فەرمانگەهێن رەگەزنامه و پاسه‌پورتێن عێراقی دێ ل شنگالێ ئێنە ڤەكرن
ئێزدیخان نیوز:
هەر ئێك ژ بەرێزان"مەحما خەلیل"قایممقامێ شنگالێ و عەمید"ریاز"رێڤەبەرێ رەگەزناما گشتی ل پارێزگەها نەینەوا و "وەیس نایف"سەرۆكێ جڤاتا شنگالێ،سەرەدانا فەرمانگەها رەگەزنامە و بارێ شارستانی كرن بۆ ماوێ سێ رۆژان ل دووڤ ئێك،بۆ دووڤچوون و ب رێڤەچوونا مامەلێن وەلاتیان و سەكنین ل سەر بەربەست و ئاریشان یێن وەلاتی و ستافێ فەرمانگەهێ تووش دبنێ بۆ دیتنا چارەیێن گونجایی.
قایممقامێ قەزا شنگالێ دراگەهاندنەكێ دا دیاركر:"دڤان سەرەدانێن دووڤ ئێك دا، فەرمانگەها رەگەزنامێ رابوویە ب رێڤەچوونا مامەلێن ب سەدان وەلاتیان و دێ بەردەوام بین ل سەر كارێ فەرمانگەهێ هەتا فەرمانگەها رەگەزناما عێراقی ب شێوەیەكی دایمی دئێتە ڤەكرن و دانانا ئەولەویەتێ بۆ رزگاربوویان ژ دەستێ گرۆپێ داعش یێ تیرۆرستی".
مەحما خەلیل ئاشكەراكر كو چەندین پەیوەندیێن گرنگ دگەل وەزارەتا ناڤخۆ و رێڤەبەرێ گشتی یێ رەگەزنامێ ل بەغدایێ كرینە بۆ ڤەكرنا فەرمانگەها رەگەزنامێ ل قەزا شنگالێ كو دەڤەر یا وێرانكریە و خەلكێ قەزایێ نكارت سەرەدانا فەرمانگەهێن رەگەزنامێ ل تللەعفەر و مووسلێ بكەن ژ بەر ئالیێ ئێمناهیێ و دەروونی.
دسەرەدانێ دا رێڤەبەرێ گشتی یێ رەگەزنامێ سۆزدا فەرمانگەها رەگەزناما عێراقی ل شنگالێ بێتە ڤەكرن و فەرمانگەها پاسه‌پورتان ل پاشەرۆژێ دا بێتە ڤەكرن.
هەروەسا قایممقامێ شنگالێ سۆزدا هەموو پێكۆلێن خۆ بێختە كار ژبۆ خزمەتكرنا وەلاتیێن قەزایێ و دابینكرنا خزمەتكارییان.
تعليقات