ئێك ژهەلكەفتێن پیرۆزێن ئایينێ ئێزدیا توافە/پارێزەر:سالار فائز
ئێك ژ هەلكەفتێن پیرۆزێن ئایينێ ئێزدیا توافە
پارێزەر/سالار فائز
تواف پشتی جەژنا سەرێ سالێ دەستپێدكەن ، پەیڤا (تواف) ئانكو زیارەت بوون ل نیشانگەهێن خاس و چاكێن ئێزدیا و گەلەك ژێدەرێن ئاینی دیاردكەن كو ئەڤە جەژنەكا گرێدانا وێ ب سروشتی ڤەیە و دەربرینێ ژ دوو وێنا دكەت ئێك رەشبینە وەك غەمباریەك ب نەمانا كەسكاتیێ و بەرەڤ هاڤینێ ڤە و بەلێ وینێ دووێ وینەكێ گەشبینە ئەوژی بدەستڤە ئینانا بەرهەمێن چاندنێ وەك گەنم و جەه ... هتد ، وبەرماین وان ئاقارا دێ بۆ پەز و مەر و مالاتی مینن.
مانا وێ ب گشتی سامان و سەروەتی بخوڤە دگرت ، هەروەسا د ڤێ رۆژێدا ئێزدی هیڤی و خێر و دوعایا دكەن كو سالا بێت یا خێر و بەرەكەتێ بیت وبەرهەمێ وان بێتە پاراستن ژ دیارۆكێن سروشتی یێن زەرەرمەند وەكی برق و بروسیا و لەهیا یان بەرفا...هتد ، هەروەسا گەلەك ژێدەر دیاردكەن كو گێرانا جەژنا و هەلكەفتا ل میسۆپۆتامیا جهەكی بلند ل ژیانا وان دا هەبوو وەك سەركەفتن ل شەرە و شكاندنا دوژمنی یان سالەكا پر دەخل و دان و خێر و بەرەكەت ئاهنگ دگێران ل بەر پەرستگەها وەكی ئاهەنگ گێران ب ئەكیتۆ .
ڤێجا ئێزدیاتی بخوە ئاینەكی كەڤنار یێ دەڤەرا میسۆپۆتامیایە وەكی وان ئاهەنگا ئیرۆ رۆژ ئێزدی بۆ خێر و بەرەكەتێ دگێرن ، ئەڤ تواف سالێ جارەكێ دئێنە گێران و جیاوازیا توافێ ژ جەژن و هەلكەفتێن دی یێن ئێزدیا ئەوە كو هەر گوندەكی یان باژێرەكی توافا خوە یا تایبەت هەیە و چێدبت توافا دوو گوندا یان پتر ل ئێك رۆژێدا بت وەكی توافا شێخ مەند ل خانكێ و كەرەجال ل شاریا .
چێدبت ئیك گوندی پتر ژ ئێك توافێ هەبت وەكی توافا مەلكێ مێران و توافا شێخ مەند ل باشیكێ .
ل ڤێ رۆژێدا گەلەك رێ و رسم تێنە گێران وەكی خەلكێ گوندی سەردانا گۆرستانا گوندی دكەن و خێر و خێرات و خوارنا بەلاڤدكەن ب سەر رێبار و هەژارا دا .
د ئاینێ ئێزدیا دا پتریا رێ و رسما ب زەلامێن ئاینی دئێنە گێران وەكی سەما و قەنتارێ ...هتد لەورا ل توافێ ژی خلمەتكارێن ئاقد و نیشانگەهێن خاسا چرایا ڤێدخن (چقلتو) ژبەر پیرۆزیا ئاگری ل دەڤ ئێزدیا و بۆ نە هێلانا گیانێن خراب ل ژوورێن خاس و چاكا و هەروەسا خلمەتكارێن نیشانگەهێن قووبا وی نیشانێ پارچە قوماشی ب سەرێ قووبێ ڤە دگهۆرن ب ئێكە نوو ن ، لێ مەرەم ژ گێرانا ڤێ جەژنێ ئەوە كو خەلك دڤێ رۆژێدا دیاردكەن كو ئەو دبەردەوامن ل سەر بیروباوەرێن خوە و درژدن سەر ئاینێ خوە و درازی نە ب ۆل و ئەركانێن خوە ، هندەك توافا هندەك رێ و رسمێن تایبەت دئێنە گێران وەكی توافا پێغەمبەرێ (نوح) ل خەتارێ ل ئالیێ باكووری خەتارێ نزیكی ناوچەكێ دبێژنێ حادور ل گەل دەركەفتنا تیرێژكێن رۆژێ سروودا ئاینی یا (شازێ ئێزی دئێتە گۆتن) پاشی خەلكێ گوندی سەردانا نیشانگەها نوح پێغەمبەر دكەن و ل وێدەرێ هندەك خوارنێت تایبەت ێت ئاینی دخۆن دبێژنێ (سمات) و پاشی هندەك ئامیرێت مۆزیكێ یت فولكلۆری تێنە لیدان وەكی دهۆل و زرنا ، ل هندەك جهێن ئێزدیا هندەك رێ و رسم دئێنە گێران و خوارنێن تایبەت دئێنە جێكرن ل باشیك و بەحزانێ وەك نمونە ئەڤ رێ و رسم بەردەوام دبن هەتا هێڤاری رۆژ دچتە ئاڤا .
و ئەڤ توافنە وەكی زنجیرەكێ دەستپێدكەن ئێك ل پێ ئێكێ یە ، و توافا ئێكێ یا شەخسێ باتێ یە ل بابیرێ ، و دوماهیك تواف یا شێخ مەندە ل جدالێ و شیخ حەسەن ل قەسەركێ ، ئەو گوندێ توافا وی هندەك خزم و كەس و كارێت خوە ژ گوندێن دی داخوازدكەن كو بەشداریێ ل رێ و رسمێن توافا گوندێ وان بكەن ، گەلەك جاری برایێت بسرمان و مەسیح ژی بەشداریێ ل ڤێ هەلكەفتا ئێزدیا دا دكەن لەورا هەر مالەك خۆ بەرهەڤ دكەت بۆ پێشوازیا میهڤانان و ل ڤێ رۆژێدا دبیژنە مێڤانان ( توافیكەر )وجل وبەرگێن جوان دكەنە بەر خوە ، هەروەسا هەموو تەخ و چین ڤێ هەلكەفتێ دگێرن هەتا زارۆك ژی دچنە جهێن دلڤەكەر ل وی گوندی و گەلەك یاری تینە گوندان بتر ژوان دخۆمالی نە و دەستپێكینە ، هەروەسا گەلەك جۆرێن شرینیا ژی و دبتە كەیف و خۆشی ، كور و كچ سەرەدانا نیشانگەها گوندی دكەن و ل وێدەرێ دهۆل و زرنا لێدەن ، دیسا وەكی هەموو هەلكەفتا ئەڤە رۆژا پێكهاتن و لێبۆرینایە ، و ئێك ژ وان هەرە كارێن پیرۆز ل ڤێ جەژنێ گهۆرینا پارچێن قوماشی نە كو ب سەرێ قوبێڤە برێكا خلمەتكارێن نیشانگەهێ .
ئەڤ هەلكەفتە هەرسال دئێتە گێران لێ ب مخابنی ڤە ل گەلەك جێهن ئێزدیا شەرە وەكی چەند گوندێن شنگالێ ، و ئیسال دێ ل باشیك و بەحزانێ ئێتە گێران و ل گەلەك جهێن ئێزدیا ئیسال بەردەوام وا تێتە گێران وەكی هەرسال لبن هیمەت وسایا پێشمەرگەهێ قارەمان و خۆراگر و شەرڤانێن ئێزدی.
تواف پشتی جەژنا سەرێ سالێ دەستپێدكەن ، پەیڤا (تواف) ئانكو زیارەت بوون ل نیشانگەهێن خاس و چاكێن ئێزدیا و گەلەك ژێدەرێن ئاینی دیاردكەن كو ئەڤە جەژنەكا گرێدانا وێ ب سروشتی ڤەیە و دەربرینێ ژ دوو وێنا دكەت ئێك رەشبینە وەك غەمباریەك ب نەمانا كەسكاتیێ و بەرەڤ هاڤینێ ڤە و بەلێ وینێ دووێ وینەكێ گەشبینە ئەوژی بدەستڤە ئینانا بەرهەمێن چاندنێ وەك گەنم و جەه ... هتد ، وبەرماین وان ئاقارا دێ بۆ پەز و مەر و مالاتی مینن.
تعليقات