هادى دوبانى:ب جوانترين شێواز پێشوازى ل كچێن رزگاربووى دئێته‌ كرن

ئێزديخان نيوز:

ب هاريكارييا حكومه‌تا هه‌رێما كوردستانێ و ئه‌لمانيا،چاڤه‌رێ دئێته‌كرن هه‌تا دووماهيا ئه‌ڤ ساله‌ هه‌زار كچێن ئێزدى يێن ژ ده‌ستێن داعش رزگاربووين بۆ ئه‌لمانيا بێنه‌ ره‌وانه‌كرن.

هادى دوبانى،رێڤه‌به‌رێ رێڤه‌به‌رييا كاروبارێن ئێزديان ل پارێزگه‌ها دهۆكێ راگه‌هاند،هه‌تا نهۆ 256كچێن ئێزدى يێن ژ ده‌ستێ داعشێ رزگاربووين بۆ ئه‌لمانيا هاتينه‌ ره‌وانه‌كرن و ب هاريكارييا هه‌ردوو حكومه‌تێن هه‌رێما كوردستانێ و ئه‌لمانيا ئه‌ڤ كاره‌ هاتيه‌ كرن و چاڤه‌رێ دئێته‌ كرن هه‌تا دووماهيا ئه‌ڤ ساله‌ ژمارا وان بگه‌هته‌ هه‌زار كچان.

 دوبانى ئاشكه‌راكريه‌ ژى كو نهۆ دوو هه‌زار و 103كه‌س ژ ده‌ستێ داعشێ هاتينه‌ رزگاركرن و سێ هه‌زار كه‌س هێشتا ماينه‌ نه‌هاتينه‌ ئازادكرن،ته‌كه‌زكريه‌ ژى كو ب هه‌ڤكارييا حكومه‌تا هه‌رێمێ ئه‌و به‌رده‌وام كارى ژبۆ رزگاركرنا وان ره‌ڤاندييان يێ دكه‌ن. 

رێڤه‌به‌رێ رێڤه‌به‌رييا كاروبارێن ئێزديان ل پارێزگه‌ها دهۆكێ دايه‌ دياركرن،كو ئه‌و جڤاكێ نێڤ ده‌وله‌تى دخوازن هاريكارييه‌كا زێده‌تر بۆ رزگاربوويان بكه‌ن،ئاماژه‌ دايه‌ وێ چه‌ندێ كو ئه‌و كچ و ژنێن نهۆ ڤه‌دگه‌رن ب جوانترين شێواز پێشوازى ل وان دئێته‌ كرن.