بنگه‌هێ لالش پيرۆزباهيێ ل ئێزديان دكت ب هه‌لكه‌فتا جه‌ژنا رۆژيان
ب هه‌لكه‌فتا هاتنا جه‌ژنا رۆژيان،جوانترين و گه‌رمترين پيرۆزباهيان ئاراسته‌ى گشت ئێزديان ل هه‌رێما كوردستانێ و عێراقێ و جيهانێ دكه‌ين،هيڤيدارن ئه‌ڤ هه‌لكه‌فته بخێر و خۆشى بێت لسه‌ر هه‌موويان.
ئه‌م ڤێ هه‌لكه‌فتا ئازيز دگێرن ئه‌م گرتيێن خۆ يێن بێ گونه‌هـ ژ زارۆك و ژن و زه‌لامان ژبير ناكه‌ين،ئه‌وێن گرۆپێ داعش يێ تيرۆرستى گرتين ل ده‌مێ ده‌ست بسه‌ر قه‌زا شنگالێ دا گرتى،و تاوانێن كرێت ئه‌نجام داين و دێ مينت روو ره‌شى بۆ وان يێن ل پشت و يێن ئه‌نجام داين هه‌تاهه‌تايێ.
سه‌ربارى ته‌ڤ ئاسته‌نگێن پێكهاتێ ئێزدى ل ماوێ چار سالێن بۆرى تووشبوويێ،لێ هيڤێن مه دگه‌ش و خورتن ئه‌و ژى ب سه‌ركردايه‌تيا حه‌كيمانه يا سه‌رۆك مه‌سعود بارزانى و گه‌لێ كوردستانێ به‌ره‌ف ئارامى و ته‌ناهيێ ڤه دبه‌ت،و ب ئيرادا مه‌زن يا ئێزديان ئه‌وێن به‌رسنگێ هێرشا داعش يا هۆڤانه گرتين هه‌ر ئێكى ب هه‌لويست و ميرخاسيا خۆ پێخه‌مه‌ت پاراستنا ناسنامه و ره‌وشه‌نبيريه‌ت و هه‌بوونا مه سه‌ره‌راى وێ هێرشا درندانه يا تووشبووينێ.
دووپات دكه‌ين كو كانديكرنا به‌رێو نێچيرڤان بارزانى بۆ پۆستێ سه‌رۆكاتيا هه‌رێمێ و به‌رێز مه‌سروور بارزانى بۆ پۆستێ سه‌رۆك وه‌زيرێن حكومه‌تا هه‌رێمێ،پێنگاڤه‌كا گرنگه بۆ رێبه‌ريا گه‌لێ كوردستانێ،ژبه‌ركو ئه‌ڤ هه‌ردوو كه‌سايه‌تى ئێك ته‌مامكه‌رێن ئێكن و هه‌لگرێ په‌يره‌وێ بارزانيێ نه‌مرن هه‌ر ژ بچووكاتيا خۆ دا،و به‌ربژاركرنا كه‌سانێن نوو بۆ سه‌ركردايه‌تيا كوردستانێ بوويه كاره‌كى حه‌تمى و پێتڤى،ژبۆ به‌رسنگرتنا ئاسته‌نگان ل داهاتى و پاشه‌رۆژێ ب كه‌دا گه‌نجان ل پێ رێبازا باب و كالا و خۆراگر ورژد بن بۆ به‌رده‌واميدانێ لسه‌ر كاروانێ گه‌لێ كوردستانێ يێ نه‌مر بۆ بده‌سته‌ڤه‌ئينانا ئارمانجێن خۆ يێن شه‌رعى.
ته‌كه‌ز دكه‌ين كو سه‌ره‌دانا باليۆزا نيازپاكيێ،خانما ئێزدى ناديا موراد هه‌لگرا خه‌لاتێ نۆبل يێ ئاشتيێ بۆ هه‌رێما كوردستانێ و چاڤپێكه‌فتنا وێ لگه‌ل رێزدار نێچيرڤان بارزانى و مه‌سروور بارزانى پێنگاڤه‌كا راست و باشه و دێ هاريكار بت بۆ هايداربوونێ لسه‌ر ئازارێن خه‌لكێ مه يێ ئاواره ل كه‌مپان ل سنوورێ پارێزگه‌ها دهۆكێ كو ڤه‌حواندينه ژ ده‌مێ هێرشا هۆڤێن داعش لسه‌ر شنگالێ يا وێرانكرى.
سلاڤ بۆ گيانێ جانگۆريێن ئێزديان..ئازادى بۆ گرتيان
سلاڤ بۆ گيانێ جانگۆريێن پێشمه‌رگه‌يێن قاره‌مان
جه‌ژنا ته‌ڤايا ئێزديان پيرۆز بت،و بخێر و خۆشى بت بۆ هه‌موويان.
ده‌سته‌يا بلندا بنگه‌هێ لالش يێ ره‌وشه‌نبيرى و كۆمه‌لايه‌تى/دهۆك
13/12/2018
تعليقات