سه‌ربه‌ست تروانشی: ناسناما شنگالێ ب پیلانێن دوژمنان نائێته گهورین
راگه‌هاندنا لقێ ئێك:
ب مه‌ره‌ما هایدار بوون ل سه‌ر ره‌وشا ده‌ڤه‌را شنگال و خه‌لك و ئاواره‌یێن وێ، ئه‌ڤرو سپێدێ رێكه‌فتی ( 13/12/2017)، سه‌ربه‌ست تروانشی به‌رپرسێ لقێ ئێك،سه‌ره‌دانا لقێ (17) ی پارتی كر.
د هه‌ڤدیتنه‌كێ دا دگه‌ل كارگێریا لقێ هه‌ڤده یێ پارتی ل شنگال، سه‌ربه‌ست تروانشی ل ده‌ستپێكا هه‌ڤدیتنێ، ئاماژه كره سه‌ر خه‌بات و ماندیبونا شه‌هیدێ سه‌ركرده (وه‌حید باكوزی) به‌رپرسێ لقێ ناڤبری د بزاڤا رزگاریخوازا ملله‌تێ كورد دا، نه‌خاسمه رولێ شه‌هیدی د شه‌رێ ڤێ داویێ دا به‌رامبه‌ر له‌شكه‌رێ عێراقێ و حه‌شدا شه‌عبی دا.
پاشان سه‌ربه‌ست تروانشی د سه‌ره‌دانا خودا دیاركر، شنگال ب مێژوو و كه‌لتور و ناسناما خو ئاخا كوردی یه و پروسا ریفراندومێ ئه‌ڤ چه‌نده سه‌لماند، و ب چ هێرش و پیلانه‌كا دوژمنان ناهێته برین ژ ئاخا هه‌رێما كوردستانێ.
د ته‌وه‌ره‌كێ دیدا، به‌رپرسێ لقێ و كارگێریا لقێ هه‌ڤده، به‌حس ل سه‌ر ره‌وشا ژین و ژیارا خه‌لكێ ده‌ڤه‌را شنگال كر پشتی هێرشێن تیرورستێن داعش و حه‌شدا شه‌عبی بو سه‌ر شنگالێ و ئاواره‌بونا خه‌لكێ وێ.
هه‌روه‌سان هه‌دروو لا په‌سنا رولێ حكومه‌تا هه‌رێما كوردستانێ كرن د حه‌واندن و هاریكاریكرنا ئاواران دا و ته‌كه‌زی ل سه‌ر گه‌هاندنا خزمه‌تگوزاری و پێتڤیێن ژیانێ كرن بو كوردێن ئاواره بوین.
دیڤدا، هه‌ردوو لا هه‌ماهه‌نگی و په‌یوه‌ندیێن دوو قولی دناڤبه‌را لقێ ئێك و هه‌ڤده دا ب گرنگی دانه زانین بو بهێزكرنا كارێ پارتایه‌تی و خزمه‌تكرنا خه‌لكێ سنورێن هه‌ردوو لقان.
تعليقات