بارزانى: رێ ناده‌ین چو ئالى خوه بسه‌ر ئێزدییان دا بسه‌پینن
WAAR-دهۆک:
سه‌رۆكێ هه‌رێما كوردستانێ، جه‌ژنا چارشه‌مبا سوور یا كوردێن ئێزدی پیرۆز كر و راگه‌هاند؛ رێ ناهێته دان چو ئالی خوه بسه‌ر ئێزدییان دا بسه‌پینن و بریاردان و چاره‌نڤیسێ ئێزدییان، تنێ د ده‌ستێ وان بخوه دایه.
مه‌سعوود بارزانی سه‌رۆكێ هه‌رێما كوردستانێ، په‌یامه‌كا پیرۆزباهییێ ب هه‌لكه‌فتا سه‌رێ سالا ئێزیدی و جه‌ژنا چارشه‌مبا سوور به‌لاڤكر و پشتی پیرۆزباهییان، تێدا دیاركر، كوردێن ئێزدی پشكه‌كا ئه‌زیز و نه‌ڤه‌قه‌تیایا گه‌لێ كوردستانێ یه و ب درێژاهییا دیرۆكێ، ژبه‌ر ناسنامه‌یا ئۆلی و نه‌ته‌وه‌یی، تووشی كاره‌ساتێن مه‌زن بووینه، لێ پابه‌ندبوونا وان ب ناسنامه‌یا كوردایه‌تییێ و ئاینێ وان، هه‌موو پیلانێن دژ هاتینه ژناڤبرن.
بارزانی دا زانین كو ب خوینا پێشمه‌رگه‌ی، تیرۆرستێن داعشێ هاتنه شكاندن و داعشێ باجا تاوانێن خوه دا و سه‌ڕێ وان كه‌فته بن پێن ئێزدییان و نابیت ب چو ره‌نگان رێ ب چو كاره‌ساتێن دی ل دژی ئێزدییان بهێته دان.
سه‌رۆكێ هه‌رێما كوردستانێ دوپاتكرییه، گه‌لێ كوردستانێ پشته‌ڤانێ ئێزدییانه و رێ ناهێته دان چو ئالی خوه بسه‌ر ئێزدییان دا بسه‌پینن و بریاردان و چاره‌نڤیسێ ئێزدییان، تنێ د ده‌ستێ وان بخوه دایه.
تعليقات