بنگه‌هێ لالش: دوو سال ل سه‌ر كاره‌ساتا شنگالێ بۆرین وپشته‌ڤانیا نێڤ ده‌وله‌تی نه ل ئاستێ بێتڤیه
ئه‌ڤه بیره‌وه‌ریا دووێیه دبۆرت ل سه‌ر كاره‌ساتا داگیركرنا شنگال ژبال تیرۆرستێن داعش یێن گونه‌هكار، ئه‌وا بوویه ئه‌گه‌رێ كوشتن و هندابوون و ره‌ڤاندنا ب هه‌زاران ژن و زارۆك و زه‌لامان ژ كوردێن ئێزدی، هه‌روه‌سا هه‌رفاندنا زۆربه‌یا ژێرخانا شنگال زێده‌باری تالانكرن ودزینا ملك ومال وهه‌رفاندنا مه‌زارگه‌هێن ئێزدیان و هه‌زارن مالێن خه‌لكێ مه.
دگه‌ل هاتنا بیره‌وه‌رییا دووێ یا ڤێ كاره‌ساتێ،ئاماژه بۆێ چه‌ندێ دئێته دان كو سه‌رۆك بارزانی سۆزا ئازادكرنا شنگال دا و سۆزا خوه بجهئینا ب سه‌ركه‌فتیانه شنگال رزگار بوو ل سه‌ر ده‌ستێ پێشمه‌رگێن قه‌هرمان، وئه‌ڤه ئێك ژهاندرێ ڤه‌ژاندنا هیڤی وئۆمێدا مه یا به‌ره‌دوام بوو.
یا خویایه ئه‌نجامێن كاره‌ساتا شنكال دێ دبه‌ردوام بن، ژبه‌ر گیرۆبوونا پێشكێشكرنا پشته‌ڤانیا نێڤ ده‌وله‌تی وجیهانی، به‌روڤاژی وان سۆزێن مه ژ شاندێن دیبلۆمات د بهیستن ژ زۆربه‌یا وه‌لاتێن رۆژئاڤا وگه‌له‌ك وه‌لاتێن دی ژی، زێده‌باری سۆزێن رێكخراوێن خێرخواز ومرۆڤایه‌تی یێن جیهانی ئه‌وێن زۆربه‌یا وان ب مخابنی ڤه نه‌هاتنه بجهئینان وه‌كو مه حه‌زدكر.
ب هه‌زاران كەس د ناف كه‌مپێن ئاواره‌بونێدا دژین لبه‌ر گه‌رم وسه‌رمایێ، وره‌وشا وان یا خرابه ژبه‌ر كێمبوونا هاریكاریێن پێتڤیێن رۆژانه ویێن ته‌ندروستی ومرۆڤایه‌تی.. وهتد، ب هه‌زاران خێزان ل كەس و كارێن خوه دگه‌رن ل گۆرێن بكۆم دا یان ژی ل پێ ده‌نگوباسێن وان دگه‌رن ژ وان كه‌سێن كارین بره‌ڤن ژ زیندانێن رێكخراوا تیرۆرست ل عێراقێ وشامێ. هه‌روه‌سا ئه‌و كجێن رزگاربووین ژی ره‌وشا وان باش نینه، تایبەت ئه‌وێن ل ناڤ كه‌مپا دا دژین دگه‌ل خێزانێن خوه، وان كچان بێتڤیه‌كا زۆر ب پشته‌ڤانیا ده‌روونی وماددی هه‌یه دا ژ وێ ره‌وشا خراب ده‌ربازبن وبكارن جاره‌كه دن تێكه‌لی جڤاكی ببن. و ئه‌و گرتیێن هێشتا د ده‌ستێن داعش دا ماین دره‌وشه‌كا زۆرا سه‌خت ودژوار وخراب دا دژین، ول دیف چیرۆكێن ئه‌وێن ژ ده‌ستێن داعش رزگاربووین ئه‌و دكه‌فتنه به‌ر ئه‌شكه‌نجه‌دانێن جۆراوجۆر وده‌ست درێژی و هه‌تك برن ل گه‌ل وان دهاته‌كرن، وسه‌ره‌ده‌ری دگه‌ل وان دهاته كرن وه‌كو (سه‌بایا) وكۆله ل ڤی سه‌رده‌مێ چه‌رخێ بیست و ئێكێ ده.
ئیرۆ رۆژ به‌رپرساتیه‌كه مه‌زن دكه‌فته سه‌ر ملێن جڤاكا نێڤ ده‌وله‌تی ژبۆ ڤه‌گه‌راندنا مافێن ئێزدیان یێن كو كه‌تنه به‌ر توندره‌وترین هێرش دمێژویێ دا ، ئه‌و هێرشا كو دڤیان ئێزدیان قربكه‌ت وبنبربكه‌ت، به‌لێ ئیرادا خه‌لكێ مه وخۆرا‌گرتنا وان مه‌زنتربوو ژهه‌موو پیلانێن دوژمنان وحه‌زێن وان یێن توندره‌و. پێناساندنا یا كو ب سه‌رێ ئێزدیان هاتی جینۆسایده ( قركرنا بكۆمه) ژ لایێ جڤاكا نێڤ ده‌وله‌تیڤه نه خه‌لاته‌كه بۆ ئێزدیان، به‌لكو مافێ وانه ژبه‌ر وێ تراجیدیا ب سه‌رێ خه‌لكێ مه‌هاتی ژ كوشتن وره‌ڤاندن وسه‌بیكرن وتالانكرنا ملك ومالان وسه‌پاندنا ئاینه‌كێ نوو ل سه‌ر ئێخسیرێن مه ب زۆری دوور ژهه‌موو بنه‌مایێن مرۆڤایه‌تیێ. ودگه‌ل بانگه‌وازیا مه بۆ جڤاكا نێڤ ده‌له‌تی ورێكخراوێن نێڤ ده‌وله‌تی بۆ ده‌ستپێكرنا كارێ جدی ژبۆ بجهئینانا پلانێن هاریكار ژبۆ زڤراندنا خه‌لكێ مه یێ ئاواره بۆ ده‌ڤه‌رێن وان ب قه‌در وقیمه‌ت، هه‌روسا داخوازا ئازادكرنا ده‌ڤه‌رێن ئێزدیان یێن ماین دكه‌ن ل باشوورێ شنگال وباشیك وبه‌حزانێ، زێده‌باری ده‌ڤه‌رێن دۆرماندۆر ژبۆ پاراستنا وان ژمه‌ترسیان.
هه‌روه‌سا داخوازێ ژجهێن په‌یوه‌ندیدار دكن ژبۆ هه‌موو توانا وشیانێن خوه بێخنه كار ژبۆ رزگاركرنا كچ و ژنێن مه یێن د ده‌ستێ داعش دا ماین ب زووترین ده‌م، و دووپات دكه‌ن كو كه‌س وكارێن وان ل هێڤیا وانن چه‌ند ده‌م درێژبتن، وهه‌ر كچه‌كه مه یا ره‌ڤاندی رزگارببیت دێ ئێته پێشوازیكرن ب شانازی وسه‌ربلندی. ئه‌ڤ تنگاڤیا دلێ مه ودلێ هه‌موو هه‌ڤالێن مه ئێشاندی وهێشتا دئێشینت، رێ ل مه ناگریت ئه‌م په‌سن وسوپاسیا خه‌لكێ كوردستانێ بكه‌ین ئه‌وێن ده‌ستێ هاریكاریێ درێژی خه‌لكێ مه كرین ل رۆژێن ته‌نگاڤ ودژواردا. وسه‌ره‌رای كریزا ئابووری یا كو هه‌رێم تێرا ده‌ربازدبیت، ب تایبه‌تی پشتی دابه‌زینا به‌هایێن پترۆلێ، سه‌ركرداتیا هه‌رێمێ یا رژد بوویه بۆ پێشكێشكرنا وی بارێ پێ چێبوویی ژبۆ سڤككرنا بارێ خه‌لكێ مه یێ ئاواره.
هه‌روه‌سا ئه‌م په‌سن وسوپاسیا سه‌رۆكێ حكوومه‌تا هه‌رێمێ به‌رێز (نێجیرڤان بارزانی) وكابینا وی یا وه‌زاری دكه‌ن، یا كو هه‌موو شیانێن خوه دانه كار ژبۆ په‌یوه‌ندیێن به‌رده‌وام دگه‌ل وه‌لاتێن هه‌ڤال وئاشتیخواز وزه‌نگین ژبۆ هاریكاریكرنا هه‌رێمێ ژ لایێ ئابووری ڤه داكو ب قارت ڤێ ته‌نگاڤیێ ده‌ربازبكه‌ت و دابینكرنا به‌شه‌كی ژ ڤێ پشته‌ڤانیێ ژبۆ خه‌لكێ مه یێ شنگال، بۆ زانین ئه‌ڤه بۆ ماوێ ٣ سالایه حكوومه‌تا ئێكگرتی ل به‌غدایێ مه‌زاختنا بودجا شنگال راوه‌ستاندی سه‌ره‌رای وێ پێتڤیا مه‌زن بۆرا ب لێبۆرین ڤه. ئه‌م دبینن ئه‌وێ تاوانا داگیركرنا شنگال جێبه‌جێكری دڤیا چه‌ند ئارمانجا ب جهبینت، ژوان ژی پارچه پارچكرنا جڤاكێ كوردستانێ وڤه‌قه‌تاندنا ئێزدیان ژ وه‌لاتێن وان یێ دایك ئانكو كوردستان. به‌لێ ب قوربانیێن پێشمه‌رگه‌یێن قه‌هرمان وحكوومه‌ت وشاره‌زایا سه‌رۆك بارزانی ئه‌و پیلانا چه‌په‌ل هاته روخاندن، وئه‌م دووپات دكه‌ن بۆ هه‌موویان كو ئه‌م چو جارا ده‌ست ژ ناسناما خوه یا نه‌ته‌وه‌یی یا كوردی به‌رنادن، وده‌ست ژ ئه‌ردێ باب وبابیران به‌رنادن، وده‌ست ژ پیرۆزیێن خوه به‌رنادن، هه‌روه‌سا ب چوو شێوه‌یا ئه‌م ده‌ست ژ وه‌لاتێ دایك كوردستانێ به‌رنادن چنكو ئه‌م پارچه‌كه مێژوویی وهه‌ره ره‌سه‌نن ژ ڤی وه‌لاتی، ومه باوه‌ریه‌كه موكم هه‌یه كو ئالایا كوردستانێ یا ره‌نگین یا كو رۆژا نورێ وحه‌قیێ جهێ خوه د نێڤا وێ دا گرتی دێ ل دوماهیێ ب سه‌ركه‌فت ل سه‌ر ئالایا ره‌ش ئالایا زولمێ وتاریتیێ وخرابكرنێ وپاشكه‌فتنێ.
ل دووماهیێ دبێژن، مه هیڤیه ل هه‌ر بیرهاتنه‌كه ببۆرت ل سه‌ر كاره‌ساتا شنگالێ دا، ئه‌م ببینن به‌ری هه‌موو تشتی چه‌ند كارێن باش یێ ب جه هاتین ل به‌رژه‌وه‌ندیا قوربانیێن بێ گونه‌ه و هه‌روه‌سا ئاواره‌یان دا ، كو مه هیڤیه كه‌یسا وان به‌رده‌وام به هه‌تا كو ده‌ڤەرێن وان بێن تامینكرن وهه‌روسا ئاڤاكرنا ژێرخانا وێ وپاراستنا وێ ژ هه‌ر مه‌ترسیه‌كێ، دا كو ئه‌م هه‌موو ب باوه‌ری به‌ره‌ف بجهئینانا ئارمانج وهیڤیێ خه‌لكێ كوردستانێ بكه‌ڤن ژ ئێمناهیێ وسه‌ربه‌خۆبوونێ .
ره‌حمه‌ت ل روحا جانگوریێن كاره‌ساتا شنگال بن.. سه‌ربه‌رزی ونه‌مرن بۆ جانگوریێن پێشمه‌رگه.. ئازادی بۆ كچێن مه یێن ره‌ڤاندی.. سه‌رشۆری وشه‌رمه‌زاری بۆ رێكخراوا داعش یا تیرۆرست.
ده‌سته‌یا بلندا بنگه‌هێ لالش یێ ره‌وشه‌نبیری وكۆمه‌لایه‌تی/ دهۆك
٢/٨/٢٠١٦
