چالاكڤانێن ژنێن ئێزدی:ژنا ئێزدی بۆ جیهانێ سەلماند خودان ئیرادەیەكا ب هێزە
ئێزدیخان نیوز:
رۆژا جیهانی یا ژنان،ئیرۆ رۆژا چارشەمبوویێ،ل سەرانسەری جیهانێ هاتە ساخكرن،چالاكڤان و رۆژنامەڤانێن كچێن ئێزدی دبێژن،روورەشی بۆ هەموو جیهانێ كو ڤێ جەژنێ ل بیر بینن و ئاهەنگا بگێرن،هێشتا ب هەزاران ژنێن ئێزدی یێ دنالن دزیندانێن داعشێ دا،یا پێدڤیە ل سەر ژنێن كورد ب شێوەیەكێ گشتی چالاكیان ئەنجامبدەن و خۆپیشاندانان بكەن بۆ یێن ئێخسیركری،ژنا ئێزدی بۆ جیهانێ سەلماند خودان ئیرادەیەكا بهێزە.
ب هەلكەفتا رۆژا جیهانی یا ژنان،چالاكڤانا ئێزدی"نازك بەرەكات" خویاكر:"روورەشی بۆ هەموو جیهانێ كو ڤێ جەژنێ ل بیر بینن و ئاهەنگا بگێرن،هێشتا ب هەزاران ژنێن ئێزدی دزیندانێن داعشێ دان و دەستدرێژی یا لێ دئێتە كرن و یێ دئێنە فرۆتن ،چاوان دێ دڤێ رۆژێ دا ئاهەنگا گێرین و ئەو ل دەیك و خووشكێن مە یێن گرتی ل بیرا مە دئینت،ئیرۆ ل پێش چاڤێ جیهانێ ژن یا دئێتە كرین و فرۆتن و چوو جەژن نینن هەتا پشتی رزگاركرنا هەموو گرتییان".
رۆژنامەڤانا ئێزدی"ریسالە شەركانی"گۆت:"ل دەستپێكێ پیرۆزباهیێ ل هەموو ژنێن جیهانێ دكەم ب هەلكەفتا 8یئادارێ رۆژا جیهانی یا ژنێ،دڤێ رۆژێ دا ب هەزاران ژنێن ئێزدی یێ دنالن دزیندانێن داعشێ دا،یا پێدڤیە ل سەر ژنێن كورد ب شێوەیەكێ گشتی چالاكیان ئەنجامبدەن و خۆپیشاندانان بكەن بۆ ژنێن ئێزدی یێن ئێخسیركری نەكو ئاهەنگان بگێرن ژبەركو خووشكێن وان یێن تووشی سڤكاتی و كرین و فرۆتنێ دبن،داخوازێ ژ رێكخراێن مافێ مرۆڤی و چالاكڤانان ل كوردستانێ دكەم فشارێ بێخنە سەر حكوومەتا عێراقێ و جڤاكێ نێڤ دەولەتی بۆ دیتنا چارەیەكێ بۆ ڤێ كارەساتا راست،دیسان داخوازێ ژ حكوومەت و پەرلەمانێ كوردستانێ دكەم رۆژەكێ ژ هەر سال بۆ ژنا ئێزدی تەرخان بكەن و ڤێ رۆژێ ب شێوەیەكێ فەرمی ل سەر ئاستێ هەرێمێ رابگەهینن وەك رێزلێنان بۆ ژنا ئێزدی ئەوا بوویە قوربانیا هزرا توندرەو و دڤی چەرخی دا بوویە هێمایەك بۆ وێرەكیێ،ب دیتنا رۆژەكا تایبەت ل سەر ئاستێ ئێزدیخانێ هەبت و ژبال جڤاتا رۆحانانی بێتە دانان و بنگەهێ لالش ب ڤێ چەندێ رابت".
ژبال خۆڤە،رۆژنامه‌ڤانا ئێزدی"ناڤین سمۆقی"دبێژت:"رۆژا جیهانی یا ژنێ ب دیتنا من یا نۆرمالە چنكو دبتە سالا سێیێ دەستدرێژی ل ژنێن مە یا دئێتە كرن و ل بازاران یێن دئێنە فرۆتن،چاوان دێ ئاهەنگا گێرین،حكوومەتا عێراقێ چوو دەستپێشخەری نەكرینە هەمبەر گرتیێن ژنێن ئێزدی و دیتنا چارەیەكێ بۆ یێن ئاوارەبووی و بێ ژنان و هتد،ژبەركو ژن زەرەرمەندا ئێكێ یە یا ڤان شەران،ژنا ئێزدی بۆ جیهانێ سەلماند خودان ئیرادەیەكا بهێزە،لەوا دڤێ رۆژێ دا داخوازێ ژ هەموویان دكەم گرتییان رزگار بكەن و دچەندین كۆنگریێن نێڤ دەولەتی دا مە داخوازا ئازادكرنا وان كر بەلێ مە چوو پێنگاڤێن نێڤ دەولەتی بۆ هاریكاریكرنا وان نەدیتن،تنێ پیرۆزباهیێ ل دەیكێن جانگۆری و گرتییان دكەم".
تعليقات