دەزگەھێ لوتکە:ئەگەرێ زێدەبوونا حالەتێن خۆکوشتنێ دناڤا کەمپان دا بۆ خرابیا رەوشا ئاوارەیان ڤەدگەڕت
دەزگەھێ لوتکە:ئەگەرێ زێدەبوونا حالەتێن خۆکوشتنێ دناڤا کەمپان دا بۆ خرابیا رەوشا ئاوارەیان ڤەدگەڕت
خوەکوشتنا ھژمارەک ژ گەنجێن ئێزدی دناڤا کەمپێن ئاوارەیان دا نیشانا تێکچوونا رەوشا دەروونی یا گەنجێن ناڤا کەمپێن ئاوارەیانن و دەزگەھێ لوتکە بۆ کارۆبارێن ئاوارە و پەنابەران ژی حالەتێن خوەکوشتنێ دناڤا ئاوارەیان بۆ خرابیا رەوشا وان ڤەدگەڕینیت و ئاماژە کریە، نەبوونا دەلیڤێن کاری و بەلاڤبوونا کۆرۆنایێ چو ھیڤی بۆ گەنجێن ئاوارە نەھێلاینە و پەیوەندیێن جڤاکی ژی تێکداینە.
دەزگەھێ لوتکە بۆ کارۆبارێن ئاوارە و پەنابەران ئاشکرا کر، بتنێ ددەمێ دو حەفتیاندا ١١ کەسان دناڤا کەمپێن ئاوارەیان دا ل دھۆکێ دووماھی ب ژیانا خوە ئینایە و بڤێ چەندێ دیار دبیت رێژا خوەکوشتنێ دناڤا ئاوارەیێن ھەرێما کوردستانێ زێدە بوویە، بتایبەتی ژی دناڤا ئاوارەیێن کوردێن ئێزدی و ئەگەرێ زێدەبوونا حالەتێن خوە کوشتنێ دناڤا کەمپاندا بۆ خرابیا رەوشا ئاوارەیان ڤەدگەڕیت، بتایبەتی حالەتێن ھاتینە تۆمار کرن ھەموو گەنج بووینە.
دەزگەھێ لوتکە ئەو چەندە ژی دا زانین کو ژ ئەگەرێ بێکاریێ و بەلاڤبوونا ڤایرۆسا کۆرۆنایێ چەندین ئاریشە بۆ ئاوارەیێن ناڤا کەمپان پەیدا بووینە و ھەتا ئاریشە کەفتیە پەیوەندیێن جڤاکی یێن ئاوارەیان دناڤا کەمپێن ھەرێما کوردستانێ، بشێوەیەکی بێ ھیڤی بووینە و پاشەرۆژا وان دیار نینە و تشتەک نینە ببیتە ھیڤیەک بۆ گەنجێن ناڤا کەمپاندا.
ژلایەکێ دیڤە دکتۆر سابر زێباری، بسپۆرێ دەروونی بۆ ئەڤرۆ دیار کر، ئەگەرێن خوەکوشتنێ زۆرن، بەلێ بێگومان ھاندان ھەیە مرۆڤی بگەھیننە ئاستەکی دووماھیێ ب ژیانا خوە بینیت و گۆت: بۆ رێگریێ ل خوەکوشتنێ، پێدڤیە دەمێ خێزانێ ھەست بڤێ چەندێ کر ئەندامەکێ وان وەک بەرێ نەمایە د رەفتارێن رۆژانە دا ئێکسەر سەرەدانا نۆژدارێ دەروونی بکەن بۆ وەرگرتنا چارەسەریێ.
زێباری دیار کر ژی بەری نوکە تیمێن تایبەتمەند سەرەدانا کەمپێن ئاوارەیان دکر و رەوشا ئاوارەیان ژلایێ ساخلەمی ڤە باشتر بو، مخابن نوکە وەک بەرێ سەرەدانا کەمپێن ئاوارەیان ناھێتە کرن و گۆت: نەبوونا دەلیڤا کاری ژی زێدەتر کاریگەریێن دەروونی پەیدا کرینە ل سەر ئاوارەیان، قەیرانا دارایی بگشتی کاریگەریێن خوە ھەنە ل سەر جڤاکی و ژیانا رۆژانە دەمێ تاک یێ بێکار و داھات بیت بێگومان دێ ھزرێن خراب ژی کەت و بەر ب تاوانان بچیت، ئێک ژ وان پەیدا بوونا نەخوشیێن دەروونیە و ھندەک ژ وان نەخوشیێن دەروونی دگەھنە ئاستەکی مرۆڤ پەنایێ ببەت بۆ دووماھی ئینانێ ب ژیانا خوە.
تعليقات