حسێن قائیدى:دوهى دوو زارۆکێن ئێزدى ژ دەستێ داعشێ هاتنە رزگارکرن
ئێن ئارتى
بەرپرسێ نڤیسینگەها رزگارکرنا رەڤاندیان راگەهاند، دوهـ دوو زارۆکێن دن یێن ئیزدی ژ دەستێ داعشێ هاتنە رزگارکرن و ئێک ژ وانان د سەربازگەهێن داعشێ دا مەشق و راهێنان پێ هاتیە کرن.
حسێن قائیدی بەرپرسێ نڤیسینگەها رزگارکرنا رەڤاندیان تایبەت ب ئێن ئاڕ تی راگەهاند، دوهی ١٠ێ ئادارا ٢٠١٧ێ دوو زارۆکێن ئێزدی ژ دەستێ داعشێ هاتنە رزگارکرن و ئێک ژ وانان د سەربازگەهێن داعشێ دا مەشق و راهێنان پێ هاتیە کرن.
ناڤبری ئاماژە ب وێ ئێکێ ژی کر کو ژیێ وان زارۆکان ١٣ ساڵی و ١٥ ساڵی بوون د نها دا ب کەس و کارێن خوە هاتینە شاد کرن.
ئەو چەندە ژی راگەهاند، د نها دا پتر ژ هزار زارۆک د سێ سەربازگەهێن بن عەردی یێن داعشێ دهێنە پەروەردە کرن و مەشق و راهێنانێن فکری و سەربازی پێ دهێنە کرن و هەتا نها ژی ١٥ ژ وانان هاتینە رزگارکرن.
قائیدی گۆت ژی، وان ژ دەستپێکا کارێ خوە ڤە هەتا نها ٢ هزار و ٩٢٠ وەڵاتیێن ئێزدی ژ دەستێ داعشێ رزگارکرینە کو پڕانیا وان زارۆکن و نێزی ٣ هزار و ٥٠٠ وەڵاتی ژی د بن دەستێ داعشێ دا ماینە.
هەروەسا داخواز ژ خەلکێ کوردستانێ کر کو هەر کەسەکی پێزانین هەبن ل سەر وەلاتیێن ئێزدی ئەوێن د دەستێ داعشێ دا ماین پەیوەندیێ ب نڤیسنەگەها وان بکەن.
ژلایێ خوە ڤە ھێزێن یەبەشێ و یەژەشێ راگەهاندن، ئەو ٢ زارۆکێن ئێزدی ژلایێ هێزێن وان ڤە کو چەتەیێن داعشێ د دەما ئێریشێن ل سەر شەنگالێ دە ژ گوندێ کۆچۆ رەڤاندبوون، هاتینە رزگارکرن و ئانینە خانەسۆرێ و تەسلیمی مالباتێن وان کرنە.
چەکدارێن داعشێ ل ١٠ی حوزەیرانا سالا ٢٠١٤ێ باژێرێ موسل کۆنترۆلکرن، پشتی کۆنترۆلکرنا موسل ل ٣ی ئابا ٢٠١٤ێ هێرشکرنە سەر شنگالێ و ئەو قەزا ژی کۆنترۆلکرن، د هێرشا چەکدارێن داعشێ دا بۆ سەر شنگالێ وان چەکداران زێدەتر ژ پێنج هزار وەلاتیێن ئێزدی کۆمکوژ کرن و زێدەتر ژ پێنج هزار وەلاتی ژی ڕەڤاندن کو پڕانیا وان ژن و زارۆکن.
تعليقات