سياسه‌تمه‌داره‌كى ئێزدى:گونه‌ها ئێزديان چيه ل سالا 1970ێ وه‌ره دەڤەرێن وان هەلاویستی ماين
ئێزديخان نيوز:
ره‌وشه‌نبير و سياسه‌تمه‌داره‌كى كوردێ ئێزدى دياركر كو ل سالا 1970ێ وه‌ره دەڤەرێن ئێزدیان يێن سه‌ر ب ماددێ 140 ڤه ژ ده‌ستورێ عێراقێ ماينه هەلاویستی و گونه‌ها ئێزديان چى ئه‌و مادده نه‌ئێته جێبه‌جێكرن،داكو ئێزدى ڤه‌گه‌رنه سه‌ر كوردستانێ ڤه.
نايف ره‌شۆ،ره‌وشه‌نبير و سياسه‌تمه‌دارێ كوردێ ئێزدى بۆ مالپه‌رێ(ئێزديخان نيوز)دياركر:" كو ب درێژاهیا ديرۆكێ ئێزدی قوربانێ ئێزدیاتی و کوردایەتيا خۆ دده‌ن و ئۆل ئەزمان و ئاخا خۆهەتا ئيرۆ رۆژ پاراستینە،ل په‌يمانا 11ى ئادارا سالا 1970ێ وه‌ره دەڤەرێن ئێزدیان مانە هەلاویستی و بۆ ماوێ 4 سالا هاتنە پشتگوهـ هاڤێتن و ل سالا1975ێ تووشی ڤەگوهاستن و تەعریبێ بوون و ب ده‌هان گوندێن ئێزديان هەر ژ شنگال هەتا شێخان و تلکێف دهۆكێ تووشى ئەنفالێن رەشبوون و هه‌تا ئيرۆ رووفاتێن بسه‌دان ديارنينن".
ره‌شۆ دبه‌رده‌واميا ئاخفتنا خۆ دا گۆت:"پشتى سەرهه‌لدانا سالا1991ێ کوردێن ئێزدی دەڤەرێن خۆ رزگارکرن،پشتی ژناڤچۆنا رژێمێ ل سالا 2003ێ ده‌ڤەرێن کوردێن ئێزدی هەموو هاتن رزگارکرن و هەموو ئێزدی ڤەگەریانه سەر گوندێن خۆ و پشكدارى دهەلبژارتنێن2005ێ دا كرو دەنگ دانە دەستوری کو ئیرۆ عێراق پێ رێڤە دچت".
ئاماژه ب وێ چه‌ندێ ژى دا پشتى كاره‌ساتا گرعزێر و سيبا شێخدرێ ل 14/8/2007ێ ل شنگال و كۆمكوژيا ئێزديێن شنگال لسه‌ر ده‌ستێ رێكخراوا داعش ل3/82014 کو تووشی دره‌ندترین توندرەو ل چەرخێ 21ێ هاتن کوردێن ئێزدی کۆچ بەربووینە کوردستانێ و وه‌لاتێن هەرێمى و رێژەیەکا مەزن بەره‌ف ئه‌ورۆپا چۆن تایبەت وه‌لاتێ ئەلمانیا،لەوما سەرۆك بارزانی هەر زوو گەهشتە سەنگەرێن شەری و بۆ ماوی 100 رۆژان ل سەنگەرێ شەری ل سحێلا هەتا رۆژا 22/12/2014 سەرۆك بارزانی پەیامەك پێشکێشکر و ئەڤە جارا ئێکێ يە پشتی 74 فه‌رمانا کوردێن ئێزدی ب دەستێ خۆ تۆلەیا خۆ دستینن ب پشتەڤانيا پێشمەرگەیێ قارەمان، ول 25/9/2017ريفراندۆما سه‌ربه‌خۆيا هه‌رێما كوردستانێ،كوردێن ئێزدى ب پیرۆزباهیا میرێ ئێزدیان میر ته‌حسین بەگ 90% دەنگ بۆ ریفراندومێ دان بۆ مافێ چارەنڤيسێ خۆ دان.
ته‌كه‌زكر:"پشتى روودانێن 16ى ئوكتۆبه‌را 2017ێ كوردێن ئێزدى بووينه سێ پشك ئه‌و ژى پشكه‌ك سه‌ر ب هه‌رێما كوردستانێ ڤه‌نه مافێ ده‌نگدانێ هه‌يه و ب مافێن خۆ شادبن و پشكه‌كا دى دناڤبه‌را عێراقێ و هه‌رێما كوردستانێ دان و پپشكا دى لبن ده‌ستێ حه‌شدا شه‌عبى دانه".
سياسه‌تمه‌دارى زێده‌تر گۆت:"چەند دەنگۆ يێ تێنە گۆتن كو ئێزدی ئێك بگرن یان بلا ئێدی خۆ ئێكلا بکەن،ئەرێ چى گونه‌ها ئێزدیانە دەڤەرێ وان ژ سالا 1970ێ وه‌ره و هه‌تا نهۆ هه‌لاويستى بمينن و چى گونه‌ها وانه ماددێ 140 نه‌ئێته جێبه‌جێكرن ژ ده‌ستورێ عێراقێ".
خوياكر:"ئيرۆ كوردێن ئێزدى يێن سه‌ر ب ماددێ 140ڤه دخوازن جاره‌كا دى ڤه‌گه‌رنه سه‌ر باوه‌شا هه‌رێما كوردستانێ و بكارن پشكداريێ دهه‌موو هه‌لبژارتنێن كوردستانێ دا بكه‌ن و ژێ بێ به‌هرنه‌بن".
تعليقات