بنگەهێ لالش: پالدانا ئێزدیان بۆ هەڤڕكیێن هەرێمایەتی ڕەتدكەین و داخوازێ ژ پێشمەرگەیان دكەین ژێریا شنگالێ ئازادبكەن

بنگەهێ لالش:پالدانا ئێزدیان بۆ هەڤڕكیێن هەرێمایەتی ڕەتدكەین و داخوازێ ژ پێشمەرگەیان دكەین ژێریا شنگالێ ئازادبكەن

ب گرنگیەكا مەزن چاڤدێریا پێشڤەچوونا روودان و كریارێن لەشكەری یێن نهۆ تێنە كرن ل دەوروبەرێ ژێریا شنگالا بریندار ژلایێ هێزێن حەشدا شەعبی دژی چەتەیێن داعشا تیرورست . 

ئەم ب گرنگی بەرێ خوە ددنێ كو هێزێن حەشدا شەعبی خوە دووركەت ژ چوونا ناڤ گوند و كۆمەلگەهێن ئێزدیان ئەوێن دكەڤنە ژێریا شنگالێ ، كو وی ئەركی بۆ هێزێن پێشمەرگەی و هێزێن فەرماندا شنگالێ . ئەوا تێتە روودان ل ژێریا شنگالێ نە شەرەكێ نافخۆیی یە یان ژی هەڤركیەكا سادەیە ل سەر دەڤەرێن ئاسایی ، بەلكو ئەو شەرەكێ هەرێمایەتی قورسە ل پشت وێ دا ڤیانێن هەرێمایەتی یێن خوەدی ئەجیندا و بەرژەوەندیێن خوە هەنە ب تایبەتی شنگال گرێدای خالا پێكڤەگرێدان و گرێیا گەهاندنێن گرنگە باژێرو دەڤەرا پێكڤە گرێدەت ژبەر ڤێ چەندێ پێشبركێن هەرێمایەتی یێن گەرم هەنە ژبۆ ب دەستڤەئینانا جهێ لنگەكی تێدا یان ل دەوروبەرێن وێ ژبۆ ئارمانجێن ژمە نائێنە ڤەشارتن .

دووپات دكەین نە دبەرژەوەندیا كوردێن ئێزدی دایە ب هیچ رەنگەكی پالدانا وان بۆ هەر شەرەكێ هلگرێ رەهەندێن هەرێمایەتی ، هەبوونا ژمارەكا هێزان ل سەر عەردێ ل دەوروبەرێن شنگالێ زڤراندنا خەلكێ مە بۆ دەڤەرێن وان دێ گیروكەت ، بەلكو ئەڤ چەندە وێ واتایێ دگەهینت دئێنە بێ بەهركرن ژ زڤراندنێ بۆ سالێن درێژ یان هەتا هەتایێ ، چنكو هەڤركیا هەرێمایەتی هاتییە ئاشكراكرن پێدڤی ناكەت خوە ڤەشێرن ل پشت ماسكەكی داكو ئەجیندا و ئارمانجێن خوە ڤەشێرن . 

رژدیێ دكەن كو ئێزدی نەكەڤنە دناڤ هەڤركیەكا مەزهەبی و هەرێمایەتی دا ، و داخوازێ ژ هێزێن پێشمەرگەی دكەین لەزێ بكەن ژبۆ ئازادكرنا گوندو كۆمەلگەهێن ئێزدیان ل ژێریا شنگالێ و گرتنا عەردێ وان ژبەر دووركرنا ئێزدیان ژ ئاریشەیێن چاڤەرێكری و مەزن چێدبیت بهێنە روودان ب ئەگەرا هەڤركیێن ئیرادەیا دناڤبەرا یاریكەرێن هەرێمایەتی . كو هەلویستێ سەرۆكاتیا هەرێما كوردستانێ و سەركردایەتیێن لەشكەری یێن هێزێن پێشمەرگەی بەرەف نەرازیبوونێ ژبۆ هاتنا هەر هێزەكێ بۆ كۆمەلگەهێن ئێزدیان ل ژێریا شنگالێ ژلایێ گرۆپێن حەشدا شەعبی گرۆڤەیە ژ ژیرمەندی و خەمخۆریێ ل سەر خەلكێ مە و پاشەرۆژا وان ، ئەم پشتگێریا ڤان ئاراستەیا دكەین ب شێوەیەكی رەها و هۆشداریێ ددەین ژبۆ هەر تێكدانەكا رێكەفتنێن هاینە كرن دناڤبەرا بەغدا و هەولێرێ ل دۆر دەڤەرێن ناكۆكی ل سەر هەین یێن تا نهۆ هندەك ماین ل بن كنترۆلا چەتیێن تیرورستێن داعش . 

و ل هەمان وەختدا داخوازێ ژ جهێن پەیوەندیدار دكەین ل حكوومەتا هەرێما كوردستانێ بۆبەرهەڤكرنا ستافێن خۆ یێن تەكنیكی ل بیاڤێ گۆڕێن ب كۆم ژبۆ ئامادەباشی و ڤەدیتنا گۆڕێن ب كۆم ئەوێن چیدبیت كو ل دەڤەرێن ژێریا شنگالێ هەبن بۆ پاراستنا وان و دیاركرنا قوربانیێن وێ وجەردكرنا هژمارێت وان ، ژبەركو ئەم چاڤەرێ دكن ب دەهان ژ وان گۆڕا یێن كو تەرمێن ب سەدان خەلكێ مە تێدا بهێنە دیتن ، و كاركرن ل سەر ئەرشیفكرنا وان هژمارا ژبۆ پالپشتیا بادەكا تاوانا جینۆسایدێ (كوشتنا ب كۆم )یا كو هاتییە ئەنجامدان ژلایێ چەتەیێن تیرورستێن داعش دژی خەلكێ مە ل تەباخا ئۆغستۆس ل سالا ۲٠۱٤.

دەستەكا بلندا بنگەهێ لالش یێ رەوشەنبێری و كۆمەلایەتی /دهۆك
۱۷_٥_۲٠۱۷_________