رزگاربوويه‌كا ئێزدى دبته‌ باليۆزا رێكخراوا جیهانى یا مافێن مرۆڤى

دهۆک-KDP.info-

 ژنەکا کوردا ئیزیدى یارزگاربوویا ژ دەستێ تیرۆرستێن داعشێ ب هاریکاریا نڤیسینگەها رزگارکرنا رەڤێندراوێن کوردێن ئیزیدى ل دهۆکێ دبیتە سەفیرا رێکخراوا جیهانیا مافى مرۆڤ.

ب هەلکەفتا 70 سالیا راگەهاندنا جیهانیا مافى مرۆڤ یا ژلایێ کومەلا گشتى یا نەتەوەیێن ئێکگرتى ل پاریس لرێکەفتى 10 دیسمبەرا 1948ێ، ب بریارا ژمارا 217 و 27 بەندا پێکهاتى، رۆژا جیهانییا مافى مرۆڤ ل پارێزگەها دهۆک هاتە ساخکرن.

خالد مەحموود، سەرۆکێ رێکخراوا مافێن مرۆڤ یانیڤدەولەتى بو مالپەرێ فەرمیێ پارتى دیموکراتى کوردستان گۆت:" ل رۆژا جیهانیا مافى مروڤدا ژنەکا ئیزیدى ژ دەستێ تیرۆرستێن داعشێ رزگار بوویى ژلایێ رێکخراوا مافى مرۆڤ بوو سەفیرا ئاشتیێ و چەندین بەندێن مافێن مرۆڤ و دیرۆکا وێ هاتنە بەحسکرن".

سەرۆکێ رێکخراوا مافێن مرۆڤ یانیڤدەولەتى خویاکر:" لەیلا تەعلو ئەو ژنا کوردا ئیزیدى ب هەمى وێرەکى ڤە شیایى ژ دەستێ تیرۆرستێن داعشێ رزگار ببیت، بوویە سەفیرا ئاشتیێ ل رێکخراوا جیهانیا مافى مرۆڤ و باجا ئەندامەتیێ پێهاتیەدان، داکو ببیتە بەرەڤانەک ژ مافێن مرۆڤى و سەرکەفتنا زولم لیکریا لسەر رویێ ئەردى".

لەیلا تەعلو، رزگاربوویا ژ دەستێ تیرۆرستێن داعشێ  بو مالپەرێ فەرمیێ پارتى دیموکراتى کوردستان ئاخفت:" مافى مرۆڤ لسەر ئاستێ جیهانێ نینە، بتنێ ماف دروشمەکە دئێتە بکار ئینان بۆ هندەک مەرەمان، سەرارایى هندێ ژ دل سۆپاسیا خەلکێ هەرێما کوردستانێ و ب تایبەت خەلکێ پارێزگەها دهۆکێ دکەم کۆ وان ب هەمى رەنگان هاریکاریا مە کریە هەر ژ دەمێ ئاوارەبوونێ تا نوکە و بتنێ ڤى خەلکى مافێ مرۆڤى پاراستیە".

لەیلا تەعلو، ئەو ژنا خودان دوو زارۆک لرێکەفتى 3/8/2014ێ، ل قەزا شنگال کەفتبوو دەستێ تیرۆرستێن داعشێ دگەل 19 کەسان ژ خیزانا وێ، تا نوکە 9 کەس ژ مالباتا وێ هاتینە رزگارکرن بەلێ هەڤژینێ وێ ب ناڤێ مەروان خەلیل تا نوکە ددەستێ داعشێ دایە و جارەنڤیسێ وى دیار نینە، لەیلا تەغلو لرێکەفتى 9/4/2017ێ دگەل هەر دوو زارۆکێن خۆ (سالار و سارا) ب هاریکاریا نڤیسینگەها رەفێندراوێن کوردێن ئیزیدى ل دهۆکێ هاتە رزگارکرن.