ئێزدییان هزردكوشتنا دوژمنێن خودا نه‌كرینه،چاوا دێ هزر دكوشتنا كچێن خۆدا كه‌ن/شيمال خه‌مۆ
ئێزدییان هزردكوشتنا دوژمنێن خودا نه‌كرینه،چاوا دێ هزر دكوشتنا كچێن خۆدا كه‌ن!
شيمال خه‌مۆ
كاره‌ساتا شنگال نه‌حه‌وجی پێناسه‌كرنێ یه، كه‌سێن دوور و نێزیك هه‌موو هورگلیێن كاره‌ساتێ دزانن،له‌وما نه پێدڤیه كه‌س ببته شیره‌تكارێ كه‌سه‌كی لسه‌ر دورستكرنا فلمه‌كی یا دیكومێنه‌كێ لسه‌ر ئه‌ڤێ كاره‌ساتێ.
یێ به‌روڤاژی رودان و كارڤه‌دانێن ئه‌ڤێ كاره‌ساتێ كاربكه‌ت دێ مه‌زنتر گونه‌هێ د ده‌رحه‌قێ ئێزدییان ئێخته ستوێ خۆ. ئه‌وا دفلمێ ره‌شه‌بادا هاتیه دیتن به‌روڤاژی ئه‌وان نه‌ریت و شێوازێ پێشوازیكرنێ یه یێن ل جه‌م ئێزدییان هه‌ین. بێژنه من گه‌لو كه‌نگی جڤاكا ئێزدی بابێ كچه‌كێ مجبوركریه هزر دكوشتنا كچا خۆدا بكه‌ت، باوه‌ربكه‌ن كه‌سی ئه‌ڤ دل و وێره‌كیه نینه. دجڤاكا ئێزدییان كه‌سی ئه‌و دله نینه ئاخفتنێن نه‌خۆش بێژته كچه‌كه رزگاربوی ژ ده‌ستێ داعش،ژبه‌ركو هه‌موو ئێزدی ئه‌وێ كچێ ب شه‌ره‌ف و ناموسا خو دزانن، سه‌رۆك بارزانی ژی دووپاتی لسه‌ر ئه‌ڤێ یه‌كێ كریه، لێ ته‌عنه دان ب كچێ پتر د دیمه‌نه‌كی دا دئێته دیتن. من ب خۆ گۆمان لسه‌ر دلپاكی و گه‌وهه‌رێ "حسێن حسن" نینه لێ د فلمێ "ره‌شه‌با" ئه‌ڤ خه‌له‌تیێن زه‌ق و زه‌ق د یاربوون، من نه‌ڤێت ستافێ فلمی به‌ره‌ڤانیێ ژ خه‌لتیێ بكه‌ن ب هێجه‌تا وێ كو كچ نائێته كوشتن، نه‌گرنگه كا كچ بێته كوشتن یا نه ْ خه‌له‌تیا مه‌زن هزرا كوشتنا كچێ پێشوازیكرنا كرێتا خه‌لكی ل ئه‌وێ كچێ كو ب هه‌موو ڤه به‌روڤاژی راستیێ یه.
كورد ب گشتی و ئێزدی ب تایبه‌تی جڤاكه‌كێ میانه‌ره‌و و ئاشتی خوازه ،گه‌لو ئێزدییان هزر دتولڤه‌كرن و كوشتنا دوژمنێن خودا نه‌كرینه ئه‌ڤجا چاوا دێ هزر دكوشتنا كچێن خودا كه‌ن، ژبه‌ركو ئه‌م مرۆڤان وه‌كو مرۆڤ دبینن نه‌ك وه‌كو تشته‌كێ دن.
له‌وما داخوازێ دكه‌ین چاره‌یه‌كێ ل ئه‌ڤی فلمی بێته كرن، جڤاكا ئێزدی و ستافێ فلمی بگه‌هنه ل هه‌ڤ هاتنه‌كێ، ژبه‌ركو ناڤه‌رۆكا ئه‌ڤی فلمی دێ خاله‌كه ره‌ش ئێخته كه‌لتورێ كوردی ب گشتی و ئێزدییان ب تایبه‌تی، ئه‌م دێ خۆ ب ده‌ستێ خۆ دناڤ جڤاكا ناڤده‌وله‌تی و سینه‌ماكاریدا روو ره‌ش شه‌رمه‌زاركه‌ین.
شيمال خه‌مۆ
