شێخ شامۆ: ب ره‌زامه‌ندی و پشته‌ڤانیا رێزدار مه‌سرور بارزانی بنگه‌هێ لالش وێ ب گیانه‌كی گه‌رمتر وچالاكتر كار وخه‌باتا خوه ب دۆمینه
شێخ شامۆ: ب ره‌زامه‌ندی و پشته‌ڤانیا رێزدار مه‌سرور بارزانی بنگه‌هێ لالش وێ ب گیانه‌كی گه‌رمتر وچالاكتر كار وخه‌باتا خوه ب دۆمینه
راگەهاندنا بنگەهێ لالش/دهۆك
سه‌رۆكێ ده‌سته‌یا بلندا بنگه‌هێ لالش یێ ره‌وشه‌نبیری و كۆمه‌لایه‌تی ل دهۆكێ راگه‌هاند، بنگه‌هێ لالش ب ره‌زامه‌ندی و پشته‌ڤانیا رێزدار مه‌سرور بارزانی سه‌رۆكوه‌زیرێن حكومه‌تا هه‌رێما كوردستانێ دێ درێژیێ ب كار و خزمه‌تا خوه بده ،وه‌ك سازییه‌كا تایبه‌تمه‌ند و رۆله‌كێ گرنگ دپاراستنا ئێزدیناسیێ و ره‌وشه‌نبیریا كوردی دا ب گشتی گێرایی.
ئیرۆ رۆژا پێنج شه‌مبوویێ 25ی شووباتا 2021ێ شێخ شامۆ، سه‌رۆكێ ده‌سته‌یا بلندا بنگه‌هێ لالش یێ ره‌وشه‌نبیری و كۆمه‌لایه‌تی ل دهۆكێ د كۆمبونه‌كا ئاسایی دا لگه‌ل ئه‌ندامێن ده‌سته‌یا بلندا بنگه‌هێ لالش و به‌رپرسێن تایی و نڤیسینگه‌هێن لالش كۆمبوو.
د كۆمبوونێ دا سه‌رۆكێ ده‌سته‌یا بلندا بنگه‌هێ لالش رۆناهی دا سه‌ر ره‌وشا ئێزدیا ب گشتی و بنگه‌هێ لالش ب تایبه‌تی و دیاركر كو ئه‌ڤه نێزیكی ساله‌كێ یه ژبه‌ر به‌لاڤبوونا ڤایرۆسێ كۆرۆنایێ وره‌وشا دارایی ل هه‌رێما كوردستانێ كارتێكرن ل هه‌می سێكته‌رێن ژیانێ بوویه و چالاكیێن بنگه‌هێ لالش لگۆر ڤی بارودۆخی دبه‌رده‌وام بوون و سوپاسیا هه‌موو تایی و نڤیسینگه‌هان كر ژبه‌ر رۆلێ وان یێ گرنگ دناڤا جڤاكێ ئێزدیان دا.
دته‌وه‌ره‌كێ دی یێ كۆمبوونێ دا سه‌رۆكێ بنگه‌هێ لالش ژ ئاماده‌بوویان خواست ب گیانه‌كی گه‌رمتر و خورت تر ده‌ست ب ئه‌نجام دانا بزاڤ و چالاكیان بكن،لێ لگۆر رێنمایێن خۆپارێزیێ یێن حكوومه‌تا هه‌رێما كوردستانێ و وه‌زاره‌تا ساخله‌میێ.
هه‌ر دكۆمبوونێ دا سه‌رۆكێ بنگه‌هێ لالش كو هه‌ڤده‌م راوێژكارێ سه‌رۆكێ حكوومه‌تا هه‌رێما كوردستانێ یه بۆ كاروبارێن ئێزدیا دیاركر،حكوومه‌تا كوردستانێ هه‌رده‌م پشته‌ڤانیا ئێزدیان و بنگه‌هێ لالش كریه و جه‌نابێ سه‌رۆكێ حكوومه‌تا هه‌رێمێ كاك مه‌سرور بارزانی دێ به‌رده‌وام بت لسه‌ر ڤێ پشته‌ڤانیێ.
ژلایه‌كێ دی ڤه پشتی دانوستاندنێ لسه‌ر چه‌ندین بابه‌ت و ته‌وه‌ران ده‌سته‌یا بلندا بنگه‌هێ لالش ب هه‌می تایی و نڤیسینگه‌هێن خوه‌ڤه سوپاسی وپێزانینێن خوه ئاراسته‌ی جه‌نابێ سه‌رۆكوه‌زیران رێزدار كاك مه‌سرور بارزانی ژبۆ پشته‌ڤانی یا وان ل كار و خه‌باتا بنگه‌هێ لالش وخه‌مخۆریا جه‌نابێ وان بۆ گشت جڤاكا ئێزدی.
تعليقات