رێڤه‌به‌رێ كاروبارێن ئێزدیان:هه‌تا خرابیا ره‌وشا شنگالێ هه‌بت خه‌لكێ مه نه‌شێن ڤه‌گه‌رن
رێڤه‌به‌رێ كاروبارێن ئێزدیان:هه‌تا خرابیا ره‌وشا شنگالێ هه‌بت خه‌لكێ مه نه‌شێن ڤه‌گه‌رن
ئه‌ڤرۆ نيوز:
رێڤه‌به‌رێ كاروبارێن ئێزدیان ل دهۆكێ راگه‌هاند، پێدڤیه پێشمه‌رگێ كوردستانی َ ڤه‌گه‌ریت شنگالێ و دووماهیێ ب خرابیا ره‌وشا وێ بینیت تاكو خه‌لكێ وێ بشێن ڤه‌گه‌رن، دیاركر ژی هه‌تا شنگال ئارام نه‌بیت خه‌لك ناڤه‌گه‌رن.
جه‌عفه‌ر سمۆ، رێڤه‌به‌رێ كاروبارێن ئێزدیان ل دهۆكێ یا سه‌ر ب رێڤه‌به‌ریا گشتی یا كاروبارێن ئێزدیان ڤه ل وه‌زاره‌تا ئه‌وقاف و كاروبارێن ئاینێ ل هه‌رێما كوردستانێ بۆ ئه‌ڤرۆ گۆت” بۆ ئارامكرنا ره‌وشا شنگالێ و دووماهی هاتنا خرابیا ره‌وشا وێ، پێدڤیه پێشمه‌رگێ كوردستانێ و له‌شكرێ عیراقێ ڤه‌گه‌رنه شنگالێ، چونكو هه‌كه پێشمه‌رگه و له‌شكرێ عێراقی ته‌ناهیێ ل شنگالێ دابین نه‌كه‌ن، یا ب زه‌حمه‌ته ئاوارێن شنگالێ ڤه‌گه‌رن و هه‌تا خرابیا ره‌وشا شنگالێ هه‌بیت، خه‌لكێ مه نه‌شێن ڤه‌گه‌رن وهه‌ر ده‌مێ پێشمه‌رگێ كوردستانێ چو شنگالێ، دێ ئاوارێن شنگالێ دگه‌ل پێشمه‌رگه‌ی ڤه‌گه‌رن”.
جه‌عفه‌ر سمۆی زێده‌تر گۆت” ترسا خه‌لكێ شنگالێ ئه‌وه یێ دبینن رۆژانه كوشتن و مالۆیرانی بسه‌ر خه‌لكێ شنگالێ دا دهێت هه‌تاكو كه‌سێن نه دیار خه‌لكێ دكوژن و ته‌ناهی ل شنگالێ نینه، له‌ورا خه‌لكێ شنگالێ باوه‌ری نینه ڤه‌گه‌رن”.
رێڤه‌به‌رێ كارۆبارێن ئێزدیان ئاماژه كر” هه‌تا ئه‌ڤرۆ قه‌زا شنگالێ ژ روویێ ئێداری ڤه ب سه‌ر پارێزگه‌ها نه‌ینه‌وا ڤه‌یه، لێ چ خزمه‌تگوزارێ ژ لایێ پارێزگه‌ها نه‌ینه‌وا ڤه ل شنگالێ نه‌هاتینه ئه‌نجامدان و خه‌لكێ شنگالێ به‌رده‌وام داخوازیه‌كێ دكه‌ن ئه‌وژی ئه‌و كه‌سێن تاوان ب سه‌رێ ئێزدیان ئیناین بهێنه دادگه‌هكرن وسزادان، لێ هه‌تا نوكه ئه‌ڤ چه‌نده نه‌هاتیه كرن”.
خویاكر ژی” پتریا ده‌ڤه‌رێن داعشێ وێرانكرین یێن هاتینه ئاڤاكرن وژیان تێدا ڤه‌گه‌ریایه بتنێ شنگال مایه هێشتا نه‌هاتیه ئاڤه‌دانكرن وژیان تێدا نینه، ئه‌و هێزین چه‌كدار یێن دناڤ شنگالێ دا زۆر ئاسته‌نگ بۆ ئێزدیان دروستكرینه وهه‌موو گرۆپێن چه‌كدار دناڤ شنگالێ دا بۆ به‌رژوه‌ندیێن خوه كار دكه‌ن”.
رێڤه‌به‌رێ كارۆبارێن ئێزدیان ئه‌وژی گۆت” خه‌لكێ مه ل گه‌رما هاڤینی و سه‌رما زڤستانێ دا دبن چادران دایه و ژیانا دبن چادران ڤه یا ب زه‌حمه‌ته، لێ خه‌لكێ مه ژیانا بن چادران پێ خۆشتره ژ ژیان بن ده‌ستێ هێز و گرۆپێن نه‌شه‌رعی دناڤا شنگالێ دا، چونكو هه‌كه ته‌ناهی ل جهه‌كێ نه‌بیت، خه‌لك نه‌شێن تێدا بژێن ونوكه شنگال یا پر بووی ژ هێز و گرۆپێن چه‌كدار”.
تعليقات