داخوازا پاراستنا نێزیكی 200 ژنێن ئێزدیێن دناڤا فه‌لوجه دا دئێته كرن
ئێزديخان نيوز:
په‌ڕله‌مانتارا ئێزدی ل جڤاتا نوونه‌رێن ئیراقێ راگه‌هاندن كو؛ "ب گۆڕه‌ی پێزانینێن مه 100 هه‌تا 200 كچ و ژن و زارۆكێن ئێزدی ل فه‌لوجه‌ی وه‌كو ئێخسیر د ده‌ستێن داعش دا هه‌نه، له‌وا مه داخواز ژ هێزێن ئیراقی و حشد الشعبی كرییه كو ل ل ده‌مێ گرتنا فه‌لوجه ئه‌و ئێزدی بهێنه ده‌ستنیشانكرن و ره‌فتاره‌كا جوان و جودا ژ داعش دگه‌ل بهێنه‌كرن چونكو ئه‌و وه‌كو ئێخسیر د ده‌ستێن داعش دا بووینه".
په‌ڕله‌مانتارا ئێزدی ل جڤاتا نوونه‌رێن ئیراقێ بۆ دواڕۆژ گۆت: "چه‌ندین زیندانێن داعش ل ناڤا فه‌لوجه‌ی هه‌نه و دوور نینه پێشمه‌رگه‌یێن ئێخسیر كری ژی دناڤ دا هه‌بن، له‌وا پێدڤییه وهزارهتا پێشمه‌رگه‌ی ژی ئاگه‌هداری وان بیت".
ئه‌میندارێ گشتیێ وهزارهتا پێشمه‌رگه‌ی جه‌بار یاوه‌ر بۆ دواڕۆژ راگه‌هاندن كو؛ "ئه‌وان چو پێزانینێن پشتراستكری نینن كو پێشمه‌رگه‌یێن ئێخسیر ل زیندانه‌كا فه‌لوجه هه‌بن، لێ ئه‌گه‌ر تشته‌كێ هوسا هه‌بیت ژی پێدڤییه له‌شكه‌رێ ئیراقێ ل ده‌مێ رزگاركرنێ وان راده‌ستی ئیدارا هه‌رێمێ و ب تایبه‌ت وهزارهتا پێشمه‌رگه‌ی بكه‌ت و چو رێكێن دی نینن و وه‌سا دهێته پێشبینیكرن ژی كو دێ ڤی كاری كه‌ن".
خه‌یری بۆزانی رێڤه‌به‌رێ گشتیێ كاروبارێن ئێزدییان ل وهزارهتا ئه‌وقافا هه‌رێمێ ژی بۆ دواڕۆژ خویاكر كو؛ "نێزیكی 3800 وه‌لاتیێن ئێزدی ل جه‌م داعش ئێخسیركرینه و 2589 وه‌لاتیێن ئێزدی هه‌تا نوكه هاتینه رزگار كرن، هه‌ر جهه‌كێ داعش لێ هه‌بیت ئێزدی ژی لێ هه‌نه له‌وا دڤێت لایه‌نێن په‌یوه‌ندیدار د پرۆسه‌یا رزگاركرنا فه‌لوجه دا وان بپارێزن و راده‌ستی ئیدارا هه‌رێمێ بكه‌ن".
