نوونه‌را ئێزديان:هنده‌ك لایه‌ن دژاتیا بجهـئینانا رێككه‌فتنا شنگال دكه‌ن
نوونه‌را ئێزديان:هنده‌ك لایه‌ن دژاتیا بجهـئینانا رێككه‌فتنا شنگال دكه‌ن
نوونه‌را كوردێن ئێزدى ل په‌رله‌مانێ عێراقى دیاركركو:" مه داخواز ژ نه‌ته‌وه‌یێن ئێكگرتى كریه بۆ بجه ئینانا رێكه‌فتنا شنگال هه‌ڤكاریێ بكه‌ن، هه‌موو كار بهێنه كرن بۆ بجه ئینانا رێكه‌فتنا ناڤبه‌را حكومه‌تا هه‌رێما كوردستانێ و عێراقى دا بۆ ئاساییكرنا ره‌وشا شنگال".
خالیدا خه‌لیل، نوونه‌را كوردێن ئێزدى ل په‌رله‌مانێ عێراقى بۆ (باسنیوز) راگه‌هاندكو:" هه‌تا هێزێن بیانى ناڤ شنگال دا بن ئاوارێن شنگال نه‌شێن ڤه‌گه‌رنه سه‌ر جهێن خۆ. لایه‌نێن چه‌كدار ونه‌شه‌رعى بۆ مه‌ره‌مێن خۆ رێگریێ ل بجه ئینانا رێكه‌فتنا شنگال دكه‌ن. وان نه‌ڤێت ته‌ناهى ل شنگال په‌یدابیت داكو جهێ وان ناڤ شنگالدا هه‌بیت چونكو ئه‌و گرۆپ ولایه‌نێن ئاسته‌نگی دروست دكه‌ن ئه‌و باش دزانن ده‌مێ رێكه‌فتنا شنگال بجه دهێت جهێ وان ناڤدا شنگال دا نامینت. هه‌تا ژى هنده‌ك لایه‌ن هه‌نه ل به‌غدا دژاتیا بجه ئینانا رێكه‌فتنا شنگال دكه‌ن. مه داخواز ژ نه‌ته‌وه‌یێن ئێكگرتى كریه رێكه‌فتنا شنگال ب ته‌مامى بجه بهێت.
ئاشكه‌را كركو:" بێ بجه ئینانا رێكه‌فتنا شنگال چوو جاران ته‌ناهى ل شنگال په‌یدانابیت. پێدڤیه له‌ز بجه ئینانا رێكه‌فتنا ناڤبه‌را حكومه‌تا هه‌رێما كوردستانێ و عێراقى بهێته كرن بۆ ئاساییكرنا ره‌وشا شنگال".
ئه‌وژى گۆت:" په‌كه‌كه دگه‌ل هنده‌ك لایه‌نێن دی ناڤ شنگال دا هه‌موو كاران دكه‌ن نه‌هێلن رێكه‌فتنا شنگال بجه بهێت ، هه‌كه بجه نه‌هێت شنگال ته‌نا نابیت ئه‌ڤه ژى باش نینه چونكو ئاوارێن شنگال نه‌شێن ڤه‌گه‌رنه بن ده‌ستهه‌لاتا هێزێن نه‌شه‌رعیدا. پێدڤیه ئه‌و هێز وگروپێن نه‌قانوونى شنگال چۆل بكه‌ن داكو شه‌ر وئالۆزی ل شنگال روونه‌ده‌ت".
تعليقات