بنگه‌هێ لالش هۆشداريێ دده‌ت
_هۆشداريێ دده‌ين ژپيلانێن ده‌ره‌كى بۆ پارچه‌كرنا جڤاكێ ئێزدى
ب هه‌لكه‌فتا هاتنا جه‌ژنا رۆژيێن ئێزى،ده‌سته‌يا بلندا بنگه‌هێ لالش يێ ره‌وشه‌نبيرى و كۆمه‌لايه‌تى گه‌رمترين و جوانترين پيرۆزباهيان ئاراسته‌ى هه‌موو ئێزديان ل هه‌رێما كوردستانێ و عێراقێ و جيهانێ دكت،هيڤيخوازن رۆژيێن وه قه‌بوول بن و جه‌ژنه‌كا خۆش و رۆژێن وه پر شادى و خۆشى بن.
و بڤێ هه‌لكه‌فتا دلخۆشكه‌ر،و دگه‌ل ڤهگهريانا سكته‌رێن ژيانێ بۆ هنده‌ك ده‌ڤه‌رێن شنگالا ئازيز و خۆشتڤى،داخوازێ ژ لايه‌نێن تايبه‌تمه‌ند دكه‌ين بزاڤێن زێده‌تر بێخنه كار ژبۆ زامنكرنا ڤهگهريانا ب هه‌زاران خێزانێن ئاوارێن شنگال ل كه‌مپێن هه‌رێما كوردستانێ، ب رێيا دووركرنا چه‌كێ د ده‌ستێ گرۆپێن ژ ده‌رڤه‌ى سنوورێ عێراقێ ل سه‌رتاسه‌رى قه‌زا شنگال و ده‌ڤه‌رێن نێزيك دا، و كاركرن ژبۆ بجهئينانا رێككه‌فتنا تايبه‌ت يا شنگالێ دناڤبه‌را حكومه‌تێن هه‌ولێروبه‌غدايێ دا.
ئه‌م هۆشداريێ دده‌ين ژ مه‌ترسيێن پيلانێن ده‌ره‌كى بۆ بتر ژێكڤه‌كرن و پارچه‌كرنا جڤاكێ ئێزدى ژبۆ ب ده‌ستڤه‌ئينانا ئارمانجێن خۆ كو نه دبه‌رژه‌وه‌ندا ئێزديان و جڤاكێن ده‌ردۆرێن ئێزديا دايه.
ئه‌م جه‌خت و ته‌كه‌زێ ل داخوازيێن خه‌لكێ خۆ دكه‌ين بۆ ئه‌نجام دانا پێكۆل و شيانێن زێده‌تر ژبۆ دووڤچۆن و ده‌سته‌سه‌ركرنا چه‌كدارێن داعش يێن تيرۆرى و هه‌ر ئێكى هاريكاريا وان كرى، و يا گرنگ ل كاره‌ساتێ دا هێرشا هۆڤانه‌يا بۆ سه‌ر شنگال و خه‌لكێ مه كوشتن و سه‌ربرين و كه‌نيزه و ده‌ستدرێژى كره سه‌ر.
جڤاكێ ئێزدى پێتڤى ب پێكۆلێن نافخۆى يێن زێده‌تره ژبۆ سارێژكرنا وێ زه‌ره‌را كور يا پێكه‌فتى و ڤهگهريانا ژيانێ هێدى هێدى بۆ ده‌ڤه‌رێن مه و ده‌ستپێكرنا لاپه‌ره‌كێ نوو ژبۆ نفشێ داهاتى.
جه‌ژنا وه هه‌ر سال ب خێر و خۆشى به
ده‌سته‌يا بلندا بنگه‌هێ لالش يێ ره‌وشه‌نبيرى و كۆمه‌لايه‌تى/دهۆك
17ى كانوونا ئێكێ 2020
تعليقات