ميرێ ئێزديان داخوازيه‌كێ ئاراسته‌ى ئه‌لمانيا دكه‌ت
ئێزديخان نيوز:
ئيرۆ سێ شه‌مبوويێ 29ى گولانا 2018ێ ل شێخان،سه‌ماحه‌تا مير "ته‌حسين سه‌عيد عه‌لى" ميرێ ئێزديان ل عێراقێ و جيهانێ پێشوازى ل "مارت كورهولت" ئه‌ميندارێ گشتى يێ حكومه‌تا ويلايه‌تا براندنبورك ل ئه‌لمانيا و دكتۆر "ميرزا دنايى" كر.
راگه‌هاندنا جڤاتا رۆحانيا ئێزديان دراگه‌هاندنه‌كێ دا به‌لاڤكريه،دهه‌ڤديتنێ دا سه‌ماحه‌تا مير ته‌حسين سه‌عيد عه‌لى چه‌ند خالێن گرنگ گرێدايى كاروبارێن ئێزديان ب شێوه‌كى گشتى گۆتوبێژكرن،ژ وان خالان ئازارێن ئێزديان ل كه‌مپان دا ل عێراقێ و كاودانێن مرۆڤى يێن ب زه‌حمه‌ت تێدا دژين لگه‌ل بلندبوونا پلێن گه‌رمێ و دابين نه‌كرنا كاره‌بێ و سه‌رمايا دژوار ل زڤستانێ دا.
دته‌وه‌ره‌كى دى دا جه‌نابێ ميرى به‌حسێ پرسا گرتيێن د ده‌ستێ داعش دا ماين و چاره‌نڤيسێ وان ديارنينه هه‌ر ژ3ى ته‌باخا 2014ێ.
هه‌روه‌سا سه‌ماحه‌تا ميرى داخواز ژ ئه‌لمانيا كر پتر گرنگيێ بده‌نه ئێزديان ل ئه‌لمانيا و سوپاسيا وى وه‌لاتى كر بۆ پێشوازيكرنا رزگاربوويان و دابينكرنا چاره‌سه‌ريا پێتڤى بۆ وان.
ژلايه‌كى دى ڤه مارت كورهولت گۆت: "ڤان داخوازيێن ئێزديان دێ گه‌هينه وه‌لاتێ ئه‌لمانيا بۆ پێشكێشكرنا هه‌موو شێوێن پشته‌ڤانيێ بۆ ئێزديان".
تعليقات