رزگاربوویێن ئێزدى داخوازا دادگەهکرنا تيرۆرستێن داعشێ دکەن

دهۆک-KDP.info-  

ژنێن ئیزدى یێن دەستێ تیرۆرستێن داعشێ رزگار بووین راگەهاند، کریارێن تیرۆرستێن داعشێ ب سەرێ مە ئینایین نائینە ژبیرکرن، ژبەر هندێ ژ جڤاتا نیڤدەولەتى دخوازین هەر کەسەکێ دگەل تیرۆرستێن داعشێ چ عەرەب یان بیانى بیت بهێتە سزادان، ئەگەر رێکخراوێن دەولى ژى داخواز رزگارکرنا وان بکەن، ب چ رەنگا رازى نەبن.

ل 3-8-2014ێ، نیزیکى (6417) کوردێن ئیزیدى ل شنگالێ کەفتنە دەستێ تیرۆرستێن داعشێ، دئەنجامدان گورێن کوم و خەلکەکێ زور هاتە بەرزە کرن، دیسان هەمى رێکێن توندیێ دانەر ژنێن ئیزیدى، لڤێ دووماهیێ نڤیسینگەها رزگارکریێن رەڤاندیێن ئیزیدى ل دهۆکێ شیاینە (3307) کەسان رزگار بکەن ژ زەلام و ژن و زارۆکان.

حوسێن قائیدى، رێڤەبەرێ نڤیسینگەها رزگارکریێن رەڤاندیێن ئیزیدى ل دهۆکێ بۆ مالپەرێ فەرمیێ پارتى دیموکراتى کوردستان گۆت: "هەر کەسەکى رەڤاندى بیت ژلایێ تیرۆرستێن داعشێ خۆ ب پارە ژى ئەم هەولدەین ڤەگەرینە ڤە دناڤ کەس و کارێن واندا و رزگار بکەن، ئەم لسەر رزگارکرن هەر کەسەکێ کورد و ب تایبەت کوردێن ئیزیدى دبەردەوامین".

ل هەیڤا ئێکا ئەڤ سالە، حکومەتا عیراقێ بریارا دادگەهکرنا تیرۆرستێن داعشێ دا و چەندین کەسێن بیانى دگەلدا هەتا هەتایێ ب تاوانێن تیرۆرى هاتینە سزادان، لڤێ دووماهیێ (هیومن رایتس ووچ) داخواز ژ دادگەها عیراقێ کریە هەلویستێ بەرامبەر ژن و زارۆکێن بیانى دەربارى سزادانا وان بگهوریت و رێزێ ل رەوشا وان یا تایبەت بگریت.

دەربارى ڤێ ئێکى، لەیلا تەعلو، ژنەکا رزگار بوویى ژ دەستێ تیرۆرستێن داعشێ بۆ مالپەرێ فەرمیێ پارتى دیموکراتى کوردستان ئاخفت: "لدەمێ هاتنا داعشێ ب ناڤ شنگالێ، ئەز و 19 کەسێن دیتر ژ مالباتا من کەفتینە دەستێ تیرۆرستێن داعشێ، دیمەنێن ترسێ ئەم گرتین دەمێ تیرۆرست رابووین ب جوداکرنا  ژن و زارۆک و زەلام، کۆ لوى وەختى هەمى جورێن ئازاران نیشا خەلکێ گرتى ددا و ژنێن ئیزیدى دڤرۆت و زەلام دکوشتن و سەرژێدکرن و د زیندانێ دا ئازار ددان، چ جارا من باوەر نەدکر دێ رۆژەکێ زولمەکا بڤى ئاواى ب چاڤێن خۆ بینین و ئەڤ توند و زولمە ل بوسلمان و فەلەیان ژى دکرن و ئەم ڤیرى شەر و کوشتنێ دکرین".

لەیلا تەعلو بەحسکر، کریارێن تیرۆرستێن داعشێ ب سەرێ مە ئینایین نائینە ژبیرکرن، ژبەر هندێ ژ جڤاتا نیڤدەولەتى دخوازم هەر کەسەکێ دگەل تیرۆرستێن داعشێ چ عەرەب یان بیانى بیت بهێتە سزادان، ئەگەر رێکخراوێن دەولى ژى داخواز رزگارکرنا وان بکەن، ب چ رەنگا رازى نەبن.

سوهەیلا دەخیل، ژنەکا دیتر ژ رزگاربوویێن دەستێ تیرۆرستێن داعشێ خویاکر: "تاوانێن داعشێ ددەرهەقێن کوردێن ئیزیدى و ب تایبەت ژنان دا کرى مەزنترە ژ بریارێن رێکخراوێن دەولى و داخوازکرنا بەردانا داعشێن بیانى، ل بیرا منە دەمێ زڤستان و سارمایەکا بهێز، داعشێن ژن و زەلام دا ئاڤا تەزى ئینن ب مەدا کەن و مە قوتن و هندەک ب ئاڤا گەرم د سوتن."

سوهەیلایێ ئاماژەدا: "ژنێن سەر ب تیرۆرستێن داعشێ ڤە، گەلەک بێ رەوشتى و رەفتار و ئاخفتنێن کرێت دگۆتنە گرتێن ژن یێن ددەستێ واندا، کۆ چەند کچێن ئیزیدى خۆکوشتن سەرا رەفتارێن وان، دیسان داعشێ زەلام دکوشتن و ژن دڤرۆتن و کچ دکرنە بەردەستکێن خو و کور دبرنە شەرى و ڤیرى توندیێ دکرن، ژبەر ڤێ ئێکێ ژ حکومەتا عیراقێ و هەرێما کوردستانێ دخوازم ئەڤ کەسێن دگەل داعشێ بهێنە دادگەهکرن و ل چ کەسێ وان ژى نەئێنە بوراندن".