حسێن قائیدی: ب بریارا نێچیرڤان بارزانی رزگارکرنا گرتيێن ئێزدى دێ بەردەوام بت

دهۆک-KDP.info-

 بەرپرسێ نڤیسینگەها رزگارکرنا رەڤاندییان ل پارێزگەها دهۆکێ ددەتە دیارکرن، رۆژانە کار ل سەر ڕزگارکرنا رەڤاندیێن کوردێن ئێزدیین ددەستێ داعشێ دا دهێتە کرن.

ل ٣ـێ ئابا ٢٠١٤ـێ، رێکخراوا تیرۆریستیا داعش، ئێرشی شنگالێ کر، و تەڤکوژی ل دژی خەلکێ وی باژاری ئەنجامدا، هەیا نها ئەو تەڤکوژی ب ''جینۆساید'' نەهاتیە ناسکرن.

حسێن قائیدی د داخویانیەکێدا بۆ ماڵپەرێ فەرمیی یێ پارتی دیموکراتی کوردستان خویاکر:'' سەرەرایی ڕاگەهاندنا نەمانا داعشێ ل سوریا و ئیراقێ. بەلێ هەتا نها زێدەتری ٢٩٠٠ کەسێن ئێزدی ددەستێ داعشێ دا ماینە، و لێگەریان ب دووڤ واندا بەردەوامە، و تیمێن مە بەردەوام کار ژبۆ رزگارکرنێ دکەن.

ناڤهاتی دبێژیت ژی:'' سەرۆک وەزیران نێچیرڤان بارزانی بریار دایە هەتا کو ئێک کەس ژی ددەستێ هۆڤێن داعشێ دا مابیت نڤیسینگەهـ دێ بەردەوام بیت ل رزگارکرنێ''.

ل دۆر داوی ئامارێن رزگاربووی و رەڤاندییان قائیدی گۆت:'' هەتا نها ٣٤٢٤ کەس هاتینە رزگارکرن، و زێدەتر ژ ٢٩٠٠ کەسان ددەستێ داعشێ دا ماینە''.