ئێزدی هێشتا گەشبین نەبووینە كارەساتا شنگالێ ب جینۆساید بێتە ناساندن
ئێزدیخان نیوز:سەلام سەبری
دوو سال ب سەر كارەساتا ئێزدیان بۆرین و هێشتا ئێزدیان چ پەیامێن گەشبین هەتا سەر ئاستێ نێڤ دەولەتی نە دیتینە،كو ئەڤا ب سەرێ ئێزدیان هاتی بێتە ناساندن وەك جینۆسایدكرن، بەرپرسەكێ بنگەهێ لالش داخواز دكەت ل سەرانسەری كوردستانێ و جیهانێ یادا كارەساتێ ل 3/8/2016بێتە ساخكرن.
عەنتەر كەلۆ،بەرپرسێ بنگەهێ لالش تایێ خانكێ بۆ(ئێزدیخان نیوز) دیاركر:ئەڤە دووسال ل سەر كارەساتا شنگالێ بۆرین ومللەتێ مە هێشتا چ پەیامێن گەشبین هەتا سەر ئاستێ نێڤ دەولەتی نە دیتینە كو ئەڤا ب سەرێ ئێزدیان هاتی بێتە ناساندن وەك جینۆسایدكرن،ئەڤ كارەساتا ب سەرێ مە هاتی بەرپەرەكێ رەشە دمێژوویا مرۆڤایەتیێ دا ل سەر ئاستێ جیهانێ و هێشتا كارەسات یا بەردەوامە،چنكو هێشتا چ تشت سەر روویێ ئەردی نە هاتییە كرن و نۆكە گەلەك كەس هەنە كاردكەن سەر جینۆسایدا ئێزدیان،بەلێ ب شێوەكێ وەسان هێشتا چ دیارنەبوویە.
كەلۆ زێدەتر گۆت:خەلكێ مە چاڤەرێ نە تشتەك بۆ وان بێتە كرن و بێ هیڤی نەبن و خەلك بزانن ئەڤ پێكهاتە ل عێراقێ و كوردستانێ دژیت و تووشی كارەساتەكا مەزن بوویە و جیهانێ هەموویێ ب چاڤێ خۆ دیتن كۆمكوژیا بكۆم ل شنگالێ هاتە ئەنجامدان،دخوازین ببتە جینۆساید و مافێ مە نێتە ونداكرن،ژبەركو جیهان مە ب چاڤێ خۆ دبینت وخواست ژی مادی و مەعنەوی خەلكێ شنگال بێتە قەرەبووكرن.
ناڤهاتی ئەو ژی ئاشكەراكر:دبەرێ دا كوردێن ئێزدی تووشی 73فەرمانا بووینە و فەرمان نە تشتەكێ كێمە كو مافێ وان بێتە ونداكرن،دخوازین فەرمانا ڤێ داویێ ببتە جینۆساید و مافێ ئێزدیان ب دەنێ كو چ كارەساتێن دی ب سەر نەئێن.
بەرپرسێ بنگەهێ لالش دووپاتكر:تشتەكێ نۆرمال نینە ل ڤی سەردەمی مللەتەكێ كێم ل جیهانێ و كچ و ژنێن ئێزدیان هاتنە فرۆتن ل بازارا و دخوازم ل سەرانسەری كوردستانێ و جیهانێ و خەلكێ مە یێن ل وەلاتێن جودا رۆژا یادا كارەساتا ئێزدیان ل 3/8/2016 ساخ بكەن ،كو هەموو كێم نەتەوە تێدا بەشداربن،ژبەر ڤان تاوانێن دژی مرۆڤاتیێ یێ تێنە ئەنجامدان، مەرەم ژساخكرنا ڤێ رۆژێ ئەوە وەكو هشیاركرنا جیهانێ وبیرئینان كا چ ب سەرێ مللەتێ كوردا ب گشتی هاتییە وتایبەتی ئێزدی وەكو پێكهاتەكێ بچووك ل عێراقێ.
هەروەسا ئاماژەكر:نۆكە 90% خەلكێ شنگالێ ئاوارەنە و دبن خیڤەتان و كاڤلان د ژیان خۆ دبەنە سەری.
