ب هه‌لكه‌فتا بيره‌وه‌ريا بۆرينا 23سالان ژ خه‌بات و خزمه‌تا بنگه‌هێ لالش و ڤێخستنا شه‌مالكا 24ساليێ،گه‌رمترين پيرۆزباهيان ئاراسته‌ى ته‌ڤيا بنگه‌ه و نڤيسينگه‌ه و ئه‌ندام و كاردێن وه و كوردێن ئێزدى ب گشتى دكه‌ين.
دگه‌ل هه‌موو ئالۆزى و ئاسته‌نگێن دكه‌تنه پێشيا ڤى بنگه‌هيدا،لێ ب هه‌ولدان و مانديبوونا ره‌وشه‌نبير و ئه‌كاديمى و خه‌مخۆرێن كولتۆر و جڤاكا ئێزديان،بنگه‌هێ لالش خۆ راگرت،به‌رده‌وام پێشكه‌فت و وه‌كى ده‌زگايه‌كي نه‌ته‌وه‌يى،ئاينى،ره‌وشه‌نبيرى و جڤاكى دناڤا سازيێن هه‌رێما كوردستانێ دا،جهه‌كێ هێژا گرت.
حكوومه‌تاهه‌رێما كوردستانێ ب ئه‌ركێ خۆ زانيه كو پشته‌ڤانيا كار و خه‌باتا بنگه‌هێ لالش بكه‌ت داكو بكارت باشتر خزمه‌تا تايبه‌تمه‌ندييا ئێزديان بكه‌ن،جينۆسايدا ده‌ڤه‌را شنگالێ و ئه‌و زوولم و سته‌م ژى يا كو تيرۆرستێن داعش ل ئێزديان كرى،مه هان دده‌ت كو زێده‌تر خزمه‌تا جڤاك و سازيێن ئێزديان بكه‌ين داكو ب باشترين شێوه و ب ئارامى ل سه‌ر ئاخا خۆ و نێزيكى په‌رستگه‌ه و پيرۆرزيێن خۆ ل كوردستانێ،ژيان و كار و خه‌باتێن خۆ ب دۆمينن.
ديسان وه پشت راست دكه‌ين كوهه‌ولدانێن مه دبه‌رده‌وامن ژبۆ كه‌يسا جينۆسايد ناساندنا كاره‌ساتا شنگالێ ل سه‌ر ئاستێ نێڤ ده‌وله‌تى،هه‌روه‌سا رۆلێ بنگه‌هێ لالش پشتى روودانا كاره‌ساتێ ژبۆ خزمه‌تكرنا لێقه‌ومييان و هه‌لوێستا وى يا به‌ره‌ڤانيكرنێ ژ ئاخ و ئايين و جڤاكا كوردێن ئێزدى،ب رێز و بلند دنرخينين. دووباره سالڤه‌گه‌را دامه‌زراندنا بنگه‌هێ لالش پيرۆز دكه‌ين و هيڤيا به‌رده‌وامى و پێشڤه‌چۆنێ بۆ كار و خه‌باتا وه دخوازين.
