پێنج سال بۆرين..ناساندنا جينۆسايدا ئێزديان نه‌هاتيه لڤاندن/به‌ختيار قادر
پێنج سال بۆرين..ناساندنا جينۆسايدا ئێزديان نه‌هاتيه لڤاندن
به‌ختيار قادر
ئه‌ڤه پێنج سال بسه‌ر كۆمكوژيا كوردێن ئێزدى ل شنگال لسه‌ر ده‌ستێ رێكخراوا تيرۆرستيا داعشێ بۆرين و هێش كۆمكوژى يا به‌رده‌وامه،لسه‌ر ئاستێ نێڤ ده‌وله‌تى و جيهانى وه‌ك پێدڤى كه‌يسا ناساندنا جينۆسايدا ئێزديان نه‌هاتيه لڤاندن و ديار نينه كو گه‌هشتيه چ ئاست و قۆناغ.
ل شه‌ڤا2_3/8/2014ێ رێكخراوا تيرۆرستيا داعشێ هێرشى قه‌زا شنگال كر و ده‌ست بسه‌ر ده‌ڤه‌رێ دا گرت و كرێترين تاوانێن دژى مرۆڤايه‌تيێ ده‌رهه‌قى كوردێن ئێزدى ئه‌نجام دان بگره ژ كوشتن و گرتن و كه‌نيزه و ده‌ربه‌ده‌رى و ئاواره‌بوون و تالانكرن و گۆڕێن بكۆم و په‌قاندنا مه‌زارگه‌هان،رۆژا 3/8/2019ێ دبته بيره‌وه‌ريا پێنجێ يا كۆمكوژيا ئێزديان ل شنگال كو هه‌تا نهۆ يا به‌رده‌وامه،ده‌رئه‌نجام هێش نێزيكى سێ هه‌زار گرتيان ژ ده‌ستێ داعش نه‌هاتينه رزگاركرن و نێزيكى 80% خه‌لكێ شنگال ئاواره ل كه‌مپان دا و ل سه‌خترين ژيان دا دژين و كۆچكرنا ئێزديان بۆ ده‌رڤه‌ى وه‌لاتى يا به‌رده‌وامه،ره‌وشا شنگال ئيرۆ زۆر ئالۆزبوويه ژبه‌ر ناكۆكى و ده‌ستێوه‌ردانێن ده‌ره‌كى و نه‌بوونا ئارامى و خزمه‌تگۆزاريان و پێدڤيێن سه‌ره‌كى يێن ژيانێ ئاواره نكارن جاره‌كا دى بزڤرنه سه‌ر مال و حالێ خۆ ڤه و ژيانا ئاواره‌يێ هه‌لبژارتينه تاكو ره‌وش ئاسايى ببته ڤه.
ئه‌گه‌ر به‌حس ل كه‌يسا ناساندنا جينۆسايدێ بكه‌ين پشتى بۆرينا پێنج سالان بسه‌ر كۆمكوژيێ دا ل ئاستێ نێڤ ده‌وله‌تى و جيهانى ئه‌ڤ كه‌يس وه‌ك پێدڤى نه‌هاتيه لڤاندن ژبه‌ر نه ئه‌ندامبوونا عێراقێ د دادگه‌ها تاوانێن نێڤ ده‌وله‌تى دا،ئه‌ڤ يه‌ك ژى بوويه سه‌ده‌مه‌ك كو كه‌يسا جينۆسايدێ وه‌ك خۆ بمينت،بتنێ حكومه‌تا هه‌رێما كوردستانێ ئيرۆ خۆ ل ڤى كه‌يسى كريه خودان و پێنگاڤێن زۆر باش كرينه كو ب جينۆسايد بێته ناساندن.
سه‌ربارى ژناڤبرنا رێكخراوا تيرۆرستا داعشێ به‌لێ هێش مه‌ترسيه لسه‌ر ئێزديان ل شنگال و پێدڤيه هه‌ر زوو ره‌وشا شنگال ژلايێ ئه‌منى و سياسى ڤه ئاسايى ببته ڤه داكو ئاواره ژڤێ ژيانا نه‌خۆش و په‌ريشان قورتالببن و ڤه‌گه‌رنه سه‌ر جيێن خۆ ڤه و كار بۆ ئاڤه‌دانكرنا شنگال بێته كرن و بتر ده‌ستێ هاريكاريێ بۆ ئێزديان بێته درێژكرن.
تعليقات