90% ڤه‌گه‌ريانا ئاواران بۆ شنگال كێمبوویە
90% ڤه‌گه‌ريانا ئاواران بۆ شنگال كێمبوویە
ریڤەبەرێ كوچ و كوچبەرێن عێراقی ل پارێزگەها دهۆكێ ئاشكەرا كر ژبەر ئاستەنگێن بۆ بجه ئێنانا رێكەفتنا دناڤبەرا حكومەتا هەرێما كوردستانێ و عێراقی دا بۆ ئاسایی كرنا شنگال دهێنە چێكرن ڤەگەریانا ئاواران بۆ شنگال ب ریژا 90% كێم بوویە.
ئەسكەندەر مەحمەد ئەمین، ریڤەبەرێ كوچ وكوچبەرێن عێراقی ل پارێزگەها دهۆكێ بۆ (باسنیوز) دیار كر كو: دەمێ رێکكەفتن دناڤبەرا حكومەتا هەرێما كوردستانێ و عێراقی دا هاتیە كرن بۆ ئاساییكرنا رەوشا شنگال هندەك رۆژان هەتا 300 خێزانان دزڤرینە شنگال وخەلكێ شنگال گەلەك دلخۆش بوون لێ نۆكە 90% ڤەگەریانا ئاوارێن شنگال كێمبوویە وخەلك چاڤەرێا بجه ئێنانا رێكەفتنێ دكەن داكو ڤەگەرن. ئەو خێزانێن بەری نۆكە ژی چووینە شنگال دیتن تەناهی نینە و ئاڤەدانی نینە و گەلەك گرۆپێن چەكدار ناڤ شنگالدا هەنە ئەڤە بووینە ئەگەر ئەو خەلكێ زڤرینە شنگال ژی گەلەك ژی پەشیمان بووینە".
ئەوژی راگەهاند كو: "گەلەك ژوان خێزانێن چووینە شنگال هەولدەن دووبارە ئاوارە بن لێ ئەو ئاوارەیێ دوسیەیا وێ ئاوارەیێ هاتنە دائێخستن و چوونە شنگال ئەم نەشێن جارەكا دی دوسیەكا دی یا ئاوارەبوونێ بۆ وی ڤەكەن وهەكە رێك بهێتە دان ئەو خێزانێن چووینە شنگال دێ پتریا وان دووبارە ئاوارە بن".
ئەسكەندەر مەحمەد، گۆت: "بتنێ هەتا 12 هزار ئاواران زڤرینە شنگال ئەڤە ژی رێژەكا گەلەك كێمە وپتریا ئاواران ناڤ كەمپاندا ماینە".
تعليقات