دشه‌ش هه‌يڤان دا 70هه‌زار ئێزديان ژعێراقێ كۆچكريه
ئێزديخان نيوز:
رێڤه‌به‌رێ گشتيێ كاروبارێن ئێزديان ل وه‌زاره‌تا ئه‌وقاف و كاروبارێن ئايينى ،ئيرۆ 7شووباتێ 2016،دپرێسكۆنفرانسه‌كى دا ل هۆتێلا هه‌كار ل دهۆكێ راگه‌هاند،كۆمه‌لگه‌ها نێڤ ده‌وله‌تى و حكوومه‌تا عێراقێ خه‌مسارن هه‌مبه‌رى كه‌يسا كچێن ئێزدى ژئاليێ رێكخستيا تيرۆرستيا داعشێ ڤه.
(خێرى بۆزانى)رێڤه‌به‌رێ گشتيێ كاروبارێن ئێزديان داخوازا ڤه‌گه‌ريانا ميرێ ئێزديان كر بۆ هه‌رێما كوردستانێ و گۆت:تانۆكه 21گۆرێن بكۆم يێن ئێزديان ل شنگالێ و ره‌خ و دۆرێن وێ هاتينه ديتن و 1293ته‌رم دناڤ وان دا هاتينه ديتن و ئه‌و گۆر ژى ب باشترين به‌لگه بۆ جينۆسايد ناساندنا كۆردێن ئێزدى وه‌سفكر.
بۆزانى داخوازا ئه‌نجامدانا دوو كۆنفرانسێن ناڤخۆ و نێڤ ده‌وله‌تى كر بۆ كۆمكرنا هاريكارييان بۆ ئاڤه‌دانكرنا ناوچه‌يێن نوو رزگاركرى و راگه‌هاند،داخوازێ ژ حكوومه‌تا هه‌رێما كوردستانێ دكه‌ين قوربانيێن ژێر ده‌ستێ داعشێ ب جانگۆرى بێنه هژمارتن و رزگاربوويى ژى دچارچۆڤێ چاڤدێرييا كۆمه‌لايه‌تى دا هاريكارييا وان بێته كرن.
رێڤه‌به‌رێ گشتيێ كاروبارێن ئێزديان ب پێدڤى ژى زانى كۆنفرانسه‌ك بۆ ئێزديێن كوردستان و جيهانێ بێته كرن كو پێدڤيه(مير ته‌حسين به‌گ)ميرێ ئێزديان پشكدارى وى كۆنفرانسى بت و كاروبارێن ناڤخۆ يا ئێزديان رێك بێخت.
هه‌روه‌سا داخوازا ڤه‌گه‌ريانا ميرێ ئێزديان بۆ هه‌رێما كوردستانێ كر ل جهێ ل ئه‌لمانيا بمينت و دناڤا خه‌لكێ خۆ دا بت و كاروبارێن ئاينێ خۆ ب رێڤه ببه‌ت.
ل گۆرى گۆتنا بۆزانى،دده‌مێ نێزيكى شه‌ش هه‌يڤان دا 70هه‌زار وه‌لاتيێن كوردێن ئێزدى ب قاچاخى چۆينه وه‌لاتێن ئه‌وروپا و 110كه‌س ژى دده‌ريايا ئيجه‌ده خه‌ندقينه و 460ژى تا نۆكه بێ سه‌روشوونن.
