كاروبارێن ئێزدییان:حكومه‌تا هه‌رێمێ نه‌بت،كه‌س دهاوارا مه نه‌هاتییه
به‌ری دو سالان، د رۆژه‌كا وه‌ك 3ی ته‌باخا – 2014 تیرۆرستین داعشێ یێن ب ناڤ ده‌وله‌تا ئیسلامی ل ئیراق و شامێ (داعش) هێرشی ده‌ڤه‌رداری و كۆمه‌لگه‌هـ و گوندێن شنگالێ كرن، كو ترومبێلێن پێشكه‌ڤتی و زریپۆش و تانك د گه‌ل دا بوون، هه‌روه‌سا د ب چه‌كه‌كێ گران ژی د چه‌كدار كری بوون، ل ده‌ستپێكێ خه‌لكی و هێزێن ل وێ ده‌ڤه‌رێ ئاماده به‌رگری كرن، لێ ژ به‌ر كێمییا هه‌ژمارا وان و دیسا ژی چه‌كه‌كێ كێم كێم، ده‌ڤه‌را شنگال ب هاریكارییا گوندێن ره‌خودۆرێن شنگالێ و گوندین ئه‌ره‌بان كه‌ڤته ده‌ست تیرۆرستێن داعشێ.
ژ وێ رۆژێ، ب هه‌موو رامانه‌كا هه‌یی مرۆڤاتی مر، ده‌نگێ قێژیێن زاڕۆ و ژنان ئاسمان هه‌ژاند، كۆموكوژی ل دووڤ كۆمكوژیێ، ئه‌ڤه د ناڤا شنگال و كۆمه‌لگه‌هـ و گوندێن وێ دا چێبوو، ب شێوه‌یه‌كێ به‌ره‌لا خه‌لكێ شنگالێ كه‌ڤتن به‌ر گولله‌یێن وان ئه‌ڤجا وان به‌ره‌ڤانی كربا یان ژی نه، ئه‌وێن د ره‌ڤین و ئه‌وێن به‌ره‌ڤانی دكر، وێ رۆژێ نێزیكی 1200 كه‌س بوونه جان گۆری، هه‌روه‌سا 6404 كه‌س ژی كه‌ڤتن ده‌ستێن وان كو 3538 ژ وان مێنه و 2866 نێرن، پاشی ل بازارێن نه‌خاسه ژن و كچ ب شێوه‌یه‌كێ ئاشكرا هاتنه فرۆتن، هه‌روه‌سا نێزیكی 340 هزار كه‌س ژی ژ شنگالێ كۆچبه‌ر بوو و نێزیكی 60 هزار كه‌سێن دی ژی ژ باشووك و به‌حزان و ده ڤه‌رێن دی كۆچبه‌ر بوون، هه‌ژماره‌ك ژ وان به‌ر ب سووریا، توركیا چۆن و رژێژه‌یا هه‌ری مه‌زن ژی بۆ هه‌رێما كوردستانێ هاته ره‌وانه‌كرن، كو ب راستی ژی یا حكومه‌ت و خه‌لكێ هه‌رێمێ جهێ رێز و ڤیانێ یه.
ژ ئالییه‌كێ دی ڤه داعشێ نێزیكی 64 مه‌زارگه‌هـ و جهێن ئۆلا ئێزدییان ژناڤبرینه، هه‌روه‌سا هه‌ژماره‌كا مه‌زن یا گوندان ژی هاتنه تالانكرن ب رێكا گوندێن ئه‌ره‌بێن ره‌خودۆر و ئه‌ڤه ل بن چاڤدێرییا داعشێ بوو و پاشی گوند ب ته‌مامی هاتییه ژ ناڤبرن.
ئه‌ڤه چه‌ندین جاران مه داخواز كرییه، په‌ڕله‌مان و حكومه‌تا ئیراقێ و ده‌وله‌تێن هه‌ڤپه‌یمانییا دژی داعشێ و نه‌ته‌وه‌یێن ئێكگرتی و هه‌موو رێكخستنێن گرێدایی مافێ مرۆڤی و ب تایبه‌ت یێن ژنان... هه‌موو بزاڤان بكه‌ن بۆ ئازادكرنا ژنان ل ژێر ده‌ستێ تیرۆرستان و هه‌روه‌سا رزگاركرنا وان زارۆیێن نها داعش وان مه‌شق دده‌ت و وه‌ك چه‌كه‌ك ل پاشه‌رۆژێ ب كاربینیت، ئه‌ڤه مه ژ هه‌موویان خواستییه وه‌ك ئه‌ركه‌كێ نشتیمانی بكه‌ن، لێ ب لێبۆرین ڤه كه‌س د هه‌وارا مه نه‌هاتییه و ئه‌و د بیردانكا كه‌سێ دا نه‌ماینه، بتنێ حكومه‌تا هه‌رێما كوردستانێ نه‌بت، ب تایبه‌ت ژی نڤێسینگه‌ها سه‌رۆكوه‌زیرێن هه‌رێما كوردستانێ و هه‌روه‌سا قاره‌مانێن كه‌ساتیێن جڤاتا پشته‌ڤانیكرنا كوردستانێ و هێزێن ئاسایش و پێشمه‌رگه‌ی.
ژ 6404 كه‌سێن كه‌ڤتینه ده‌ستێ تیرۆرستێن داعشێ، نها 2640 هاتینه رزگاركرن كو 953 ژ وان ژنن و 328 ژی زه‌لام و 675 ژی زارۆیێن كچن و 684 ژی زارۆیێن كوڕ، نۆكه ژی نێزیكی 3770 كه‌سان د ده‌ستێن تیرۆرستێن داعشێ دا ماینه، 1914 ژ وان مێنه و هه‌روه‌سا ژی 1856 ژی نێرن، لگۆری ژێده‌رێن مه ژی نها 1400 زارۆ ژ ئالیێ تیرۆرستێن داعشێ ل سه‌ر شه‌ڕكرن و كریارێن تیرۆری و خوه‌كوژی دهێنه مه‌شقدان.
هه‌روه‌سا نها هه‌ژمارا ئێتیمان ژ هێرشا تیرۆرستێن داعشێ گه‌هشتییه 2745 زارۆ، هه‌روه‌سا 33 گۆڕێن ب كۆم ژی هاتینه دیتن، كو د ناڤا هه‌ر ئێك ژ وان گۆڕان دا 35 كه‌س د ناڤدابووینه، زێده‌باری سه‌دان حاله‌تێن برینداربوون و په‌ككه‌ڤتی و هزاران نه‌خۆشین ده‌روونی ژ ئه‌گه‌را وێ كاره‌ساتێ ژی ل دووڤ خوه هێلاینه، هه‌روه‌سا شه‌نگه‌ستێ شنگالێ (بونییه ته‌حتییه) هاتییه ژ ناڤبرن و پترییا خانییان راست بووینه و بووینه ئه‌رد، هه‌روه‌سا ملك و مالێ خه‌لكی هه‌موو هاتییه دزین و تالانكرن، ژ ئالیێ كه‌سێن نه‌فس نزم ڤه كو هنده‌ك ژ وان هه‌ر خه‌لكێ وێ ده‌ڤه‌رێ ب خوه‌ه‌نه، ژ ئه‌گه‌را كاره‌ساتێن به‌رده‌وام یێن ب سه‌رێ ئێزدییان هاتین، نها نێزیكی 75 هزار ئێزدی ل ده‌رڤه‌یی وه‌لاتێن خوه داخوازا مافێ په‌نابه‌ریێ كرییه، ئه‌گه‌ر ژی ئه‌ڤ كاره‌سات نه‌هاتبان رێكا ئێزدییان دبت ئه‌ڤ یه‌كه نه‌هاتبا سه‌رێ ئێزدییان.
نها، ئه‌م رادگه‌هینین و پێشتر ژی مه گه‌له‌ك جاران راگه‌هاندییه، ئێزدی نها ئێزدی د ره‌وشه‌كێ دا دژین كو حه‌سوودی پێ ناهێته برن و تا نها ژی هزاران ئێزدی د بن خیڤه‌تان دا د هه‌ژاریێ دا د ژیانه‌ك و ره‌وشه‌ك خراب دا دژین، نها ب هزاران ئێزدی پێدڤی ب پێدڤیێن كۆمه‌لایه‌تی یێن گه‌له‌ك هێسان یێن رۆژانه هه‌یه، هزاران كه‌سێن ژ ده‌ست داعشێ رزگاربووین پێدڤی ب چاره‌سه‌ركرنا نۆشداری و ده‌روونی هه‌یه و پێدڤی ب پێدڤیێن رۆژانه هه‌یه، سه‌دان زارۆ بێ چاڤدێری نه، سه‌دان پیروكال پێدڤی ب پێدڤیێن ژیانێ نه بتنێ بۆ وێ یه‌كێ بژین، هزاران نه‌خۆش و خودان پێدڤیێن تایبه‌ت پێدڤی ب چاره‌سه‌ركرنێن بله‌ز هه‌یه، ده‌هان ژ نه‌خۆشان چاڤه‌ڕێی نشته‌رگه‌رییان دكه‌ن و شیانێن چاره‌سه‌ركرن و نشته‌رگه‌ریێ نینن، هه‌روه‌سا ناهێته ڤه‌شارتن ژی نها هزاران كه‌سێن هاتینه ره‌ڤاندن تا نها ژی د كاودانێن سه‌خت و دژوار دا ل ژێر سته‌م و زۆرییا داعشا تیرۆرست د ژین، هه‌ر ب ڤێ یه‌كێ ژ كۆمه‌لگه‌ها نێڤده‌وله‌تی و رێكخستنێن مرۆڤی د خوازین كاره‌كێ جدی بۆ چاره‌كرنا وان ده‌هان كێشه‌یێن هه‌ین و ئاماژه پێ هاتییه‌كرن بكه‌ن.
د سه‌ر ڤێ چه‌ندێ را هنده‌ك ئالی و كه‌سێن تایبه‌مه‌ند هه‌نه هنده‌ك كاران دكه‌ن كو دبیت بۆ تاوانێن لێدانا كوشتی بهێنه بلندكرن و پێدڤییه ل سه‌ر ئالیێن فه‌رمی و مللی ژ ده‌رڤه و ناڤخوه هایدار بكه‌ین ب ڤان خالێن ل خوارێ دیاركری
1- ل ژێر دروشمێن (رزگاركرنا گرتیێن ئێزدی یێن ل ژێر ده‌ستێ داعشێ) د مه‌یدانێ دا چه‌ندین كه‌ساتی و ئالی دیاربووینه دیاردكه‌ن كو ئه‌و ب كارێ رزگاركرنا گرتییان رادبن ب گوژمێن دراڤی، بۆ ڤێ یه‌كێ ژی ل ناڤا وه‌لاتان د گه‌ڕن و چاڤ ب كه‌ساتییان و رێكخستنان د كه‌ڤن و داخوازا پاره‌یی ژ وان دكه‌ن، ل ده‌مه‌كی ئه‌م ب
2- هیڤی نه ئه‌ڤ كار راست بیت، چونكی ب دیتنا مه رزگاركرنا هه‌ر مرۆڤه‌كی ژ دڕنده‌یان، كاره‌كێ گه‌له‌ك مه‌زنه، لێ تا نها ژی ئێك مرۆڤ ل ده‌ف مه نه هاتییه تۆماركرن و ئێك حاله‌تێ ب تنێ ژی بۆ مه نه‌هاتییه، بڤێ
3- یه‌كێ ژی ئه‌م دێ ب قانوون سه‌ره‌ده‌ریێ د گه‌ل وان كه‌ین و وان ژی دبینین كو بازرگانیێ ب شه‌ره‌ف و كه‌رامه‌تا گرتییان دكه‌ن، هه‌ر ل گۆری قانوونێ ژی ئه‌و ب دزین و فێلبازیێ و ب نه‌سب و ئحتیال د ده‌ین زانین.
4- هه‌روه‌سا دیارده‌یه‌كا دی ژی په‌یدابوویه كو كو رزگاربوویه‌كا ده‌ستێ داعشێ د گه‌ل خوه ل ناڤا وه‌لاتان د گێڕینن، بۆ ب ده‌ست خستنا دراڤی، له‌وا ب پێدڤی ژی دبینن ئه‌و ل سه‌ر ڤان ره‌فتارا راوه‌ستن و ئه‌ڤه خزمه‌تا وێ دۆزێ ناكه‌ن یا وان هه‌یی.
5- هه‌روه‌سا هنده‌ك رێخستن و كه‌ساتیێن كرسیتان ژ ده‌رڤه‌یی وه‌لاتی هاتینه بۆ وێ یه‌كێ ل ژێڕ چه‌ترا به‌لاڤكرنا هاریكاریێ بۆ رزگاربوویێن ئێزدی، لێ ب لێبۆرینه‌كا مه‌زن ڤه ئه‌و ب ژیانا وان یا رۆژانه ب ده‌لیڤه دبینن و ته‌بشیرێ دناڤا وان دا دكه‌ن، هه‌روه‌سا ئغرائا دراڤی بۆ وان دروست دكه‌ن، هه‌روه‌سا سۆزان ژی ب وان دده‌ن كو دێ وان به‌نه هنده‌ك ژ وه‌لاتێن چارچۆڤه كری، د ده‌مه‌كی دا ئه‌م پشت راستین كرستیان و حه‌زره‌تا عیسایی ژ هندێ مه‌زنترن كو رێكێن ب ڤی ئاوایی بهێنه بكارئینان كو مرۆڤ ب گه‌هنه وان، له‌ورا ئه‌م داخواز ژ ڤان رێكخستن و كه‌ساتییان دكه‌ین ده‌ست ژ ڤی كاری به‌رده‌ن و به‌رۆڤاژی دێ ب رێكێن قانوونی دووڤچۆنا وان كه‌ین.
رێڤه‌به‌رییا گشتییا كاروبارێن ئێزدییان
ل وه‌زاره‌تا ئه‌وقاف و كاروبارێن ئاینی ل حكومه‌تا هه‌رێما كوردستانێ
2-8-2016
