سەلام سەبری
بەری هەزارێن سالا هەر ژبەرێ دا ب چەندین كارەسات ونەمان ب سەرێ مللەتێ مە یێ ئێزدی دا هاتینە ،ب هەزاران كوشتی و بریندار ودەربەدر بووینە وزولم وزۆرداری ل ئێزدیان هاتیە كرنە وهەتا ئیرۆ مللەتێ مە خۆ راگرتیە بەر كارەسات و فەرمانا گرتینە و هەردەم ئۆل و ئیمان و ئەركانێ خۆ پارستینە.
جیهان هەموو دزانت مللەتێ مە مللەتەكێ كوردە ویەك ژكەڤنترین مللەتایە و نۆكە ل سەر روویێ ئەردی ول سەر ئۆلا خۆ ماینە،هەردیسان یەك ژوان كارەساتێن ڤی سەردەمی كارەساتا (داعش)بوو ب سەر مللەتێ مەدا ئینای یەك ژ كارەساتێن مەزن بوو،ئەوژی یەك ژ وان پلانا بوو مللەتێ مە ژناڤ بەن و ل دونیایێ وندا بكەن، هەلبەت مە خۆ ل بەر وێ كارەساتێ ژی گرت و ئۆلا خۆ پاراست،بەلێ دبینم حكوومەتا ناڤەندی بێ دەنگ بوویە بەرامبەر شنگال وتنێ دبینم حكوومەتا هەرێمێ ل دەڤەرا شنگالێ بوویە خودان وهاریكاریا ئاوارەیێن وێ كریە،نۆكە پسیارا من ئەوە بۆچی كارەساتەكا دی پەیدابوو یا كۆچبەریێ ؟وڤێ جارێ كارەساتەكا دی بۆ مە پەیدابوو لڤی سەردەمی ئەوژی چۆنا خەلكێ مە بۆ دەرڤەی وەلاتی ب كۆم و وەلاتێ خۆ ب ج دهێلن و گەلەك ژوان خەلكان خودان كارێن باشن و گەلەك خودان هزر و بیرو باوەرن و گەلەك ژوانا خودان باوەرنامە نە و كارێ خۆ دهێلن ،دبینم چۆنا گەلەك ژوان خەلكان ژبەر ترس و قەیرانا دارایی بوویە،هەردیسا زاڤ چۆنا خەلكێ مە یێ چۆین وەك چاڤ ل هەڤكرن وەسا ل خەلكێ هات یێن مای ژی بچن،رۆژانە ل سەرێ كۆلان وجادا وێ هزرێ دكن مادەم هەر چۆن بەردەوامە كەس نەما مە ئەم دێ لڤر چ كەن،گەلەك هزر ل پاشەرۆژا خۆ و زارۆكێن خۆ دكەن و هزر دكەن كو وەك بەرێ نازڤرت خۆشی و ژ ڤان فەرمانا تێر بوون.
ئەڤجا یا گرنگ ئەوە دبینم وەلاتێ مە كوردستانە و وارێ پێكڤەژیانێ یە بۆ هەموو نەتەوا و كوردستان جهێ ئەمانێ یە و دبینم دڤێت خەلكێ مە خۆ راگرت ژبەر ڤان قەیرانا و بەرێ خۆ ب یەك جاری نەدەن وەلاتێ بیانی،چنكو هاتیە گۆتن هەر دێ ئێتە گۆتن (شام شەكرە بەلێ وەلات شرینترە )بەری چەندین هەیڤان خەلكێ مە گەلەك ژێ مال و ملكێ خۆ فرۆتن و ئەرد و خانی و چۆن ڤێ داویی ئەو تشت سەكنی،بەلێ پشتی چوپ و چەندین رێیێن دی یێ ب ئاڤێ چێبووین و چەند رێیێن دی دیسا دەست پێكرن.
دبینم ژی هەر كەس دژیانا خۆدا یێ ئازادە چاوا بۆ خۆ بكەت،بەلێ نە ب ڤی رەنگی ئیرۆ ژی ب كۆم دچن و یا فەرە تشتەك بۆ ڤی خەلكێ بێتە كرن و گەلەك كەسێ ئێزدی دئاڤێ دا خەندقین د دەریایا ئیجە دا دناڤبەر توركیا و یونان دا،یا گرنگ ئەوە نۆكە خەلكەك هەست ب خۆشیێ و باوەریێ بكەن و یێ ئاوارە بووی دەڤەرێن وان بێنە پاقژكرن داكو ڤەگەرن سەر مال و ملكێ خۆ و باوەری و ئێمناهی هەبت.