بنگەهێ لالش :شنگال زێدەتر خوە ل بەر دەردەسەریا ناگرت و دڤێت پەکەکە شنگالێ چۆل بکەت
بنگەهێ لالش :شنگال زێدەتر خوە ل بەر دەردەسەریا ناگرت و دڤێت پەکەکە شنگالێ چۆل بکەت
ل پێشیێ ئاماژێ ددەنە بەیانناما ڕیزدارێن هیژا ل جڤاتا ڕۆحانیا ئیزدیا یا بلند یا کو هەڤکوشتن ل شنگالێ حەرام کری ، ئەم پشتەڤانیا خوە ل سەر هەلویستێ وانی ڕوون و ئاشکرا دووپات دکەن ، و ئاماژێ دەنە وێ یەکێ کو شنگال دەڤەرەکا ئستراتیجییە ژبال هەریما کوردستانێ و ب هیچ ڕەنگەکی نابت مەزارگەهێ شەرفەدین ژ پەرستگەها لالشا نوورانی بهیتە ڤەقەتاندن ، مە دڤیت بێژن کو هەر کەسەکی ئەڤ کارە ژبۆ وی مەرەق بە کو گەلەک بەیاننامە دەرکەتن ژ کۆمەلەیێن رەوشەنبیری و کەسایەتیین جڤاکی و بژارە ژ خەلکێ شنگالێ هەمیان داخوازی ل پەکەکێ دکر کو ئەو خوە ژ شنگالێ ڤەکێشن و بزڤڕنە بنگەهێ خوە ل ئالیێ سووریا .
و هەروەسا دووپات دکەین گەلەک جاران سەرکردایەتیا هەریما کوردستانێ دگەل ئالیێن حەکیمانە و خەمخۆرێن ل سەر خوونا کوردستانیەتێ هۆشداری ددا ژ هەبوونا هێزێن پەکەکێ ل دەڤەرێن شنگالێ کو دێ بنە سەدەما پێکدادان و شەڕی ل دەمێ کو هێزێن پەکەکێ خوە شوڕدکرن و ڤالاتیا ئەولەهی و لەشکەری ژ ئەنجامێ هیرشا ڕیکخستیا تیرورستێن داعش بۆ سەر دەڤەرا شنگالێ ل ۳ تەباخا ۲۰۱٤ ژ خوەڕا وەک دەلیڤە دیت . و ئەم وەکو بنگەهێ لالش ،مینا پشکەک ژ پێکهاتەیا ڕەوشەنبیری و ڕاگەهاندنا ئێزدیان ، شنگال وەکو ئیک ژ دیارترین پێگەهێن ئێزدیاتیێ مە گازی و داخوازیێن خوە گەهاندینە هەموو ئالیا کو پێگیریێ ب زمانێ عاقل و دیرۆک و جوگرافیێ بکن ، و مە داخوازی ژ سەرکردایەتیێن پەکەکێ کریە کو بزانن شنگال ئاخا کوردستانێ یە ، و ژبلی خەلکێ وێ کەس نکارە بریارا چارەنڤیسێ وێ بدە ، و هەر کەسەکی خودان وژدان بە نکارە ژبیربکە وێ وانەیا هێزێن پێشمەرگەی بەرجستە کری ل دەمێ هیرشا تیرۆرستێن داعش ل سەر باژێرۆکێ کۆبانێ ل ئالیێ سووریا ، چوونا وان بۆ وێدرێ ب فەرمانا سەرۆک مسعود بارزانی بوو و ب هەڤکاری دگەل سەرکردایەتێن کورد ل ڕۆژئاڤا (کوردستانا سووریا) ڕۆلێ وان یێ بەرچاڤ بوو ل شکاندنا تیرۆرستێن داعش و دەمێ داعش هاتینە دەرێخستن و ڕەوش ئارام بووی هێزێن پێشمەرگەی زڤڕینەڤە وەلاتێ خوە ل هەریما کوردستانێ ، و ئەڤ بادەکە هاتە گرتن و ئیک لاکرن .
بەلێ جهێ داخێ یە کو هێزێن پەکەکێ یێن هاتین بەرسینگا داعشێ گرتین ل دەمێ داگێرکرنا شنگالێ ، پشتی دوو سال و نیڤا ناخوازن بزڤڕنە بنگەهێن خوە ، سەرەڕای وان هەمی داخوازی و گازیێن ناڤخۆیی و هەریمایەتی و نێڤ دەولەتی ، بەلکو پەکەکە گەلەک ڕەفتار ئەنجامدان کو ئاماژێ ددەتە پلانا مانا وان یا هەتا هەتایی ل شنگالێ و یا ب مەترسیتر کو دڤیت و ب کریار ژی دەست پێکریە ل دامەزراندنا کانتۆنا ل شنگالێ و گرێدانا وێ ل گەل هندەک ئەردێن دی ل ئالیێ سووری ،ڕابوویە ب تیکدانا وان هەمی ڕیککەفتنێن نێڤ دەولەتی ل ڤی دەربارەی ، هەروەسا داکۆکیا سەرکردایەتیا هەریما کوردستانێ و ل پێشیا وان سەرۆک بارزانی ل سەر ڕێگرتن ل هلبوونا شەڕێ ناڤخۆی کو کوشتنا یێ کورد ب دەستێ یێ کورد هێلا سوورە نابیت بهیتە دەربازکرن و هێزێن پەکەکێ ئەڤ دەلیڤە بۆ خوە بکارئینا و ڕژدبوون ل سەر مانا خوە ل شنگالێ ب شیوەکی ئەرینی دوور ژ پەندو ژیرمەندیێ ، بەلکو نۆکە ڕێگریێ ل هیزێن پێشمەرگەی دگرن ژ جیبەجیکرنا ئەرکێ وان یێ ئەولەهی و لەشکەری ل شنگالێ و دەورووبەرا ئەو بوو ئەڤ چەندا ئیرۆ ئەم گەهاندینێ ژ شەڕ و هەڤچوونێ یا کو هێزێن پەکەکێ ڤیایی و هەولدای ب هەمی ڕێکان بکەت ژ ئەنجامێ هەڤڕکیا وێ ل سەر ئیرادا جڤاکێ نیڤ دەولەتی و یاسایێن وێ یێن تایبەت ب مایتێکرنا لەشکەری ل ئەردێ وەلاتەکی هەڤسنوور . ئەم هەمی بەرپرسیاریێ ئێخینە د ستوویێ هێزێن پەکەکێ ژ ڕشتنا هەر چبکەکا خوونێ کو ڕژیای ل پێکدادانێن ئیرۆدا ل کومەلگەها خانەسۆرێ یا سەر ب شنگالێ ڤە ، و هەروەسا ئەم بەرپرسیاریا تێکچوونا ڕەوشا نهۆ ژی ئەم تیدا ، چنکو ئەوێ خوە شوڕکر ب شیوەکێ نەژیرمەندانە و هەڤڕکیا هەمیا کر ژ پێخەمەتی جیبەجیکرنا پیلان و پلانێن خوە ژبۆ ڤەقەتاندنا شنگالێ و گڕێدانا وێ دگەل ئالیێ سووریا داکو بکەڤە دبن کنترۆلا پەکەکێ ڤە .
داخوازیێ ژ سەرکردایەتیێن پەکەکێ دکەین پەنایێ ببنە بەر پەندو ژیرمەندیێ ، و دەستا ژ بەرەلایا سیاسی یا بێ مفا بەردن ،و یاریا ب هەستێن خەلکێ مە نەکن و ئێش و ئازارێن وان و ئەو چەندا ژ ئەنجامێ تاوانێن داعش هاتی سەرێ وان بۆ خوە وەک دەلیڤە بکارنەئینن ، و دووپات دکەین کو شنگال نکارە خوە ل بەر دەردسەری و ئێش و ئازارێن زێدەتر بگرت ، کو هەتا نهۆ ب هەزارا ژ خەلکێ مەی هندایە و دیل و گرتییە د دەستێ تیرورستێن داعش دا .
ئاماژێ ددەنە وێ یەکێ کو گەل و حکوومەتا هەریما کوردستانێ نێزیکی ۹۰٪ ژ خەلکێ شنگالێ ئەوێن دناڤ کەمپێن پارێزگەها دهوکێ دا هەمبێزکرینە و هەتا نهۆ ژی هەمبێزدکن ، و یێن دیتر ژی ماینە ل چیایێ شنگالێ و هنارتنا هاریکاریێن خوارنێ وهاوارهاتنێ دهینە ب ڕێکرن ب هەڤکاری دناڤبەرا سەرکردایەتیا هەرێمێ و ڕێکخراوێن نێڤ دەولەتی و مرۆڤایەتی ، پەکەکێ چ پێشکێشکریە بۆ دەڤەرێن شنگالێ ژبلی "داگێرکرنێ" و هەڤڕکیا هەمیا کر و خوە سەرب وی ئەردی دا گرت یێ کو نەیێ وێ ؟؟ و ئەم هوشداریێ ددەنە سەرکردایەتیێن پەکەکێ ژبەر وێ پڕوپاکندا دکەت و دڤیت ڤی شەری هوسا بدەت دیارکرن کو ئەڤ شەڕە دناڤبەرا ئیزدیا و هێزێن پێشمەرگەی دایە ، بەلکو هێزێن پێشمەرگەی دئاستێ بەرگریکرنێ دایە ژ خوە ل همبەر هێرشێن پەکەکێ . خوەڤەشارتنا پەکەکێ ل پشت ناڤێ ئێزدیان ئەم ڕەت دکەین ژبۆ هەولدانا بەرفڕەهکرنا بازنێ هەڤڕکیێ ئەوێ کو پەکەکێ هلکری ل شنگالێ .
دەستەیا بلندا بنگەهێ لالش یێ ڕەوشەنبیری و کۆمەلایەتی ل دهۆک -۳ئادارا ۲۰۱۷
تعليقات