پێدڤیە ئۆپەراسیۆنێن تایبەت بۆ رزگاركرنا گرتیێن ئێزدی بێنە ئەنجامدان/به‌ختيار قادر

بەختیار قادر

پتری سالەكێ‌ لسەر كارەساتا كوردێن ئێزدی دەربازبوو،هێش ب سەدان كچ و ژن و زارۆكێن ئێزدی ددەستێ‌ تیرۆرستێن داعشێ‌ دانە،كرین و فرۆتن ب ڤان گرتییان یا دئێتە كرن،ددەمەكی دە خێزان و كەس و كارێن وان چاڤەریێ‌ ئازادكرنا وانن،یا پێدڤیە جڤاكێ‌ نێڤ دەولەتی و هەڤپەیمانیا نێڤ دەولەتی و هەموو جیهان پشتەڤانیا حكوومەتا هەرێما كوردستانێ‌ بكەن بۆ ئەنجامدانا ئۆپەراسیۆنێن لەشكەری یێن تایبەت بۆ رزگاركرنا گرتییان،گەلۆ هەتا كەنگی گرتیێن ئێزدی دێ‌ دبن زوولم و زۆردارییا داعشێ‌ دە بن.

تیرۆرستێن داعشێ‌ تاوانێن ل دژی مرۆڤایەتیێ‌ ل دژی گرتیێن كوردێن ئێزدی بكارئیناینە و تووشی زوولم و زۆرداریەكا هەری مەزن بووینە،ژبەركو نەتەوە كوردن و ئایین ئێزدینە،دیسان داعشێ‌ زارۆكێن ئێزدی ل سەربازگەهێن خۆ مەشقداینە و فێرێ‌ كریارێن توندرەوی كرینە،نەرزگاركرنا پارێزگەها مووسلێ‌ ژ ئالیێ‌ حكوومەتا عێراقێ‌ ڤە ژیانا گرتیێن ئێزدی كریە دمەترسیێ‌ دە،ژبەركو نەیا دیارە تیرۆرستێن داعشێ‌ چ ب سەرێ‌ وان گرتییان كربت،چنكو چ هەولێن جدی بۆ رزگاركرنا وان نەهاتینە كرن،ژبلی حكوومەتا هەرێما كوردستانێ‌ چوو ئالیەكی خۆ ل رزگاركرنا ڤان گرتییان نەكریە خودان،سەرەرای وان هەولێن ژلایێ‌ خێرخوازان ڤە هاتینە كرن و هندەك گرتی ئازادكرین،لەوا یا پێدڤیە جڤاكێ‌ نێڤ دەولەتی و هەڤپەیمانیا نێڤ دەولەتی ژ هەموو ئالیان ڤە پشتەڤانیا حكوومەتا هەرێمێ‌ بكەت و چەكێ‌ پێشكەفتی بدەتێ‌ ب تایبەت ژی بۆ هندێ‌ ئەو گرتیێن هەتا نۆكە ددەستێ‌ داعشێ‌ دا ماین رزگار بكەتن،دیسان داخوازێ‌ ژ رێكخراوێن مرۆڤایەتی و مافێ‌ مرۆڤی و خێرخوازی و ئافرەتان و دەزگەهێن راگەهاندنێ‌ دكەم ل ڤی بابەتی بەردەوام بێنە دەنگ و خۆ بێ‌ دەنگ نەكەن و ئازارێن گرتییان نیشا هەموو جیهانێ‌ بدەن دا دهاوارا وان بێن و رزگار بكەن.

ئەو گرتیێن كوردێن ئێزدی یێن هاتینە رزگاركرن تووشی نەخۆشیێن دەروونی بووینە ژبەر وان كارێن نەمرۆڤانە یێن ددەرهەقا وان دە هاتینە ئەنجامدان ژلایێ‌ تیرۆرستان ڤە،هندەك ژ وانا بۆ دەرڤەی وەلاتی ب مەرەما چارەسەریێ‌ هاتینە رەوانەكرن و یێن دی ژی گەلەك ژێ‌ ل كەمپان دە ژیانا خۆ دبەنە سەری،ل ڤێدەرێ‌ پێدڤیە ب شێوەیەك تایبەت هاریكاری و پشتەڤانیا رزگاربوویان ژ هەموو لایان ڤە بێتە كرن دا تێكەلی جڤاكی بن و تێدا بێنە گونجاندن.