نێچیرڤان بارزانی: بزاڤێن رزگاركرنا هه‌موو گرتيێن ئێزدى دێ دبه‌رده‌وام بن
نێچیرڤان بارزانی: بزاڤێن رزگاركرنا هه‌موو گرتيێن ئێزدى دێ دبه‌رده‌وام بن
روفاتێن 104 كوردێن ئێزدى كو ب ده‌ستێن داعشێ ب كومه‌ل هاتبوونه كۆشتن ئه‌ڤرۆ ل گۆندێ كۆچۆ هاتنه ڤه‌شارتن، سه‌رۆكێ هه‌رێما كوردستانێ ژى رادگه‌هینیت؛ دێ بزاڤێن وان دبه‌رده‌وام بن بۆ رزگاركرنا هه‌موو ره‌ڤاندیێن ئێزیدى.
نێچیرڤان بارزانى، سه‌رۆكێ هه‌رێما كوردستانێ د گۆتاره‌كێ دا كو ژ ئالیێ نه‌وزاد هادى ڤه هاتیه خواندن ئاشكرا كر، ئه‌و كۆمكۆژیا تیرۆریستێن داعشێ همبه‌رى خووشك و برایێن ئێزیدى كرى، نه بتنێ بزاڤه‌كا كه‌ڤنه یا لێدانا ئێك ژ دێرینترین ئاینێن ده‌ڤه‌رێ و مرۆڤایه‌تیێ بوو، به‌لكو بزاڤه‌كا نه‌زۆكى بوو، بۆ لێدانا تێگه‌هـ و به‌هایێن بلندیێن گه‌لێ كوردستانێ ژ لێبورینێ و پێكڤه‌ژیانێ و مرۆڤدۆستیێ و ژیاندۆستیێ، كو مۆركا دیار و به‌رچاڤا كۆمه‌لگه‌ها ئێزیدى نه.
هه‌تا نها ژ سه‌رجه‌مێ شه‌ش هزار و 417 ره‌ڤاندیێن ئێزیدى، سێ هزار و 543 كه‌س هاتینه رزگار كرن، دوهزار و 874 كه‌س ژى ماینه، سه‌رۆكێ هه‌رێما كوردستانێ د گۆتارا خوه‌دا گۆت: ئه‌و دوپات دكه‌ن كو دێ ل سه‌ر بزاڤێن رزگاركرن و ئاشكراكرنا چاره‌نڤیسێ ته‌مامێ ره‌ڤاندیان به‌رده‌وام بن.
سه‌رۆكێ هه‌رێما كوردستانێ ئاماژه ب هندێ ژى كر كو دێ هه‌موو بزاڤان كه‌ن و دێ كاركه‌ن بۆ پارێزگاریكرنا شنگالێ، د گه‌ل ئیراقێ و كۆمه‌لگه‌ها ناڤده‌وله‌تى دێ كار كه‌ن و دێ دهه‌ڤكاربن بۆ هندێ داكو جاره‌كا دى كاره‌سات ب سه‌رێ ئێزبدیان و چ پێكهاته‌یێن دى نه‌هێن، داخواز ژى ژ حكومه‌تا فیدرال كر قه‌ره‌بوویا خووشك وبرایێن ئێزیدى بكه‌ن، تیرۆرست و تاوانبارێن كۆمكوژیێ ژى بگه‌هنه سزایێن خوه و ل دووڤ قانوونێ.
تعليقات