ئەلمانیا دێ‌ پەنابەرێن ئێزدی رەوانەی بۆلگاریا كەت

باسنيۆز:له‌زگين جۆقى
بەرپرسێ‌ پشكا رەوشەنبیری ل بنگەهێ لالش ل ئەلمانیا دیاركر، دەهان گەنجین ئێزدی نۆكە ئەلمانیا مافێ‌ پەنابەری پێ‌ نەهاتیە دان یێن هاتینە رەتكرن. دووڤ پیزانینان ژی حكومەتا ئەلمانیا دێ‌ وان كەسان رەوانەی بۆلگاریا كەت ئەوێن پەنچەمۆرێن وان ل وی وەلاتی هاتینە دیتن.
 
دلشاد سمو جوقی، بەرپرسێ‌ پشكا رەوشەنبیری ل بنگەهێ لالش ل ئەلمانیا بۆ (باسنیوز) دیاركر:"  پشتی حكومەتا ئەلمانیا گوهورێن دقانوونا پەنابەریێ‌ دا كرین گەلەك گەنجێن ئێزدی تووشی ئاستەنگان بووینە بتایبەتی  ژی ئەو كەسێن خدان خێزان، چونكو نەشێن خیزانێن خوە بینن یان ژی دایك وبابێ خوە بیننە ئەلمانیا. رۆژ دووڤ رۆژی هەژمارا وان كەسان یا بەرەڤ زێدەبوونێ دچیت یێن دهێنە رەتكرن ومافێ پەنابەریێ‌ پێ‌ ناهێتە دان تووشی ئاریشەیان دبن".
 
خویا ژی كر" داخازا پەنابەریێ بۆ گەلەک کەسان هاتیە رەتکرن چونكو پەنچەمۆرێن وان ل وەلاتیەكی دَ دەركەڤتینە، بتایبەتی ژی ل بولگاریا. نۆكە ئەلمانیا حازریان دكەت وان كەسان رەوانەی بولگاریا بكەت یێن پەنچەمۆرێن وان ل بولگاریا هاتینە دیتن. گەلەك كەس هەنە دڤی حالی دا".