ژ ترسا لافاوان ئاواره نكارن بنڤن
باسنيوز:
هاتنا بارانێن زۆر د ماوێ دوو رۆژێن بۆرى دا، ترس ل ده‌ڤ ئاواره‌یێن 22 كه‌مپێن پارێزگه‌ها دهۆكێ په‌یداكریه و ژ ڤێ ترسێ دترسن ب شه‌ڤێ بنڤن.
ئه‌كره‌م ره‌شۆ، ئاكنجیێ كه‌مپا ئیسیان سه‌ر ب قه‌زا شێخان ڤه، بۆ (باسنیوز) دیار كر، ل ده‌مێ ئاگه‌هداریێن كه‌ش و هه‌واى ل دور په‌یدابوونا لافاوا دهێنه راگه‌هاندن، ترسه‌كا مه‌زن ل جه‌م ئاواره‌یێن كه‌مپان په‌یدا دبیت، ب تایبه‌ت ئه‌و ئاواره‌یێن د بن خیڤه‌تان دا دژین و جاده‌یێن وان ئاخ، ئه‌و ئاواره‌یێن ل بن كابینه‌یان دا دژین ره‌وشا وان پیچه‌كێ باشتره و گۆت: ئه‌م ب شه‌ڤ هه‌موویێ نه‌وێرین بنڤین و مه چاڤ ل پاراستنا خێزانا خوه‌یه.
ئاماژه ب وێ یه‌كێ ژى كر كو ل شه‌ڤێن بارانێ بۆ هه‌موو كه‌سان وه‌كو بێهنڤه‌دانێ لێ دهێت، ب تنێ بۆ ئاواره‌یان نه‌بیت كو ئه‌م دكه‌ڤینه د حاله‌تێ ئاماده‌باشیێ و مه‌ترسیێ دا.
ئه‌یاد عه‌جاج، ژ راگه‌هاندنا بۆردێ كارۆبارێن مرۆڤایه‌تى ل پارێزگه‌ها دهۆكێ، بۆ (باسنیوز) دیار كر، ل پتریا كه‌مپان ل ده‌مێ باران بارینێ و مه‌ترسیا لافاوان ئاماده‌باشى و به‌رهه‌ڤى دهێنه كرن بۆ به‌رسینگكرتن و پاراستنا ئاكنجیێن هه‌موو كه‌مپان و خیڤه‌تێن هه‌موو ئاواره‌یان دهێنه مۆكرمكرن به‌رى كو وه‌رزێ زڤستانێ ل سه‌ر وان دا بهێت و گۆت: سیسته‌مێ دانانا كه‌مپێن ئاواره‌یان و خیڤه‌تان وان ب شێوه‌یه‌كێ باش هاتینه دانان و مه‌ترسیا لافاوان و زیانڤێكه‌فتن ل سه‌ر وان یا كێمه.
ئه‌یاد عه‌جاج ئه‌و یه‌ك ژى نه ڤه‌شارت كو ماوێ ده‌ستپێكا زڤستانا ئه‌ڤ ساله ب تنێ زیانێن مه‌زن ب كه‌مپێن ئاواره‌یان كه‌فتن ل كه‌مپا شێخان بووینه و نێزیكى 30 خیڤه‌تێن كه‌مپا شێخان یێن ئاواره‌یێن كوردێن ئێزدى بن ئاڤ بوون و ئاڤ چوویه د ناڤ كه‌ل و په‌لێن وان دا و ژ ناڤ چووینه و به‌رى زڤستان ده‌ستپێ بكه‌ت، 432 خیڤه‌تێن نوو ل سه‌ر ئاكنجیێن كه‌مپا خانكێ هاتینه دابه‌شكرن.
پشتى به‌رى دوو شه‌ڤان 30 خێزانێن كه‌مپا شێخان تووشى لافاوان بووین و خیڤه‌تێن وان بن ئاڤ بووین و كه‌ل و په‌لێن وان ژ ناڤچووین، 2018 تیمێن ده‌زگه‌هێ خێرخوازى یێ بارزانى گه‌هشتنه كه‌مپا شێخان و قه‌ره‌بوویا وان هه‌ر 30 خێزانان كر ئه‌وێن به‌رى دوو شه‌ڤان ژ به‌ر هاتنا بارانێن زۆر ل كه‌مپا شێخان تووشى لافاوان بووین و قه‌ره‌بوویا وان كرن.
تعليقات