سه‌رۆکێ هه‌رێما کوردستانێ پیرۆزباهیێ ل میرێ ئێزدیێن جیهانێ دکه‌ت
باسنيوز:
به بۆنه‌ی ده‌ستنیشانکردنی میری نوێی ئێزدییانی جیهان، نێچیرڤان بارزانی سه‌رۆکی هه‌رێمی کوردستان، له په‌یامێکدا پیرۆزبایی له میر حازم ته‌حسین به‌گ، میری ئێزدییان کردووە.
سەرۆکی هەرێمی کوردستان لە پەیامەکەیدا کە وێنەیەکیشی بۆ (باسنیوز) نێردراوە، جەختی کردووەتەوە: "وەک هەمیشە هەموو لایەک هەوڵ دەدەین بە هەر شێوازێک بێت، پشتیوانی و هاوکاری خوشک و برا ئێزدییەکانی خۆمان بین".
دەقی پەیامەکە:
ڕێزدار مير حازم ته‌حسين به‌گ،
ميرێ ئێزدييان
سلاڤ و ڕێز..
ب هه‌لكه‌فتنا ده‌ستنيشانكرنا هه‌وه وه‌ك ميرێ ئێزدييان، ب گه‌رمى پيرۆزباهيێ ل هه‌وه و هه‌مى ئێزدييان دكه‌م، هيڤييا سه‌ركه‌فتنێ د ئه‌رك و به‌رپرسيارييا هه‌وه‌يا نوودا بۆ هه‌وه دخوازم.
هوين د ده‌مه‌كێده ڤێ ئه‌رك و به‌رپرسيارييا مه‌زن هه‌لدگرن كو هێشتا هه‌ژماره‌كا مه‌زنا خوشك و برايێن مه يێن ئێزدى د كه‌مپێن ئاواره‌ييێدا دژين و نكارن ڤه‌گه‌رنه سه‌ر جهـ و وارێن خۆ. ئه‌رك و به‌رپرسيارييا هه‌وه يا گرانه و ئه‌م هه‌موو پێكڤه هه‌وجه‌ى هه‌ڤكارييا هه‌ڤدونه داكو بكارين هنده‌كێ ژ بارێ گرانێ ئێزدييان سڤك بكه‌ين.
هه‌وه پشتڕاست دكه‌م كو وه‌ك هه‌رده‌م ئه‌م دێ هه‌موو هه‌ولا ده‌ين داكو ب هه‌ر ئاوايه‌كێ بكارين پشته‌ڤان بين و هاريكارييا خوشك و برايێن خۆ يێن ئێزدى بكه‌ين. هندى ئێزدييه‌ك ب تنێ ژى ل هه‌ر ده‌ره‌كێ ڕه‌ڤاندى مابيت، چ پێويسته ئه‌م دێ كه‌ين بۆ ڤه‌گه‌ڕاندنا وان، هه‌روه‌سا دێ هه‌موو هه‌ولا ده‌ين بۆ ئاڤه‌دانكرن و ڤه‌گه‌ڕاندنا ژيانێ بۆ ده‌ڤه‌رێن ئێزدييان داكو بكارن ب سه‌رفرازى ڤه‌گه‌ڕنه سه‌ر جهـ و وارێن خۆ.
جاره‌كا دى ژى هه‌وه‌يێن ڕێزدار و هه‌موو خوشك و برايێن ئێزدى و پێكهاتێن ئۆلى و نه‌ته‌وه‌يى پشتڕاست دكه‌ين كو هه‌رێما كوردستان دێ هه‌ر مينيت وارێ پێكڤه‌ژيانێ، پڕڕه‌نگيێ، ئاشتيێ و هه‌ڤدوقه‌بوولكرنێ بۆ هه‌موويان.
دووباره ميراتييا هه‌وه پيرۆز بيت، هه‌ر سه‌ركه‌فتى بن.
نێچيرڤان بارزانى
سه‌رۆكێ هه‌رێما كوردستانێ
27/7/2019
تعليقات