كچا كوردا ئێزدى(ناديا مراد) رزگاربوويا ژ ده‌ستێ داعشێ سه‌ره‌راى وان كاودانێن تێرا ده‌ربازبوويى و ب مانديبوون و هه‌ولێن خۆ كارى ده‌نگێ ژنا كورد ب گشتى و ژنا ئێزدى ب تايبه‌تى بگه‌هينته جيهانێ،لسه‌ر وێ زولم و زۆرداريا تووش دبتێ ل چه‌رخێ بيست و ئێكێ،بگره ژ كوشتن و ره‌ڤاندن و كرين و فرۆتن و ده‌ست درێژيێ،ئه‌ڤ كارێ كچا ئێزدى كرى ل سه‌ر ئاستێ جيهانێ ده‌نگ ڤه و ل ناڤ ئێزديان كارڤه‌دانێن جودا جودا بۆ په‌سنا رۆلێ وێ په‌يدابوون،ل ڤێده‌رێ پێدڤيه ژ ته‌ڤ لايه‌كى ڤه پشته‌ڤانيا وێ بێته كرن و حكوومه‌تا عێراقێ ل سه‌ر بابه‌تێ ره‌ڤانديێن ئێزدى بێته ده‌نگ،ئه‌رێ هه‌تا كه‌نگى دێ يا بێده‌نگ بتن.
ده‌مێ تيرۆرستێن داعشێ هێرشێ ده‌ڤه‌را شنگالێ كرى ب هه‌زاران كچ و ژن و زارۆك و گه‌نج و زه‌لام و پير و كال يێن كوردێن ئێزدى گرتن و ب سه‌دان گه‌نج و زه‌لام كوشتن،هێش ب هه‌زاران ره‌ڤانديێن ئێزدى دده‌ستێ ڤان كافران دانه و يێ كرين و فرۆتنێ ل بازارێن مووسلێ و ره‌قه‌يا سوريێ پێ دكه‌ن،بێ كو هه‌وله‌كا ب جدى ژ لايێ جڤاكێ نێڤ ده‌وله‌تى و حكوومه‌تا عێراقێ يا كو هه‌تا نۆكه بێ ده‌نگ مايى بۆ رزگاكرنا وان بێته كرن،هه‌روه‌سا حكوومه‌تا هه‌رێما كوردستانێ و چه‌ند كه‌سايه‌تى و خێرخوازێن ئێزديان ب هه‌ولێن خۆ كارين پترى دوو هه‌زار ره‌ڤاندييان رزگار بكه‌ن،يێن ماين ژى كو ل دووڤ ئاماران ژمارا وان پترى سێ هه‌زار ره‌ڤانديانه يێ ژ تاوانێن داعشێ دنالن و چاڤه‌رێ نه بێنه رزگاركرن، ديسان ژ پێخه‌مه‌ت ئازادكرنا وان كچا ئێزدى ناديا مراد پشتى لسه‌ر ئازارێن ئێزديان و ب تايبه‌ت ئازارێن كچ و ژنێن ئێزدى يێن ژلايێ تيرۆرستێن داعشێ ڤه هاتينه ره‌ڤاندن،ده‌مێ ل رونشتنا جڤاتا ئاسايشا نێڤ ده‌وله‌تى ل دۆر بازرگانيكرن ب مرۆڤان ل ده‌مێ ململانێيان ئاخفتى چه‌ند ئاماده‌بوويى گرين،وى ده‌مى ووژدانا جيهانێ هه‌ژيا ده‌مێ زانين چ يا ب سه‌رێ ئێزديان دئێتن.
ڤێ كچا ئێزدى به‌رده‌وامى دا سه‌ره‌دانێن خۆ هه‌تا كو جيهان ب هانه‌يا ئێزديان بێتن،ب تايبه‌تى ژى ده‌مێ سه‌ره‌دانا وه‌لاتێ مسرێ كرى كو ئه‌و منبه‌رێ ئيسلامێ يه و چاڤ ب سه‌رۆك كۆمارێ وى وه‌لاتى و شێخ ئه‌لئه‌زهه‌ر و ئيمامێ مه‌زنێ مسرێ كه‌فتى ئه‌و پينگاڤه‌كا هه‌رى مه‌زن بوو كو وه‌لاتێن ئه‌ره‌بى و جيهانا ئيسلامى ئيدانا كريار و تاوانێن داعشێ بكه‌ن ل دژى ئێزديان،هه‌روه‌سا سه‌ره‌دانا وێ بۆ وه‌لاتێ يونانێ و چاڤ كه‌فتنا وێ ب سه‌رۆكێ كۆمارێ وى وه‌لاتى ژى گرنگيا خۆ هه‌بوو ده‌مێ داخواز ژێكرى هه‌ولا رزگاركرنا ره‌ڤانديێن ئێزدى بكه‌ن،پشته‌ڤانيا سه‌رۆكى ژى ده‌مێ بۆ را دووپاتكرى كو دێ پشته‌ڤانێ ئێزديان بت و دێ ده‌نگێ ئێزديان بت ل ئه‌وروپا،ئه‌ڤ سه‌ره‌دان دێ بنه پالداره‌كى گرنگ كو جڤاكێ نێڤ ده‌وله‌تى و حكوومه‌تا عێراقێ هانبده‌ن كار بۆ رزگاركرنا ره‌ڤانديێن ئێزدى بكه‌ن.
ئه‌ڤ كچا ئێزدى لسه‌ر گه‌هاندنا ده‌نگێ ره‌ڤانديان و نامه‌يا ئێزديخانێ بۆ جيهانێ يا به‌رده‌وامه و ئه‌وا ل سه‌ر ملێن خۆ كر،يا دى ژى لسه‌رهه‌موو ئێزديان فه‌ره پشته‌ڤانيا ڤێ كچێ بكه‌ن و ژهه‌موو لايان ڤه هاريكاريا وێ بكه‌ن دابه‌رده‌واميێ بده‌ته ڤى كارێ خۆ يێ پيرۆز.
