هەتا ڤێگاڤێ پتر ژ 70هەزار ئێزدى كۆچبه‌رى دەرڤەی وەلاتی بووینە
ئێزدیخان نیوز:
كۆچبەرییا كوردێن ئێزدی بەردەوامە،ل دووڤ پێشبینییان هەتا ڤێگاڤێ پتر ژ 70هەزار ئێزدی بەرەف دەرڤەی وەلاتی چووینە.
پشتی رێكخراوا تیرۆرستییا داعشێ هێرشی قەزا شنگالێ كری ل 3ئابا 2014ێ ب تایبەتی و چەند دەڤەرێن دی یێن ئێزدیان،كۆچكرنا ئێزدیان بۆ دەرڤەی وەلاتی دەستپێكر و هەتا نۆكە ژی بەردەوامە.
فاروق شێخ فەخری،بەرپرسێ راگەهاندنا نڤیسینگەها لالش ل كۆمەلگەها بابیرێ بۆ مالپەرێ(ئێزدیخان نیوز)راگەهاند:"پتر ژ نێڤا خەلكێ بابیرێ چووینە دەرڤەی وەلاتی و نیڤ ژی مایە،پشتی كۆمەلگەه هاتیە رزگاركرن سەر دەستێ هێزێن پێشمەرگەی ژ دەستێن تیرۆرستێن داعشێ و ئارامی ب گشتی ل دەڤەرێ پەیدابوویی زۆرینەیا خەلكێ وێ ئەوێن ئاوارەبووین زڤرینە سەر مال و حالێ خۆ و ئاڤەدانكرنێ لێ دەستپێكریە و ژیان ئاسایی یە".
هادی دوبانی،رێڤەبەرێ رێڤەبەرییا كاروبارێن ئێزدیان ل پارێزگەها دهۆكێ،ل رێككەفتی 28ئادارا 2017ێ،د داخویانیەكێ دا بۆ كەنالێ رووداو راگەهاند:"كو كۆچبەرییا ئێزدیان یا بەردەوامە و خەلك بەرەف دەرڤەی وەلاتی دچن و هەرچەندە ئامارەكا راست و دروست ل بەر دەست نینە،چنكو ئەڤ كارە بەردەوامە و ل دووڤ پێشبینیێن مە باوەرن هەتا ڤێگاڤێ پتر ژ 70هەزار ئێزدی بەرەف دەرڤەی وەلاتی چووینە".
پرانیا ئێزدیێن كۆچبەربووین قەستا وەلاتێ ئەلمانیا كرینە و ل وێدەرێ ژیانا خۆ دبەنە سەری.
تعليقات