بنگەهێ لالش پیرۆزباهیێ ل ئێزدیان دكت ب هەلكەفتا جەژنا سەرێ سالا ئێزدیا
داخواز دكت ریفراندۆم ژدەڤەرێن ئێزدیا بگرت ل دۆر چارەنڤیسێ گەلێ كوردستانێ
ب هەلكەفتا جەژنا سەرێ سالا ئێزدیا(سەرێ سال_چارشەمبوویا سۆر)،ب ناڤێ تەڤایا ئەندام و كارمەندێن دەستەیا بلندا بنگەهێ لالش و تایی و نڤیسینگەهان،گەرمترین و جوانترین پیرۆزباهیان پێشكێشی تەڤایا ئێزدیان دكەین ل هەرێما كوردستانێ و عێراقێ و جیهانێ، هیڤیا جەژنێن خۆش و ژیانەكا پڕ تەناهی ئارامی و خۆشی بۆ دخوازین. و ب ڤێ هەلكەفتا ئازیز ئاماژێ ددەینە لڤینا فەرمی ومللی ل هەرێما كوردستانێ ئەوا رێ هانددەت بەرەف ئەنجامدانا ریفراندۆما چارەنڤیسی و دیرۆكی ل دۆر چارەنڤیسێ گەلێ كوردستانێ،وئەم پیرۆزهیا ڤان پێنگاڤان دكەین و پشتەڤانیا تەمام لێ دكەین، ژبەركو دیاركرنا چارەنڤیسی مافەكێ سروشتی یێ گەلانە لپێ بەلگەنامە و پەیمانێن نێڤ دەولەتی،ئەم وەكو كوردێن ئێزدی دووپات دكەین ترسا مە یە ڕەوایە دڤی دەربارەی دا ،وژێدەرێ ترسێن مە ژی گرێدایی گۆتنا مژاوییا دەربارەی پشكداریكرنا ئاكنجیێن دەڤەرێن ئێزدیا یێن گرێدایی مادا 140ژ دەستوورێ فیدرالیێ عێراقێ ل ڤێ ریفراندۆمێ،ئانكو دۆرێن 90%ژ دەڤەرێن ئێزدیا دەنگێ وان نامینت ژڤێ ریفراندۆما دیرۆكی،پاشی دێ زۆرینەیا ئێزدیا ژ دەربرینا بۆچۆنا وان بێ بەهر بن كو بگەهنە وەلاتێ دەیك كوردستانێ،ژبەركو زانینا بۆچۆنا خەلكێ مە ل وان دەڤەرا وەك بجهئینانا ئێك ژ بەندێن مادا 140ژ دەستوورێ ئتیحادی یە،و چوو سەرپێچییەكا یاسایی و دەستووری نینە،و ئەم دبینن شنگال یا بریندارە ل جهێ وێ یێ ستراتیجی كێمتر نینە ژ باژێرێ كەركووكێ ودەردۆران و ب ڤێ چەندێ پشكداریكرنا خەلكێ شنگال و باشیك و بەحزانێ دڤێ ریفراندۆمێ دا دبتە كارەكێ فەر،زێدەباری كو سەربەخۆیی بت ئەو رێزگرتنە بۆ گیانێ جانگۆریێن كوردستانێ ژ دەمێ دەستپێكرنا بزاڤێن رزگاریخوازا كوردستانی، پشكداریكرنا ئێزدیا دڤێ ریفراندۆمێ دا ئەو رێزگرتنە بۆ گیانێ جانگۆریێن ئێزدی ژ سڤیلان و پێشمەرگەیان ئەوێن گیانێ خۆ كرینە قوربانی بۆ بەرڤانیكرنێ ژ ئەرد و دیرۆكاكوردستانێ و ئەو رێزگرتنە بۆ سەدان خێزانێن ئێزدی یێن هاتینە ئەنفالكرن ل سەر دەستێ رژێما بەرێ وەك پشكەكە بۆ بەرسڤدانێ بۆ قوربانیێن مە ئەوێن رێكخراوا داعش یا تیرۆرستی كوشتین و ئێخسیركرین ل دەمێ دەست ب سەر شنگالێ دا گرتی ل ئابا 2014ێ،پشكداریا ئێزدیا دریفراندۆما لبەرە بێتە كرن ئەو كارەكێ پێتڤی و چارنڤیسی یە بۆ مە كو ئەم پشكەكێ ساخ و رەسەنین ژ گەلێ كوردستانێ،ل داویێ دووپات دكن ل سەر رێزگرتن و رێزلێناما مە بۆ قوربانیدانا هێزێن پێشمەرگەیێ قارەمان ئەوا زۆرینەیا دەڤەرێن ئێزدیا رزگاركرین،ئاماژێ ددەینە گەل وسەركردایەتیا كوردستانێ بۆ پێشوازیكرنا دۆرێن 400هەزار ئاوارێن ئێزدی ژ دەمێ دوو سال و هەشت هەیڤان را،دهەمان دەم دا داخواز دكەین دەڤەرێن مایین ل باشوورێ قەزا شنگالێ بێنە رزگاركرن ولەز بێتە كرن بۆ دووبارە گەهاندنا خزمەتكاریان بۆ دەڤەرێن رزگاركری،دگەل بانگەوازیا مە یا بەردەوام بۆ مەزاختنا پێكۆلان بۆ ئازادكرنا ئێخسیر و گرتیێن مە ژ دەستێن گرۆپێ داعش یێ تیرۆرستی،هیڤیدارین ب جەژنا سەرێ سالا ئێزدیان یا داهاتی ئاهەنگا بگێرین كو ئالایێ كوردستانێ ل سەر دەولەتا كوردستانێ ژ زاخۆ هەتا شنگال و كەركووكێ و خانەقین یێ بلندكری بت.
ئازادی بۆ كوردستانا باب..سەركەفتن بۆ هێزێن پێشمەرگەیێ قارەمان،و روحا جانگۆرییان شاد بت و روو رەشی بۆ داعشێن تیرۆرست.
دەستەیا بلندا بنگەهێ لالش یێ رەوشەنبیری و كۆمەلایەتی/دهۆك
17نیسانا 2017
تعليقات