ل کێلەکا وێ ئاماژە ب وێ ئێکێ کر "ئەز وەکی کەچەکا ئێزدی داخازیا مە هەمیان ئەوە کو دایک و خوشکێن مە ژ دەستێ داعش بهێنە رزگارکرن راگەهاند ژی بلا ل سەر مە نەگرین بلا خوشک و کەچ و ژنێن مە رزگار بکەن".
هەڤدەم هەر ئەڤرۆ بابا شێخ سەرۆکێ جڤاتا رۆحانی یا ئێزدیان راگەهاند، حکومەت ل مە ناپرسیت و خەڵک یێ عاجزە و دوو سال بورین بسەر کارەساتا شنگالێ و هەیانها خوشک و ژنکێن مە لبن دەستێ داعشێ دانە.
هەروەسا نێچیرڤان بارزانی سەرۆکێ حکومەتا هەرێمێ د پەیامەکێ دا کو ب هەلکەفتا ساڵڤەگەرا جینۆسایدا شنگالێ بەلاڤکریە ئاماژە ب وێ ئێکێ کریە "كەسوكارێن خوە یێن ئێزدی پشتڕاست دكەین كو دێ هەموو هەولا دەین و یا پێدڤی بیت دێ كەین داكو هەمی گرتی ییێن د دەستێ تیرۆرستادا ماینە، بهێنە ڕزگاركرن".
هەروەسا ئەو چەند ژی راگەهاندیە "دێ هەمی شیانێت خۆ بۆ ئاڤەدانكرنا شەنگالێ و ڕزگاركرنا دەڤەرێن مایی ژی بكارئینین و دێ ژ بەرێ باشتر ژیانێ ڤەگەرینینە دەڤەرێ ب گشتی".
قەزایا شنگالێ سەر ب پارێزگەها نەینەوا و ١٤٠ کیلۆمەتران ژ باژێرێ موسلێ دویرە.
چەکدارێن داعش ل رۆژا ١٠ێ حوزەیرانا سالا ٢٠١٤ێ باژێرێ موسل کونترۆلکرن، پشتی کونترۆلکرنا موسل ژی ل رۆژا ٣ێ ئاب ٢٠١٤ێ هێرشکرنە سەر شنگالێ و کۆنترۆلکرن.
د هێرشا چەکدارێن داعش بۆ سەر شنگالێ زێدەتر ژ ٥ هەزار وەلاتیێن ئێزدی هاتن کوشتن و زێدەتر ژ ٥ هەزار وەلاتیێن ئێزدی ژی هاتنە رەڤاندن کو پرانیا وان ژن و زارۆک بوون.
د هێرشا چەکدارێن داعش بۆ سەر شنگالێ بوویە ئەگەرێ ئاوارەبوونا زێدەتر ژ ٤٠٠ هەزار ئێزدیان، ئێزدیان قەستا چیایێ شنگالێ کرن و ژئالیێ شەرڤانێن یەپەگێ و یەپەژێ ڤە سێ رێ یێن ئارام بۆ ڤەگۆهاستنا وەلاتیێن ئێزدی بەرەف رۆژئاڤا یا کوردستانێ هاتنە ڤەکرن کو زێدەر ژ ١٣٠ هەزار وەلاتیان هاتنە ڤەگوهاستن بۆ دەڤەرێن ئارام یێن رۆژئاڤایا کوردستانێ.
رۆژا ١٣ێ تشرینا دووەما ٢٠١٥ێ هێزێن پیشمەرگە و یەپەگێ و یەپەژێ و ب پشتەڤانیا فرۆکێن هەڤپەیامانان باژێرێ شنگالێ کۆنترولکرن.
ژێده‌ر:ئێن ئارتى
