هێزێن ئەمنیێن عیراقێ دوو ژنێن ئێزدی ژ دەستێ داعشێ ل ئالیێ رۆژئاڤایێ موسلێ رزگارکرن
ئێن ئارتى
هێزێن بەرسڤدانا بلەز ئەڤرۆ ١٨ێ ئەیارا ٢٠١٧، شیان دوو ژنێن ئێزدی ل ئالیێ رۆژئاڤا ( راستێ) یێ موسلێ کو دبن دەستێ داعشێ دابوون رزگار بکەن.
نوچەگەهانێ ئێن ئاڕ تی عەرەبیە ژ زارێ ژێدەرەکێ ئەمنی راگەهاند، ئەڤرۆ پێنجشەمبی هێزێن بەرسڤدانا بلەز ل تاخێ ١٧ێ تەموزێ شیان دوو ژنێن ئێزدی ژ دەستێ چەکدارێن داعشێ رزگار بکەن .
هەروەسا ئاماژە ب وێ ئێکێ کر کو هێزێن بەرسڤدانا بلەز ل وی تاخی چار چەکدارێن داعشێ کوشتن و دوو چەکدارێن دی ژی دەستەسەرکرن.
تاخێ ١٧ێ تەمووزێ دکەفیتە ئالیێ رۆژئاڤا ( راستێ) یێ باژێرێ موسلێ و نها شەر دناڤبەرا هێزێن عێراقی و چەکدارێن داعشێ ل وی تاخی بەردەوامە ژبۆی کۆنترۆلکرنا وێ ب تمامی.
ئەڤە د دەمەکی دایە دهەیاما رابهوری ژی دا چەندین ژن و زارۆکێن ئێزدی ژ دەستێ چەکدارێن داعشێ هاتنە رزگارکرن، ل مەها رابهوری پتر ژ ٣٥ ئافرەت و زارۆکێن ئیزدی ژ دەستێ داعشێ هاتنە رزگارکرن، هەروەسا بەری دوو رۆژان ژی زارۆکەکا ئێزدی ژ دەستێ داعشێ هاتە رزگارکرن کو تەمەنێ وێ دوو سال بوو دەمێ کەتیە دەستێ چەکدارێن داعشێ .
ل مەها نیسانا رابهوری ژی نێڤسینگەها رەڤاندیێن دەستێ داعش ل دهۆکێ راگەهاندبوو کو هەیا نها پتر ژ ٢ هزار و ٩٥٩ وەلاتیێن ئێزدی ژ دەستێ چەکدارێن داعش هاتنە رزگارکرن و نێزیکی ٣ هزار کەسان ژی د دەستێ چەکدارێن داعش دا مانە و چارەنڤیسێ وان دیار نینە.
چەکدارێن داعشێ ل ٣ێ ئابا ٢٠١٤ێ هێرش کرنە سەر شنگالێ و کۆنترولکرن، د هێرشا چەکدارێن داعش بۆ سەر شنگالێ زێدەتر ژ ٥ هزار وەلاتیێن ئێزدی هاتن کوشتن و زێدەتر ژ ٥ هزار وەلاتیێن ئێزدی ژی هاتنە رەڤاندن کو پرانیا وان ژن و و کچ و زارۆک بوون و زێدەتر ژ ٤٠٠ هزار ئێزدی ژی ئاوارەبوون.
رێکەتی ١٣ێ تشرینا دووەما ٢٠١٥ێ ژی هێزێن پیشمەرگە و یەپەگێ و یەپەژێ و ب پشتەڤانیا فرۆکێن هەڤپەیمانان باژێرێ شنگالێ ژدەستێ چەکدارێن داعشێ کۆنترولکرن.
قەزایا شنگال سەر ب پارێزگەها نەینەوایە و ١٤٠ کیلۆمەتران ژ ناڤەندا باژێرێ موسلێ دویرە.
تعليقات