ل كەمپا شاریا مەترسی لسەر كێمیا ئاڤێ پەیدا دبت
باسنيوز:
ل كەمپا شاریا نێزیكی سێ هزار و 70 سەرۆك خێزان دناڤا كەمپا شاریا دا د ئاكنجی نە و ئاڤا ڤەخوارنێ بۆ ئاكنجیێن كەمپێ ژ چوار بیرێن چیایێ زاوا دهێتە دابینكرن، رێڤەبەرێ كەمپێ دیار دكەت كو ل وەرزێ هاڤینێ مەترسیا كێمبوونا ئاڤێ هەیە.
هەكار محەمەد ئەمین، رێڤەبەرێ كەمپا شاریا بۆ (باسنیۆز) دیار كر، ئەڤە ماوێ چوار سالە كەمپا شاریا هاتیە دانان و د ماوی دوو سالێن بۆری دت، چار بیرێن ئاڤێ بۆ ئاكنجیێن كەمپێ ل چیایێ زاوا هاتینە دانان و بەردەوام ئاڤ بۆ وان دهێت كو رۆژانە نێزیكی دوو هزار مەترێن سێ جا یێن ئاڤێ دهێن، بەلێ ل وەرزێ هاڤینێ هێشتا ل دەستپێكێ یە مەترسی ل سەر كێمبوونا ئاڤێ پەیدابوویە و خەلكێ كەمپێ ب رێژەیەكا پتر پێدڤی ب ئاڤێ هەیە.
ئاشكرا ژی كر، رێكخراوا (Save the children) ئەڤ هەر چار بیرێن ئاڤێ بۆ كەمپێ كۆلاینە و دوو سالە ئەڤ رێكخراوە چاڤدێریا ئاڤا كەمپێ دكەت، بەلێ ل مەها بهێت دێ گرێبەستا ڤێ رێكخراوێ ل گەل كەمپێ ب داوی هێت و دێ خوە ڤەكێشن و ئەڤە ژی بێگومان دێ مەترسیا كێمبوونا ئاڤێ ل كەمپێ زێدەتر لێ كەت.
ئەندازیار ڤەگێر ئەحمەد، جێگرێ رێڤەبەرێ ئاڤا دەوروبەرێن دهۆكێ بۆ (باسنیۆز) دیار كر، رێڤەبەریا مە بەردەوام ئاڤەكا پاقژ بۆ 24 كەمپێن پارێزگەها دهۆكێ دابین دكەت و ئاڤا وان كەمپان پتریا وان ژ بیرێن ژێر ئەرد دهێتە كێشان، ب تنێ بۆ هەر چوار كەمپێن (دۆمیز، كەبەرتۆ 1 و 2 و كەمپا خانكێ) ئاڤ ژ پرۆژێ ئاڤا دهۆكێ و پرۆژێ ئاڤا فەیدیێ دهێتە دابینكرن.
ڤەگێر ئەو یەك ژی دیار كر، ل هەموو كەمپان تۆرێن ئاڤێ هاتینە دانان و ئاڤ ب شێوەیەكێ بەردەوام دچیت و هەر مەترسیەكا كێمبوونا ئاڤێ پەیداببیت، دەملدەست ئەم دێ بزاڤێن چارەسەریا وێ ئاریشێ كەین.
تعليقات