داوى ئامارا رزگاربوويێن ئێزدى
داوى ئامارا رزگاربوويێن ئێزدى
وشه:
ئه‌ڤرۆ شه‌ش سال ل سه‌ر كومكوژیا شنگالێ بورین و هه‌تا نوكه ژماره‌كا زۆر یا كچ و ژن و كه‌سێن ئێزدى چاره‌نڤیسێ وان نه‌دیاره، كو ژلایێ داعشێ هاتینه ره‌ڤاندن، به‌رپرسێ نڤیسینگه‌ها رزگاركریێن ئێزدى ژى دیاركر هه‌تا كه‌سه‌كێ ئێزدى و خه‌لكێ شنگالێ مایه لێگه‌ریان دێ یا به‌رده‌وام بیت.
حسێن كورۆ قائیدى، به‌رپرسێ نڤیسینگه‌ها رزگاركریێن ئێزدى بو "وشه" گۆت، ئه‌ڤرۆ ب هه‌لكه‌فتا شه‌ش سالیا كومكوژیا شنگالێ، چوو رێورسمێن فه‌رمى ل سنوورێ پارێزگه‌ها دهۆكێ نینن، به‌لێ دناڤ كه‌مپان و ده‌ڤه‌رێن ئێزدیان دێ هنده‌ك به‌یاننامه و چالاكیێن نه فه‌رمى هێنه‌كرن.
زێده‌تر گۆت "ل رۆژا 3/8 د رۆژه‌كا وه‌كو ئه‌ڤرۆ دا ده‌ڤه‌را شنگالێ ژلایێ چه‌كدارێن داعشێ هاته داگیركرن و كاره‌ساتێن مرۆڤى یێن مه‌زن دژى جڤاكێ ئێزدى و خه‌لكێ ده‌ڤه‌رێ هاتنه ئه‌نجامدان، هه‌ر ژ وێ روژێ هه‌تا نوكه پرۆسه‌یا لێگه‌ریانێ یا به‌رده‌وامه، ژ كوما شه‌ش هزار و 417 كه‌سێن هاتینه ره‌ڤاندن، سێ هزار و 530 كه‌س هاتینه رزگاركرن"
به‌رپرسێ نڤیسینگه‌ها رزگاركریێن ئێزدى دیاركر ژى كو ب گوره‌ى رێنمایێن سه‌رۆكێ هه‌رێما كوردستان و حوكمه‌تا هه‌رێما كوردستانێ ژى، پرۆسه‌یا لێگه‌ریانێ دێ یا به‌رده‌وام بیت هه‌تا كه‌سه‌كێ ئێزدى و خه‌لكێ ده‌ڤه‌را شنگالێ مایه و گۆت ژى"هه‌تا نوكه حوكمه‌تا عیراقێ و جڤاكێ نیڤده‌وله‌تى ژى هه‌ڤكاریا مه د لێگه‌ریانێ دا نه‌كریه"
قائیدى ل بارا چوونا ئاواره‌یێن شنگالێ بۆ سه‌ر جهـ و وارێن خوه ل شنگالێ و ده‌ورۆبه‌ران گۆت "ئه‌و ئاواره‌یێن دناڤا كه‌مپێن پارێزگه‌ها دهۆكێ چوینه شنگال و سه‌ر جهـ و وارێن خوه نێزیكێ دوو هزار خێزانان بخوڤه دگریت، هه‌موو ژى ئه‌ون كو جوره‌ك ژ جورێن ده‌واما وه‌زیفى ل دام و ده‌زگه‌ێن سه‌ربازى و خزمه‌تگۆزارى ل عیراقێ هه‌یى، هاتن و چوونا وان دناڤبه‌را دهۆك و جهێ كارى ب تایبه‌تى پشتى كۆرۆنایێ زه‌حمه‌ت بویه له‌وا وان ب بریارا كه‌سى وان پێ باشتر بوو بچنه ده‌ڤه‌را شنگالێ"
ب گوره‌ى پێزانینێن نڤیسینگه‌ها رزگاركریێن ئێزدى، 360 هزار كه‌س ل شنگال و ده‌ڤه‌رێن سه‌ر ب وێڤه ئاواره بوینه، هزار و 293 كه‌س هاتینه شه‌هیدكرن، 83 گورێن ب كوم ل شنگالێ هاتینه دیتن، ئه‌ڤه ژبلى دیتنا ده‌هان گورێن تاك تاك، دیسان دوو هزار و 745 كه‌س هێتیم و سێوى بوینه، 68 مه‌زارگه‌هـ و په‌رستگه‌هێن تایبه‌ت ب ئاینێ ئێزدیان هاتینه خراپكرن و ته‌قاندن، 100 هزار ئێزدى په‌نابه‌رێ وه‌لاتێن جیهانى بوینه.
تعليقات