ئەنجوومەنێ وەزیران پەیامه‌كا پیرۆزباهیێ ئاراستەی کوردێن ئێزدی دکه‌ت
باسنيوز:
بەبۆنەی جەژنی چلەی هاوینیی ئێزدییان ئەنجوومەنی وەزیرانی هەرێمی کوردستان پەیامێکی پیرۆزبایی ئاراستەی کوردانی ئێزدی لە کوردستان و جیهان دەکات.
پەیامەکەی ئەنجوومەنی وەزیرانی هەرێمی کوردستان کە بە زاری کرمانجی سەروو بڵاوکراوەتەوە وێنەیەکی بۆ(باسنیوز) نێردراوە و ئەمەی خوارەوە دەقەکەیەتی:-
ب هه‌لكه‌فتنا هاتنا جه‌ژنا چلێ هاڤینێ یا ئێزدییان، پیرۆزباهییه‌كه گه‌رم ل هه‌موو خوشك و برایێن ئێزدی یێن كوردستانێ و جێهانێ دكه‌ین، هیڤیدارین ئه‌ڤ جه‌ژنه ب خێر و خۆشى بۆ كوردستانێ بگشتی و بۆ خوشك و برایێن ئێزدی بتایبه‌تى ڤه‌گه‌ڕیت. ئه‌م خۆشحالین كو ئیسال بۆ جارا ئێكێ پشتى جینۆسایدا شه‌نگالێ، خوشك و برایێن ئێزدى بۆ جه‌ژنێ سه‌ره‌دانا لالشا نوورانى دكه‌ن.
هه‌ر دڤێ هه‌لكه‌فتنێدا قوربانى یێن هه‌موو وان كاره‌ساتان ببیر تینین یێن كو ب سه‌رێ ئێزدی هاتى، بتایبه‌تى ژى ئێریشا تیرۆریستێن داعشێ ل سه‌ر ده‌ڤه‌رێن شنگالێ و ده‌ردۆرێن وێ كو د ئه‌نجامێدا هه‌ژماره‌كه مه‌زن یا خوشك و برایێن مه یێن ئێزدی شه‌هید بوون و هاتنه ڕه‌ڤاندن، به هزاران ژى ئاواره بوون.
هیڤیدارین جه‌ژن و بیرهاتنێن بهێن، خوشك و برایێن مه یێن ئێزدی ڤه‌گه‌ریابن سه‌ر جهێن ئازاد و ئاڤه‌دانكری یێن خۆ، ڕه‌ڤاندى یێن ده‌ستێ تیرۆرستان ژی دا ئازاد ببن. ئازادكرنا وان یه‌ك ژ كارێن هه‌ری ل پێشین یێن مه‌یه و هه‌تا هه‌موو خوشك برایێن ئێزدی تێنه ڕزگاركرن، ئه‌م دێ ل سه‌ر هه‌وڵ و كارێن خۆ بۆ ڕزگاركرنا وان به‌رده‌وام بین.
جاره‌كا دی جه‌ژنا چلێ هاڤینێ ل هه‌موو خوشك برایێن ئێزدی پیرۆز دكه‌ین، هه‌ر ساڵ ب خێر و خۆشى.
جڤاتا وه‌زیران یا هه‌رێما كوردستانێ
30/7/2018
تعليقات