دوو هەزار و 893 گرتيێن ئێزدی نەهاتینە رزگاركرن
باسنيوز:
بەرپرسێ نڤیسینگەها رەڤاندیێن ئێزدی ل هەرێما كوردستانێ دووماهی زانیاری ل دۆر رەڤاندیێن ئێزدی و وەرگرتنا خەلاتێ دایكا تێرێزا راگەهاندن.
حسێن قائیدی، بەرپرسێ نڤیسینگەها رەڤاندیێن ئێزدی ل هەرێما كوردستانێ د كۆنگرەیەكێ رۆژنامەڤانی دا راگەهاند، پشتی پێنچ سالان كاركرنا بێ راوەستیان و پری ماندیبوون و بزاڤەكا خۆرت و ژمارەكا زۆر ژ كەس و كارێن مە هاتینە رزگاركرن، ئەم وەكو نڤیسینگەه ل 3/11/2019 ئەم هاتینە داخوازكرن كو بەهر د وەرگرتنا خەلاتێ دایكا تیرێزا دا هەبیت و ئەم تێدا بەشداربووین و ئەڤە دووسالە ئەم تێدا بەشدار دبیت و ل سالا بۆری دوو رەڤاندیێن ئێزدی خەلات وەرگرت و ئەڤ سالە ژی نڤیسینگەهێ ب خوە وەرگرت.
زێدەتر گۆت: ئەڤ خەلاتە ب وان كەسان دهێتە بەخشین یێن كاریگەر دناڤ وەلات و جڤاكی دا ل دەمێ كارەساتان دا و ب پێدڤی هاتە زانین كو نڤیسینگەها مە ڤی خەلاتی وەرگریت و ئەم ڤی خەلاتی بۆ هەموو خێزانێن رەڤاندیێن ئێزدی دكەینە دیاری.
بەرپرسێ نڤیسینگەها رەڤاندیێن ئێزدی ل دۆر داوی ئامارێن رەڤاندیێن ئێزدی دیار كر، ل سالا 2014 نێزیكی 6417 كەس هاتبوونە رەڤاندن و ئێخسیركرن و هەتا نوكە 3524 كەس یێن هاتینە رزگاركرن و ژ وان ژی 339 زەلامن و 950 زارۆكێن نێرن و 1197 ژنن و 1038 زارۆكێن مێ نە و ئەوێن هەتا نوكە ماین ژی 2893 كەس ماینە و ئەم سۆزێ ددەینە وان كو كارێ لێگەریانێ و رزگاركرنێ یێ بەردەوامە و هەتا ئێك كەس ژی مابیت دێ كار یێ بەردەوام بیت.
تعليقات