"ئێكەم تیپا شانۆیا ئێزدیان هەتا نۆكە 38شانۆگەری و فلم بەرهەم ئیناینە"
ئێزدیخان نیوز:باسم قاسم شنگالی
تیپا گرعزێر یا هۆنەرێ شانۆیێ ب رێیا شانۆیێ ئێش و ئازارێن ئێزدیان دگەهینتە جهێن پەیوەندیدار ،كار بۆ پێشئێخستنا هۆنەرێ شنگالێ دكەت و چیرۆك وكارەساتێن ب سەرێ ئێزدیان هاتین دكەتە فلم و شانۆگەری،بەرپرسێ تیپێ ژی دبێژت:دخوازین لقێ سەندیكایا هۆنەرمەندێن كوردستانێ ل شنگالێ بێتە ڤەكرن.
تیپا گرعزێر ل سەر ئاستێ ئێزدیان ئێكەم تیپە دڤی هۆنەری دا كار دكەت،كو هەتا نۆكە 19سالێن خەباتێ دەرباز كرینە،دڤان سالان دا كاریە نێزیكی 20 شانۆگەرییا و 18 فلمان بەرهەم بینت.
سالم حسێن،بەرپرسێ تیپا گرعزێر یا هۆنەرێ شانۆیێ بۆ مالپەرێ(ئێزدیخان نیوز)راگەهاند:"مە كاری ب رێیا شانۆیێ ئێش و ئازارێن خەلكێ خۆ بگەهینین خەلكێ بیانی وكارێ مە گەلەك تێنە سەر كەنالێن تلەفزیۆنی و ب ملیۆنەهان خەلك تەماشە دكەت،داوی فلمێ مە كورتە فلمەك بوو نێزیكی 500هەزار كەسا ل سەر فەیسبۆكی تەماشەكر،هەروەسا داوی شانۆگەرییا مە ئەنجامدایی شانۆگەرییا (مالا بێ سەر وبەر بوو) كو گەلەك ب دلێ جەماوەرێ تیپێ بوو،ئەم هەول ددەن بەردەوامبن وكارێن باشتر بكەین،لێ جی نینە و هەر ئەندامەكی تیپێ ل دەڤەرەكێ یە پشتی ئاوارەبوونێ".
ئەو چەندە ژی دیاركر:"ئارمانجا مە ئەوە ئێش و ئازارێن خەلكێ خۆ بگەهیننە جهێن پەیوەندیدار وئەم هۆنەرێ شنگالێ پێش بێخن و ئەم چیرۆك وكارەساتێن مللەتێ خۆ بكەین فلم و شانۆگەری".
گۆتژی ئەم داخواز دكەین لقێ سەندیكایا هۆنەرمەندێن كوردستانێ ل شنگالێ بێتە ڤەكرن،دا ئەم پتر بكارن كاران بۆ خەلكێ خۆ بكەن،هەروەسا دەما شنگال هاتە ئاڤەدانكرن هۆلەكە شانۆگەریێ لێ بێتە ڤەكرن،داكو بكارن كارێن نێڤ دەولەتی تێدا بكەین.
تعليقات