بنگەهێ لالش داخوازا ئاشكه‌راكرنا ناسنامەیا 50 كچێن ئێزدى ل باغۆزێ دكه‌ت
باسنيوز:
سەرۆكێ دەستەیا بلندا بنگەهێ لالش یێ رەوشەنبیری و كۆمەلایەتی ل دهۆكێ دیاركر:" پێدڤیە هەموو سازیێن مافێن مرۆڤی و دەولەتێن جیهانێ پشتەڤانیا مە بكەن بۆ ئاشكراكرنا ناسنامەیا كچێن ل باغۆز هاتینە كوشتن. ئەم دووپات دكەین هێشتا چارەنڤیسێ 2 ھزار و 750 گرتیێن ئێزدی دیارنینە. هەر كەسەكی دەست بسەرداگرتن وكوشتنا خەلكێ مەدا هەبیت بهێتە سزادان".
شێخ شامۆ، سەرۆكێ دەستەیا بلندا بنگەهێ لالش یێ رەوشەنبیری و كۆمەلایەتی ل دهۆكێ بۆ (باسنیوز) دیار كر: "ب دوو دلی ڤە دوڤچوونا دەنگوباس وراپورتێن سەرژێكرنا 50 گرتیێن ئێزدی ل دەڤەرا باغۆز دكەین. نهۆ ئەم نەشێن ڤی دەنگوباسەكی وەها دووپات بكەین. ئەم دوور نابینن كو تیرۆرستێن داعش تاوانەكا وەسا یا درندە ئەنجام بدەن چونكو تیرۆرستان بەری نۆكە ژی ل شنگال چەندین تاوانێن مەزن یێن كوشتنێ ،زێدەباری دەستدرێژیا گیانی و جەستەی لسەر هەزارەها ژن وزەلامێن ئێزدیان كریە د ماوێ چار سال ونیڤێن بۆرێدا، نها ژی تاوانێن تیرۆرستێن داعش بەرامبەر ئێزدیان بەردەوامن".
خویا ژی كر: "بانگەوازیا مە بۆ حكومەتا هەرێما كوردستانێ هەماهەنگیێ لگەل حكومەتا ناڤەندی بكەت ل سەر ئاستێ بلند ژ بۆ دوڤچوونا تاوانا ل باغۆز هاتیە ئەنجامدان وناڤ ونیشانێن هەموو قوربانیان ئاشكرا بكەن وتیرۆرستێن ئەڤ تاوانە ئەنجامداین بهێنە دەستەسەركرن".
تعليقات