خەلكێ شنگال داخوازا ڤه‌گه‌ريانا پێشمەرگەى دكه‌ن
باسنيوز:
ئەڤرۆ 3/8/2019 پێنچ سالیا جینوسایدا شنگالێ یە و هێشتا خەلكێ شنگال ژیانا خوە پشت راست نینن بۆ زڤرینا شنگال و داخوازێ دكەن پێشمەرگەهێ كوردستانێ ڤەگەرتە شنگال و دبێژن هەتا پێشمەرگەه نە زڤرتە شنگال ئەم ژیانا خوە پشت راست نابن.
ئلیاس كچی، ئێكە ژ خەلكێ تل بنات ل قەزا شنگال دژیێ 47 سالی دا بۆ (باسنیوز) دیار كر: "ئەم نەشێن بێ هەبوونا تەناهی بزڤرینە شنگال. ئەڤە پێنچ سال بسەر جینوسایدا شنگال ڤە چوون هەتا نۆكە حكومەتا عێراقێ هەڤكاریا خەلكێ لێقەومایێ شنگال نەكریە. ئەم دخوازن تەناهی ل شنگال بهێتە بەرقەراركرن وەكو بەری سالا 2014ێ شنگال خۆش بیت".
خەلیل سلێمان، ئێك ژخەلكێ تل عزێز ل شنگال نۆكە ئاوارە ل كەمپا شاریا دهۆك دژیت، بۆ (باسنیوز) دیار كر: "دبن خێڤەتاندا ژیان گەلەك یا زەحمەتە. هەتا نۆكە ژی پتریا مالێن مە ل تل عزێز مینرێژكرینە و نەهاتینە پاقژكرن و خزمەتگوزاری ژی نینن. یا ژ هەموو ژی گرنگتر تەناهی یە، ئەوژی ل دەڤەرێن مە نینە. ئەم نەشێن دڤێ رەوشا هوەسا خرابدا ڤەگەرن وهەموو عەرەبێن بووینە تیرۆرستێن داعش وهەڤكار و پشتەڤانێن تیرۆرستێن داعش یێن زڤرینە سەر مالێن خوە هەتا پێشمەرگەه نە زڤرتە شنگال بۆ مە باوەری دروست نابیت ئەم ڤەگەرن. هەردەمێ پێشمەرگەه زڤری ئەم ژی دێ ژیانا خوە پشت راست بن دێ زڤرینە شنگال".
زیتون حەسەن، كچەكا ئێزدی خەلكا شنگالێ ل كەمپا شاریا بۆ (باسنیوز) دیار كر: "ئەڤە پێنچ سالن خەلكێ كوردستانێ و حكومەتا هەرێما كوردستانێ هەڤكاریا مە دكەن وپاراستنا تەناهیا مە ل كەمپان دكەن رەوشا مە یا باشە بتایبەتی وارێ تەناهیێ دا ل كەمپان. ل شنگال ئەڤە تەناهی نینە كەس ژمە نەشێت كچ وزارۆكێن خوە ببەتە شنگال مە دڤێت ئەم ڤەگەرن لێ تەناهی و خزمەتگوزاری ل شنگال نینن ".
فەقیر سەبری ، ئاوارەیێ شنگالێ یە ل دهۆكێ دژیت بۆ (باسنیوز) دیار كر: "هەكە تەناهیا ل شنگال هەبایە ئەم دێ چنە شنگال ژبەر نەبوونا تەناهی مە نەڤێت نۆكە بچنە ناڤ وان هێز و گرۆپێن هەمە جۆر دا ل شنگال. ئەم داخوازێ دكەن حكومەتا هەرێما كوردستانێ بزڤرتە شنگال و پێشمەرگەه پاراستنا شنگال بكەت داكو ئەم ژیانا خوە پشت راست بن و بچنە شنگال".
تعليقات