بەرەبابێن ئێزدیاتیێ (زورەت)دڤێت ژ دای و باب ئێزدی بن
بەرەبابێن ئێزدیاتیێ (زورەت)دڤێت ژ دای و باب ئێزدی بن
مەهدی حەسەن
پشتی رەزامەندیا جڤاتا رۆحانیا ئێزدیان لسەر ڤەگەراندنا كچ و ژنێن ئێزدی ئەڤێن كەتین دەستێ داعش هاتیە دان كو بەشەكێ هەرە زۆر ژ ڤان كچ و ژنان د رێیا حكوومەتا هەرێما كوردستانێ و هندەك لایەنێن دیتر ڤەگەریان بۆ ناڤ كەسوكارێن خۆ و ب كچێن پیرۆز هاتن ناسین،هاتنا ڤان كچا بوو جیێ سەرسۆرمانێ ل نك خەلكێ بیانی و ناڤخۆیی! كچەكا ئێزدی بسلمان بت و باوەریێ ب ئاینەكێ دیتر بینت و جارەكا دی ڤەگەرت ناڤ جڤاكێ ئێزدیان و ب كچەكا قەدیس بێتە ناساندن،ئەڤ چەندە ژی ژلایێ ئاین و نەتەوێن دۆرماندۆری ئێزدیاتیێ چ ل عێراقێ و كوردستانێ چ ل جیهانێ ب پێنگاڤەكا ئەرێنی هاتە ل قەلەم دان كو میرێ شێخا وجڤاتا رۆحانی ڤێ بریارا وێرەك بدەن، ژبەركو(73)فەرمان بسەرێ ئێزدیان هاتینە بەری ڤێ فەرمانێ چوو كارێن وەسا نەهاتیە ئەنجام دان ئەڤە بۆ جارا ئێكێ یە ئەڤ لێبۆرین دناڤ ئێزدیان دا دئێتە كرن و ئەڤێن كەتین دەستێ كافر و نەیارا بسەر بلندی ڤەگەرن،ل ڤێ فەرمانێ هەموو كەسێن كەتین دەستێ داعش هاتن لێبۆرین و بەشەك ژێ ڤەگەریان بۆ ناڤ كەسوكارێن خۆ و ب ئێزدیاتیا خۆ شادبوون،هەر چەندە ئەڤ كار یێ بەروڤاژی ئێزدیاتیێ یە و ب هیچ رەنگی نائێتە قەبوولكرن،بەلێ ژ نەچاریا كاودانێن هاتین پێش و هند فەرمان و زۆرداریا ڤێ جارێ یە گران بوو ژ نەچاری مللەت پێكڤە شێوری و ئەڤ بریارا دیرۆكی هاتە دان كو ئەڤ كچ و ژنێن كەتین دەستێ داعش ڤەگەرن وەك قەدیسەك دناڤ ئێزدیان دا بسەر بلندی و ئازاد بژین، جیێ دلخۆشیێ بوو پشتی ڤێ بریارێ سەر گرتی جڤاكێ نێڤ دەولی و جیهانی و ناڤخۆیی پێشوازیا ڤێ بریارێ كرن و پێنگاڤەكا ئەرێنی دان،ژبەركو بەری نهۆ قەدەغە بوو هەر كەس ڤی بەحسی ژی بكت لێ سەرەرای ڤان ئاستەنگا نهۆ ئەو كچ و ژن یێ ئازاد دژین،لێ جیێ داخێ یە ئەڤە ماوەكە هندە ژ كۆمەل و رێكخراوێن (UN)یێ هەولێن ئازراندنا هندەك ژ بابەتێن مەترسیدار لسەر ئێزدیاتیێ دەن كو ئەو زارۆكێن داعشا و ل كەمپێن هۆل و جیێن داعش لێ هەین د بێ كەس و بێ سەمیان ماین دخازن ڤەگەرینن ناڤ ئێزدیان و دبێژن ئەڤنە زارۆكێن ئێزدیانن و پەیوەندیا ب ڤان كچ و ژنێن رزگاركری دكن ب بەهانا گەشتەكێ یان گەریانەكێ،ژبەركو دەروونێ وان تێكچۆیە و پێتڤی هاریكاریێ نە هۆسا مالێن وان ژی رازی كرینە و سەردابرینە،بەلێ بەروڤا ژی دگەل ڤان كچ و ژنا رێكەفتی نە وان بگەهینن زارۆكێن وان ئەڤێن ژ داعش پەیدابووین و ژبن دەستێ ئێزدیان خلاس كن د ئەنجام دا گەلەك ژوان نهۆ ل تووركیا و گەلەك جیێن دیتر یێ زارۆكێن داعشا خوەیی دكن،پشتی جڤاكێ ئێزدیان ب گشتی و جڤاتا رۆحانی ب تایبەت ئەڤ دەنگوباس بهیستین ئەڤ چەندە رەتكرن كو ئەڤ زارۆكێن ژ داعش جارەكا دی ڤەگەرن بۆ ناڤ ئێزدیا و وەك ئێزدی بژین و كچ و ژنێن ئێزدی ڤان زارۆكێن داعش ب زارۆكێن خۆ بزانن و خوەیی كن، هەروەسا ل ڤێ داویێ د رۆژناما نیویورك تایمز دا هاتیە بەلاڤكرن هندەك كەسا د رێیا رێكخراوێن بیانی هەول داینە خۆ بگەهینن ڤان رزگاربوویێن ئێزدی و وەسا تێگەهاندینە ئەگەر بڤێن زارۆكێن خۆ خوەیی كن دێ وان و زارۆكێن وان گەهینن دەرڤەی وەلاتی،ئەو بوو ل ڤان رۆژێن بۆری هندەك ژ رزگاربوویێن دەستێ داعش ژ كەمپێن كوردستانێ ب بەهانەیا بگەهن پاپای و ئێش و ئازارێن خۆ بگەهینن د رێیا ڤان رێكخراوێن سڤیل و(UN)دا بەروڤاژی بەرێ وان داینە سەر سنوورێ عێراقێ وسووریا و هندەك زارۆك ئامادەكرینە كو ئەڤنە زارۆكێن وانن،هەر بۆ زانین هندەك ئەڤە پێنچ سالا هاتین و هندەك ئەڤە دوو سێ سالە هاتین وەكی دیار فلمەك دروستكرینە و هەتا نهۆ د بێ سەروشینن، دەیك و باب و كەسوكارێن وان دبێژن ئەڤ كچ ژ مال دەركەفتینە بچن بەغدا و پاپای ب بینن و سەر مەدا ڤەنەگەریان،ئەڤ چەندە ژی بوویە جیێ دلگرانیا جڤاكێ ئێزدیان كو نابت پشتی ڤێ كۆمكوژیا لسەر ئێزدیان هاتیە كرن جارەكا دی سفكاتیێ ب ئۆل و جڤاكێ ئێزدیان بكن،ژبەركو ئێزدیاتی د گەلەك قۆناغێن سەخت و دژوار دا دەرباز بوویە د دیرۆكێ دا و ئێزدیاتی وەكی هەی پاراستیە ب خووونا سەرێ هەزارەها باب چاك و عەگید و میرخاسێن ئێزدیان نهۆ ژی ل پێناڤێ هندەك رێكخراوێن مافێن مرۆڤی یان هندەك كەس خۆ بڤی بابەتی بەرناس كن و دەستكاریێ د ئۆل و رێبازا ئێزدیاتیێ یا كەڤنار بكن ب هیچ رەنگەكی جڤاكێ ئێزدیان قەبوول ناكت، جیێ داخێ یە هندەك ژ كەنالێن راگەهاندنێ و رۆژنامەڤانێن دەولی و ناڤخۆیی ژی ئەڤ بابەت گەلەك ئازراندینە و پشتەڤانیا ڤان زارۆكێن داعش دكن،بێی رەه و ریشالێن ئێزدیاتیێ و ڤێ ئۆلا كەڤنار بزانن كا چەند جارا هاتینە برین و چ هاتیە سەرێ ئێزدیان دەست ژ ڤێ ئۆلا رەسن بەرنەداین و ئێزدیاتی پاراستین ،ئەگەر هند ئەڤ رێكخراوێن(UN) د خەما زارۆكێن ئێزدیانن بلا زارۆكێن مە ڤەگەرینن ئەڤێن كەتین دەستێ داعش ل قوتابخانێن وان دئێنە پەروەردەكرن لسەر تیرۆرێ و كرینە تیرۆرست، نە زارۆكێن داعشا بۆ مە بینن،ئێزدیان كەس نە كوشتیە و كەس ب خورتی نەكریە ئێزدی و ئەڤ ئێزدیاتی هەر ژ ئەزل دا دڤێت دای و باب ئێزدی بن و خودێ ناس بووینە و باوەری ب ئێكانە خودێ هەبوویە و هەر كەسێ ئێزدی پێگیریێ ب ئێزدیاتیێ نەكت دێ ئێتە دەرێخستن ژ ئێزدیاتیێ،ئەم ئێزدی باش د جەگەرێ هەر دەیكەكێ دگەهین زارۆك ژ جەرگێ وێ دروست بوویە و گەلەك زەحمەتە ژنەك بكارت جەگەرا خۆ ب سۆژت و دووری زارۆكێن خۆ بت،بەلێ ئەڤا داعش ئینایە سەرێ ڤان كچ و ژنان ب گەلەكێ مەزنترە ژ ڤێ مەرگەساتا هێلانا زارۆكا،دڤیا بزانین بابێ وی زارۆكی یێ شەهید بووی ل پێناڤێ كوشتن و گرتن و تالانكرنا مال و ملكێن شنگالیا هەروەسا كوشتنا دەیك و بابێن وان كچ و ژنا و كرین و فرۆتن ب شەرەف و نامووسا ئێزدیان كریە ژ نوو زارۆكێن وان ب خودان كن،تشتەكێ سەیرە وقەت و قەت كچا ئێزدی یا ب شەرەف و نامووس قەبوول ناكت،ئەگەر هندەك ژ ڤان كچا هاتبنە خاپاندن بەلێ(90%) ژ ڤان رزگاربوویێن دەستێ داعش ئەڤ زارۆك رەتكرینە و نەڤیاینە و ب ئێزدیاتی یا خۆ شادبووینە و جارەكا دی هندەكا ژ وان هەڤژینی كریە و هندەك ل مال بابێن خۆ ب رێز و حورمەتن،ژلایەكێ دیڤە دڤێت ئەم هەموو ب زانین بەشەك ژ ڤان كچ و ژنێن كەتین دەستێ داعش نەخۆشیێن دەروونی هەنە ژ ئەنجامێن وێ زولم و زۆرداریا داعش ل وان كرین كەسوكارێن خۆ ژ دەستداین و نهۆ ژی د ژیانەكا بێ سەروبەردا دژین،ئەڤ جار ژ بێ هیڤیێن ژیانێ و نەخۆشیا هەی هەولێن دیتنا زارۆكێن خۆ دكن و دخازن ڤەگەرن بەرسنگێ وان،داكو ئالۆگورەكێ د ژیانا خۆ بكن،لێ ئەڤە قەدەرا وان بوو دڤیا ئەو بخۆ رێزێ ل ئێزدیاتیێ بگرن كو ئێزدیان ئەو جارەكا دی كچێن پیرۆز دانە زانین، ئەگەر وان باوەری ب ئێزدیاتیێ نەما و دخازن دگەل زارۆكێن داعش بژین و ئێزدیاتیێ بكن قووربانیێن زارۆكێن داعش ئێزدی ژی ڤێ چەندێ ب هیچ رەنگی قەبوول ناكن وەكی جڤاتا رۆحانی و ئێزدی دبێژن ئەگەر دێ ڤەگەرن ناڤ داعش بلا ڤەگەرن و دوڕندێن داعش ب خودان كن،ئەڤە كێماسیە هندەك ژ وان دبێژن، ژبەركو ئەڤ دیاردا ڤەگەراندنا ڤان زارۆكا و ئەڤ پرۆپاكندێن د ئێنە كرن و هندەك ئالی ئێزدیان تومەتبار دكن بلا چارەكێ ل ڤان كچ و ژنێن رزگاربووی بكن هەموو د بێ سەروبەرن دناڤا ڤان كەمپا دا نەساخن بلا وان كچ و ژنێن ماین د دەستێ داعش دا رزگاركن بلا شنگالێ ئاڤەدان كن و شنگالیا ڤەگەرینن شنگالێ بلا هەول بدەن قوربانیێن شەرێ داعش بكن شەهید و مووچەكی دابین كن ژبۆ كەسوكارێن قوربانیێن شنگالێ نە ئێش و ئازارێن مە زێدەكن ،دڤیا دنیا هەموو بزانت سبەی ئەڤ زارۆك بزڤرن ژی چ یاسا ل عێراقێ نینن ناسنامێن ڤان زارۆكا بكن ئێزدی،ژبەركو یاسا بارێ شارستانیەتێ ل عێراقێ رێ نادەت كەسەك بابێ وی بسلمان و دەیكا وی ئێزدی بێژن ئەڤە دێ بتە ئێزدی ب هیچ رەنگەكی یاسا عێراقێ رێ نادەت ،ژبەركو هندەك كێشە مە وەك ئێزدیان بەری نهۆ هەینە،بۆ نموونە فەرمانبەرەكی ب شاشی مرۆڤەكێ ئێزدی توماركریە بسلمان هیچ كەسی ب هیچ رەنگەكی نكاریە ڤەگەرینت و دادگەها رێ نەدایە جارەكا دی ناسناما وی و وی مرۆڤی بكەتە ئێزدی و ئەڤ حالاتێن ل سالێن(٦٠-٧٠-٨٠-٩٠-٢٠٠٠)گەلەك كەس هەینە و هەتا نهۆ ناسنامێن وان بسلمانن و زارۆكێن وان ل سەر وان نەهاتینە تۆماركرن، ئەڤ جار كورە بسلمانەك ژ دەولەتا ئیسلامی دێ چاوا ڤەگێرین ئەگەر بۆ فتنەكێ بێن ژی سبەی دێ بنە بەلا لسەر سەرێ ئێزدیان و ئێزدی دێ تووشی كێشێن مەزن بن، ل داویێ ژی ژ جڤاتا رۆحانی و میرێ شێخا و مەزن و ئۆجاخێن شنگالێ دئێتە خاستن رێزەكا تایبەت ل ڤان كچ و ژنا بێتە گرتن و خۆ نێزیكی ڤان رزگاربوویێن ژ دەستێ‌َ داعش بكن و دەستێ خۆ دانێن سەر سەرێ وان،ژبەركو برینا وان گەلەك كورە و پێتڤی ب چاڤدێری و رێزگرتنێ نە و ئەم هەموو خۆ ل وان بكەین خودان و رەوشا وان باش كەین و باوەریێ بۆ وان دروستكەین و هشیار كەین ب هیچ رەنگی ئەڤ زارۆك نازڤرن و هشیاری نەیار و دوژمنا بن مە نەخاپینن ئێزدیاتی ژ هێڤنێ حەلالە و حەرام نەكن.
تعليقات